بەلگىلى جازۋشى جانات احمادي باقيلىق بولدى. بۇل حاباردى قازاقستان جازۋشىلارى وداعى باسقارما توراعاسىنىڭ ورىنباسارى، اقىن باقىت بەدەلحان Facebook جەلىسىندەگى جەكە پاراقشاسىندا حابارلادى.

- 21 عاسىردىڭ مايقى ءبيى – دەپ مارتەبە تۇتىپ جۇرگەن جانات احمادي اعامىز دا پانيدەن باقيعا جول سالىپتى. قازىنالى قاريا بولادى-اۋ – دەپ جۇرگەندە، بۇ كەتكەنى نە ەتكەنى؟! قازاق قالامگەرلەرى مەن قابىرعالى قالىڭ جۇرتقا قايعىرا كوڭىل ايتامىن. بالاداي جەتەلەپ، داناداي قۇرمەتتەپ، قادىر-قاسيەتىن قايماقتاي قالقىتىپ جۇرگەن جەڭگەمىزگە قۇداي قۋات بەرسىن، – دەپ جازدى باقىت بەدەلحان.

جانات احمادي 1943 جىلى 15 قازاندا شىعىس تۇركىستاننىڭ قۇلجا گۋبەرنياسى، قازىرگى ىلە قازاق وبلىسىنا قاراستى قورعاس اۋدانىندا ءۇش اقسۋ–مازى دەگەن جەردە دۇنيەگە كەلگەن. قۇلجا قالاسىنداعى 3 جىلدىق شارۋامالدارىگەرلىك مەكتەبى دەپ اتالاتىن تەحنيكۋمنىڭ زووتەحنيكالىق ءبولىمىن 1961 جىلى تامامدايدى.

1962 جىلى قازاقستانعا كەلەدى. قر مەملەكەتتىك ورتالىق ۇلتتىق مۇراعاتىندا كىشى عىلىمي قىزمەتكەر، اعا عىلىمي قىزمەتكەر بولعان.

2006 جىلى «ەسەنگەلدى بي» تاريحي رومانى، 2008 جىلى «جارىلعاپ بي» تاريحي رومانى، 2009 جىلى «قارادان تۋعان حان نۇراباي» تاريحي رومانى، «ۋاقىت ىرعاعى» اتتى رەتسەنزيا، ادەبي سىن ماقالالار كىتابى جارىق كورگەن. حالىقارالىق «الاش» ادەبي سىيلىعىنىڭ لاۋرەاتى.

داۋرەن قۋات، جازۋشى:

- قازاق ادەبيەتىنە «دۇربەلەڭ» اتتى رومانىمەن ءدۇبىر سالا كەلگەن كەڭ تىنىستى، ەپيك جازۋشى، رومانيست جانات احمادي دۇنيەدەن وزدى... جاكەڭنىڭ وسى بۇگىن، ءتۇس الەتىندە بۇرىنعى سوڭعىنىڭ جولىنا ءتۇسىپ، قايتپاس ساپارعا اتتانعانىنا سەنە الار ەمەسپىن. قايران جانات اعانىڭ قوڭىراۋ شالىپ، تەلەفون تۇتقاسىن كوتەرگەن بەتىڭدە-اق: «قۇدىققا ءتۇسىپ كەتكەن ادامعا ۇقساپ جوق بوپ كەتەتىندەرىڭ نە وسى؟» دەپ ەركەلەي ۇرىسىپ قويا بەرەتىن قوڭىر داۋىسى قۇلاعىما كەلىپ تۇر.

قايىر-حوش، اعايىن! ومىردەن ادەبيەتتى شىن سۇيگەن، جازۋعا جان تانىمەن بەرىلگەن، قازاقتىڭ باي تىلىنە بايلىق ۇستەگەن، قۇنارىنا قۇنار قوسقان، قالام مەن كالامىنا العاۋسىز سەنگەن اقتاڭگەر جازۋشى ءوتتى. جانىڭ جانناتتا بولسىن، جاقسى اعا!

Abai.kz