رەسپۋبليكا ەكونوميكاسى 1990-جىلداردىڭ سوڭىنان بەرى العاش رەت ءۇش پايىز قىسقارادى، دەپ ەسەپتەيدى دۇنيەجۇزىلىك بانك ماماندارى. حالىقارالىق ينستيتۋتتىڭ 22 شىلدەدە جاريالاعان بايانداماسىندا قازاقستان ەكونوميكاسى 2021 جىلى 2,5 پايىز وسەدى دەپ بولجاندى.

«ۇزاق ۋاقىتقا سوزىلعان داعدارىتان ەلدە كەدەيلەر كوبەيىپ، الەۋمەتتىك تەڭسىزدىك اراسى الشاقتاي تۇسەدى. الدىن الا بولجام بويىنشا، 2020 جىلى كەدەيشىلىك 12,7 پايىزعا ارتادى. بانك ماماندارىنىڭ ەسەپتەۋىنە قاراعاندا، بيىل 800 مىڭ ادام كەدەيلەر ساناتىنا تۇسەدى» - دەپ مەجەلەيدى دۇنيەجۇزىلىك بانكتىڭ ماماندارى.

بايانداما اۆتورلارىنىڭ بولجامىنا سايكەس، كوروناۆيرۋس پاندەمياسى جانە ونى تەجەۋ ارەكەتتەرى سالدارىنان قازاقستاننىڭ ەڭبەك نارىعى زارداپ شەگەدى، اسىرەسە بۇل داعدارىس بىلىكتىلىگى تومەن جۇمىسشىلارعا اۋىر تيەدى. سالىق جەڭىلدىكتەرى مەن سالىقتان بوساتۋ داعدارىسقا قارسى شىعىنداردى كوبەيتىپ، بيۋدجەت تابىسىن تومەندەتتى، وسىنىڭ كەسىرىنەن 2020  جىلى بيۋدجەت تاپشىلىعى ارتادى.

بيىل العاشقى توقساندا قازاقستاننىڭ ىشكى جالپى ءونىمى 2,3 پايىز ءوسىم كورسەتكەنىمەن، ودان سوڭ كوروناۆيرۋس ەلگە تاراعان ۋاقىتتا احۋال قيىنداي ءتۇستى.

«بيلىك COVID-19 پاندەمياسىن تەجەۋگە ارنالعان شارالار قابىلدادى، ال بيۋدجەتتەگى قور ەپيدەمياسىنىڭ ەكونوميكاعا اسەرىن جۇمسارتۋعا مۇمكىندىك بەردى. دەگەنمەن مۇنايعا سۇرانىستىڭ تومەندىگى جانە باعانىڭ ارزانداۋى، سونىمەن بىرگە پاندەميانىڭ ۇزاققا سوزىلۋى ەكونوميكا بولاشاعىن بۇلىڭعىرلاتا ءتۇستى. سوعان قاراعاندا، بيلىكتىڭ قورداعى قاراجاتىن كەدەيلەر مەن از قامتىلعان وتباسىلارعا قوسىمشا كومەك رەتىندە بەرىپ، ەكونوميكانى قالپىنا كەلتىرۋگە كومەكتەسەتىن رەفورمانى تەزدەتكەنى دۇرىس بولادى»، - دەدى دۇنيەجۇزىلىك بانكتىڭ قازاقستانداعى كەڭسەسىندەگى اعا ەكونوميست سامسۋ راحاردجا.

بانك بايانداماسىندا پاندەميا قازاقستاندا ادام كاپيتالىنىڭ دامۋىنا كەرى اسەر ەتەتىنى ايتىلعان.

«پاندەميا مەن جەڭىلدەتۋ شارالارى ەڭبەك نارىعىندا داعدارىس تۋدىرادى. اسىرەسە، بىلىكتىلىگى تومەن جۇمىسشىلار جۇمىس ىستەيتىن سالالاردا جۇمىسپەن قامتۋعا ايتارلىقتاي اسەر ەتەدى.

كارانتين كەزەڭىندە ساپالى بىلىمگە بىردەي قول جەتكىزۋ قيىن، قاشىقتان وقىتۋ بارلىق وقۋشىلارعا بىردەي ءتيىمدى ەمەس. بۇل ءبىلىم سالاسىنىڭ، ادامي كاپيتالدىڭ دامۋىنا، اسىرەسە حالىقتىڭ الەۋمەتتىك ءالسىز توپتارىنا كەرى اسەرىن تيگىزۋى مۇمكىن »، - دەپ اتاپ ءوتتى ساراپشىلار.

Abai.kz