ەلوردادا جاڭبىر قۇيىپ تۇر. سونىڭ سالدارىنان قالا كوشەلەرىن سۋ باسقان، دەپ حابارلايدى قازاقپارات.

قازىرگى ۋاقىتتا الەۋمەتتىك جەلىدە قالا كوشەلەرىنىڭ ءار جەرىنەن تۇسىرىلگەن ۆيدەولار كوپتەپ تارالىپ جاتىر. كولىكتىڭ ىشىنەن سونداي ۆيدەونىڭ ءبىرى يمانوۆ كوشەسى بويىندا تۇسىرىلگەن. ۆيدەودان سۋ دەڭگەيى جەڭىل كولىكتىڭ بەل ورتاسىنا دەيىن جەتىپ تۇرعانىن جانە بىرنەشە ماشينانىڭ جول ورتاسىندا تۇرىپ قالعانىن بايقاۋعا بولادى. سۋ باسقان كوشەلەردىڭ سۋرەتتەرى دە الەۋمەتتىك جەلىدە جەتەرلىك.

ايتا كەتەيىك، نۇر-سۇلتان قالالىق توتەنشە جاعدايلار دەپارتامەنتى «قازگيدرومەت» رمك دەرەكتەرىنە سۇيەنە وتىرىپ، بۇگىن تاڭەرتەڭ جانە كۇندىز نايزاعاي ويناپ جاڭبىر جاۋاتىندىعىن حابارلاعان بولاتىن. جاڭبىر ەرتەڭگە دە ۇلاسادى. ءتىپتى بۇگىن بۇرشاق ءتۇسۋى دە ىقتيال. سولتۇستىك-باتىستان سوققان جەل وڭتۇستىك-باتىسقا اۋىسقاندا ەكپىنى سەكۋندىنا 15-20 مەترگە جەتەدى. بۇگىن كۇندىزگى اۋا تەمپەراتۋراسى 10-12 گرادۋس جىلى.

Abai.kz