پيكەت وتكىزگەن ەكى ازاماتتىڭ ءبىرى - الماتى تۇرعىنى اقيقات قاليوللا شارا باسىندا ازاتتىق تىلشىسىنە قىتاي بيلىگىنەن سول جاقتا زاڭسىز ۇستالعان ءتورت تۋىسىن بوساتۋدى تالاپ ەتىپ كەلگەنىن ايتقان ەدى.

پيكەت كەزىندە قاليوللا اياق-قولىنا شىنجىر بايلاپ، "قىتاي ۇكىمەتى، وتباسىمداعى ءتورت ادامدى قازاق ەلىنە دەرەۋ جىبەر" دەگەن جازۋى بار، تۋىستارىنىڭ سۋرەتى باسىلعان پلاكات ۇستاپ تۇردى.

- 2018 جىلى 15 ناۋرىزدا قىتايدا وتباسىمداعى ءتورت ادام: اكە-شەشەم جانە ەكى ءىنىمدى زاڭسىز ۇستاپ اكەتكەن. سودان بەرى ولارمەن حابارلاسا الماي وتىرمىن. ءبىرىنشى تالابىم ولارمەن دەرەۋ حابارلاستىرسىن. ەكىنشىدەن، اكەمدى ءولىمشى ەتىپ ۇرىپ، ساباعان. ءىز-ءتۇزسىز جوعالىپ كەتتى. ونى تىعىپ وتىر. اكەم دەرەۋ شارتسىز بوساتىلسىن. قىتايدان دەرەۋ قازاقستانعا جىبەرىلسىن، - دەدى اقيقات قاليوللا.

ەلشىلىك الدىنداعى شارباققا ءوزىن شىنجىرمەن بەكىتكەن ەكىنشى نارازى تۇرعىن جەڭىس زارقىن دا بۇل جەرگە قىتايدا قالعان ايەلى مەن ۇلىن ەلگە قايتارۋدى تالاپ ەتىپ، كەلىپ تۇرعانىن ايتقان بولاتىن.

- قىتايداعى وتباسىمدى كورمەگەنىمە ءۇش جىل بولدى. مىناۋ مەنىڭ ايەلىم - ساۋلە ەرتايقىزى، ۇلىم - مۇحتار جەڭىسۇلى (پلاكاتتاعى سۋرەتتەرىن كورسەتتى). "قىتاي، وتباسىمدى جىبەر" دەپ كەلىپ وتىرمىن. ءۇش جىلدان بەرى قىتاي كونسۋلدىعىنا ارىز جازىپ كەلەمىز. ەلەگەن جوق. ايەلىمدى ءبىر جىل ساياسي ۇيرەتۋ لاگەرىنە قاماپ، مۇگەدەك قىلدى. سوعان قاراماستان بالام مەن ايەلىمە تاعى قىسىم جاساپ جاتىر. "سەندەردى قايتا قامايمىز، سەندەر قازاقستاننىڭ تىڭشىسىڭدار" دەپ قوقان-لوقى كورسەتكەن، - دەدى جەڭىس زارقىن.

بۇل ەكى ازامات ءبىر اپتا بۇرىن دا ەلشىلىك الدىندا پيكەت وتكىزگەن. سول كەزدە قىتاي ەلشىلىگىنىڭ وكىلى گو مين ولاردى قابىلداعان. ول ء"بىزدىڭ بۇدان حابارىمىز جوق. قىتاي جاقپەن سويلەسەمىز. ءبىزدىڭ قولىمىزدان ەشتەڭە كەلمەيدى" دەگەن. ول قازاقستاننىڭ سىرتقى ىستەر مينيسترلىگى بۇل ازاماتتارعا قاتىستى نوتا تاپسىردى دەگەن اقپاراتتى جوققا شىعارعان.

قاليوللا مەن زارقىندى قاي پوليتسيا بولىمشەسىنە الىپ كەتكەنى ازىرگە بەلگىسىز.

قىتاي شىڭجاڭدا لاگەرلەر اشىپ، وعان ۇيعىرلار، قازاقتار جانە باسقا دا مۇسىلمانداردى قاماپ جاتقانى جايلى اقپارات 2017 جىلى تاراي باستاعان. 2018 جىلى جازدا بۇۇ "شىڭجاڭداعى لاگەرلەردە ءبىر ميلليونعا جۋىق ۇيعىر، قازاق جانە باسقا دا مۇسىلمان وتىر" دەپ مالىمدەگەن. قىتاي بيلىگى باسىندا لاگەرلەردىڭ بارىن جوققا شىعارىپ, كەيىن بۇل جەرلەردى "تەرروريزم مەن ەكسترەميزممەن كۇرەسەتىن جانە كاسىپ ۇيرەتەتىن ورتالىق" دەپ سيپاتتاعان.

قىتايدا تۋىستارى قالعان ازاماتتار 2018 جىلدان بەرى جيىندار ۇيىمداستىرىپ، پيكەتتەر وتكىزىپ، تۋىستارىن ەلگە قايتارۋدى تالاپ ەتىپ كەلەدى.

Abai.kz