دەنساۋلىق ساقتاۋ ۆيتسە-ءمينيسترى ءلاززات اقتاەۆا 19 ماۋسىم كۇنگى ۇكىمەت وتىرىسى كەزىندە ەندى جاعدايعا باعا بەرۋ كەزىندە ءبىر ناۋقاستىڭ ورتاشا ەسەپپەن قانشا ادامعا ۆيرۋس جۇقتىراتىنىن كورسەتەتىن R كوەففيتسيەنتى جانە ورىنداردىڭ بار-جوقتىعىنا نازار اۋداراتىنىن ايتتى.

بۇعان دەيىن دەنساۋلىق ساقتاۋ مينيسترلىگى ناۋقاستار سانىنىڭ كوبەيۋىنە قاراي كارانتين شارالارىن كۇشەيتۋ نە جۇمسارتۋ تۋرالى شەشىم قابىلداپ كەلگەن.

"ەگەر R كورسەتكىشى 1,3-تەن اسسا نەمەسە ول 1,15 پەن 1,3 ارالىعىندا بولىپ، ينفەكتسيالىق ستاتسيونارلاردىڭ 70-تەن استامى بوس ەمەس بولسا، كارانتين شارالارىن كۇشەيتۋ كەرەك بولادى. نەمەسە ستاتسيونارداعى ورىنداردىڭ 90 پايىزى بوس ەمەس بولسا، R-عا قاراماستان كارانتين شارالارى كۇشەيتىلەدى" دەدى اقتاەۆا.

وتكەن اپتادا دەنساۋلىق ساقتاۋ ءمينيسترى ەلجان ءبىرتانوۆتان كوروناۆيرۋس تابىلىپ، اۋرۋحاناعا تۇسكەننەن كەيىن ونىڭ مىندەتىن ۆيتسە-مينيستر ءلاززات اقتاەۆا ۋاقىتشا اتقارۋعا كوشكەن. مينيسترلىكتىڭ ايتۋىنشا، كارانتين شارالارى جۇمسارۋ ءۇشىن ورىنداردىڭ كەمىندە 50 پايىزى بوس بولۋى كەرەك جانە R كورسەتكىشى 1-گە تەڭ بولۋى ءتيىس. ۆەدومستۆو ادام ءولىمى جانە جاعدايى اۋىر ناۋقاستار سانىن دا قوسىمشا كريتەري رەتىندە اتادى.

دەگەنمەن ۆيتسە-مينيستر ەلدەگى R كورسەتكىشى مەن ينفەكتسيالىق ستاتسيونارلاردىڭ بوس-بوس ەمەستىگى تۋرالى مالىمەت ايتپادى.

وسى اپتادا دەنساۋلىق ساقتاۋ سالاسىنىڭ شەنەۋنىكتەرى الماتى مەن نۇر-سۇلتانداعى ينفەكتسيالىق ستاتسيونارلاردىڭ 90-95 پايىزى بوس ەمەس دەپ مالىمدەپ، جاعدايدىڭ كۇردەلى ەكەنىن ايتقان. بۇل قالا تۇرعىندارى كوروناۆيرۋسقا تەستەن ءوتۋدىڭ قيىن ەكەنىن ايتىپ شاعىمدانعان. كەيبىر اۋرۋ بەلگىسى بايقالعان ناۋقاستار اۋرۋحاناعا قابىلدامايتىنىن جەتكىزگەن. وسى اپتادا شەنەۋنىكتەر اۋرۋحاناعا جاعدايى اۋىر ناۋقاستاردى عانا جاتقىزاتىنىن مويىندادى.

سوڭعى مالىمەت بويىنشا، قازاقستاندا 23 960 ادامنان كوروناۆيرۋس انىقتالعان. ولاردىڭ 7609-ىندا اۋرۋ بەلگىسى جوق. 105 ادام قايتىس بولعان.

Abai.kz