مامىر ايىندا رەسەي كوروناۆيرۋستى ەمدەۋگە ارنالعان جاڭا پرەپارات - «اۆيفاۆير» ءدارىسىن سىناقتان وتكىزدى. ال 21 مامىردا رەسەيدىڭ دەنساۋلىق ساقتاۋ مينيسترلىگى بۇل ءدارىنى رەسمي بەكىتتى. ماۋسىم ايىندا رەسەيدىڭ ينۆەستيتسيالار قورى مەن «حيمرار» كومپانياسى «اۆيفاۆير» ءدارىسىن ءوز ەلىنىڭ ەمحانالارىنا جەتكىزدى.

ماسكەۋ قازىردىڭ وزىندە وسى ءدارىنى بەلارۋس ەلىنە ەكسپورتتاي باستاپتى. جاقىن ارادا پرەپاراتتى قازاقستانعا دا ەكسپورتتاۋ جوسپارلانىپ وتىرعان كورىنەدى. ودان بولەك، لاتىن امەريكاسى، تمد جانە تاياۋ شىعىس ەلدەرى قىزىعۋشىلىق تانىتقان.

بۇل ءدارىنىڭ COVID-19-عا قارسى بەلسەندى اسەرى بار فاۆيپيراۆير بار ەكەنى دالەلدەنگەن. كەيىنىرەك ول كوروناۆيرۋس ينفەكتسياسىنىڭ الدىن الۋ، دياگنوستيكالاۋ جانە ەمدەۋ بويىنشا ادىستەمەلىك ۇسىنىستار تىزىمىنە ەنگىزىلدى.

- اقش بيلىگىنىڭ شەشىمىن ەسكەرە وتىرىپ، الداعى ايلاردا وندىرىلگەن «رەمدەسيۆيردىڭ» (Gilead Sciences كومپانياسى) 100 پايىزىن جانە الەمدىك نارىقتاعى ءتيىمدى پرەپاراتتاردىڭ تاپشىلىعىن ساتىپ الۋعا رەسەي كوروناۆيرۋسپەن كۇرەستە باسقا ەلدەرگە كومەك كورسەتۋگە جانە «ءاۆيفاۆيردىڭ» شەتەلگە ەكسپورتتاۋعا دايىن. رەسەي ۇسىنعان ءدارى بىرنەشە ەسە ارزان تۇرادى، بۇل رەتتە تابلەتكا ءتۇرى كوروناۆيرۋستى جۇقتىرۋدىڭ ەرتە كەزەڭىندە تەراپيانى جۇزەگە اسىرۋعا مۇمكىندىك بەرەدى، - دەيدى رەسەي ينۆەستيتسيالار قورىنىڭ باسشىسى كيريلل دميتريەۆ.

اقپاراتقا سەنسەك، اتالعان ءدارى جاقىن ارادا ءبىزدىڭ ەلگە دە اكەلىنەتىن سەكىلدى. دەمەك ءدارى تاپشىلىعىن كورىپ وتىرعان قازاقستاندىقتارعا بۇل ىزدەگەنگە سۇراعان بولۋى مۇمكىن.

ەلدەگى ءدارىحانالاردا دەنە قىزۋىن تۇسىرەتىن جانە ۆيرۋسقا قارسى ءدارى-دارمەكتىڭ تاپشىلىعى جايلى ءبىراز ۋاقىتتان بەرى ايتىلىپ ءجۇر. بۇل ماسەلەگە قاتىستى دەنساۋلىق ساقتاۋ ءمينيسترى الەكسەي تسويدىڭ ءوزى پىكىر ءبىلدىرىپ، ءدارى-دارمەكتىڭ جەتىسپەۋشىلىگى تۋرالى اقپاراتتار حالىقتىڭ ءدارىحانالاردان ارتىعىمەن ءدارى ساتىپ الۋىنا سەبەپ بولعانىن ايتقان ەدى.

ال دەنساۋلىق ساقتاۋ ۆيتسە-ءمينيسترى ليۋدميلا بيۋرابەكوۆانىڭ اقپاراتىنا سۇيەنسەك، قازاقستاندىقتار پاندەمياعا بايلانىستى 138,8 ملن تەڭگەگە ءدارى-دارمەك ساتىپ العان. وسىعان وراي كەي ءدارى-دارمەكتى ءبىر ادامعا بىرنەشە قوراپتان عانا ساتاتىن شەكتەۋ ەنگىزەتىنىن مالىمدەگەن بولاتىن.

- بىرنەشە ءوڭىر ءدارى-دارمەكتى ساتۋدا شەكتەۋ ەنگىزىپ ۇلگەردى، باسقالارى دا ءتۇرلى جەلىلەر اسسوتسياتسياسىمەن  بىر ادامعا ەكى-ءۇش قوراپتان ارتىق بەرمەۋ تۋرالى مەموراندۋم جاساسپاق. سەبەبى ءبىر ەمدەۋ كۋرسىنا وسىنشا عانا پرەپورات كەتەدى.  ولاردىڭ ساقتاۋ مەرزىمى، ساقتالۋ جاعدايى بار. سوندىقتان ءدارى-دارمەكتەر ۇيدە پايداعا اسپاي قالىپ قويماس ءۇشىن وسىنداي شارالار جاساماق، –دەگەن ەدى بيۋرابەكوۆا.

بارشا اقپارات قۇرالدارىن شۋلاتىپ، حالىقتى ءدارىحانالاردىڭ الدىنا جيناعان ءدارى تاپشىلىعى جايلى اقپارات پەن رەسەيدىڭ قازاقستانعا ءدارى ەكسپورتتايتىنى جايلى حاباردىڭ قانداي قاتىسى بار ەكەنى قازىرشە بەلگىسىز. بىراق ءبىزدىڭ ەلدە ءدارى تاپشىلىعى جايلى اقپارات تاراعان ساتتە، رەسەي كورشى ەلدەرگە ءدارى ساتا باستادى.

قوسىمشا. اۆيفاۆير - بۇل رەسەيدىڭ تىكەلەي ينۆەستيتسيالار قورى (RDIF) جانە ChemRar كومپانيالار توبى جاساعان رەسەيلىك ءدارى-دارمەكتىڭ ساۋدا اتاۋى. الايدا، پرەپاراتتىڭ بەلسەندى سۋبستانتسياسى رەسەيدە ويلاپ تابىلعان جوق.