ءىستى قاراعان سۋديا داستان الباەۆ ونى كىنالى دەپ تاپتى.

سوت ونلاين تۇردە ءوتتى. وعان تەرگەۋ ءىسىن جۇرگىزگەن پوليتسيا وكىلى، اعا لەيتانانت سامات جاربانوۆ پەن جاۋاپكەر سەرىكجان ءبىلاش جانە ونىڭ قورعاۋشىسى شىنقۋات بايجانوۆ قاتىستى.

پوليتسيا وكىلىنىڭ ايتۋىنشا، سەرىكجان ءبىلاش تىركەلمەگەن "ناعىز اتاجۇرت" ۇيىمىن "زاڭسىز قۇرىپ", جۇمىس ىستەگەن. ال جاۋاپكەر ءبىلاش ء"بىز ۇيىم ەمەسپىز، قايىرىمدىلىق جۇمىستارىمەن اينالىساتىن توپپىز​" دەپ وزىنە تاعىلعان ايىپتى جوققا شىعاردى.

– اپتاسىنا ءبىر-ەكى رەت ارىزدانۋشىلاردىڭ ارىزىن اعىلشىن تىلىنە اۋدارىپ بەرەتىنمىن. كەيبىر ازاماتتاردىڭ ارىزىن جازۋعا كومەكتەستىم. بىراق بۇل ەڭبەگىم ءۇشىن ەشقانداي اقى المادىم. ەرىكتى تۇردە جۇمىس ىستەدىم. سوندىقتان ماعان تاعىلىپ وتىرعان ايىپتى مويىندامايمىن، – دەدى ول.

سەرىكجان ءبىلاشتىڭ قورعاۋشىسى شىنقۋات بايجانوۆ سوتتا ۇيىمنىڭ ەشقانداي ساياسي ماقساتى، جارعىسى بولماعانىن، تەك قىتايداعى از ۇلتتاردىڭ كورگەن قىسىمىن كوتەرىپ كەلگەنىن ايتتى.

– قايىرىمدىلىقپەن اينالىسىپ جۇرگەن توپ مۇشەلەرىنىڭ ۇستىنەن اكىمشىلىك-قۇقىق بۇزۋشىلىق تۋرالى حاتتاما زاڭسىز تولتىرىلعان. تاعىلعان ايىپ – نەگىزسىز. ەكىنشىدەن، ءىس 2019 جىلى قاراشا ايىندا قوزعالعان. ياعني، ءىس ەسكىرىپ كەتتى. سوندىقتان سەرىكجاننىڭ ۇستىنەن قوزعالعان ءىستى توقتاتىپ، ونى اقتاۋىڭىزدى سۇرايمىن، - دەدى شىنقۋات بايجانوۆ. وسىلايشا ادۆوكات "اكىمشىلىك قۇقىق بۇزىلعان كۇننەن بەرى ەكى اي ءوتىپ كەتسە، ازاماتتى اكىمشىلىك جاۋاپكەرشىلىككە تارتۋعا بولمايدى" دەگەن زاڭناما نورماسىنا سۇيەندى.

جاۋاپكەر مەن قورعاۋشىنىڭ ءسوزىن بولمەي تىڭداعان سۋديا بىردەن سوت شەشىمىن شىعاردى.

بۇعان دەيىن سوت تىركەلمەگەن "ناعىز اتاجۇرت" ۇيىمىنا جەتەكشىلىك جاساپ كەلگەن بەكزات ماقسۇتحانعا – 100 ايلىق ەسەپتىك كورسەتكىش (277 800 تەڭگە نەمەسە 664 دوللار), ۇيىمنىڭ ۆيدەووپەراتورى عالىم راحىجانعا – 50 ايلىق ەسەپتىك كورسەتكىش مولشەرىندە (138 900 تەڭگە نەمەسە 332 دوللار) ايىپپۇل سالعان بولاتىن.

"ناعىز اتاجۇرت" قوعامدىق ۇيىمى 2019 تامىز ايىنا دەيىن “اتاجۇرت ەرىكتىلەرى” دەگەن اتپەن شىڭجاڭداعى قازاقتار ماسەلەسىن كوتەرىپ، ولاردىڭ قۇقىعىن قورعاۋمەن اينالىسقان. 2019 جىلى ناۋرىزدا ونىڭ جەتەكشىسى سەرىكجان ءبىلاشتىڭ ۇستىنەن “ارازدىق قوزدىرۋ” بابى بويىنشا ءىس قوزعالىپ، قاماۋعا الىنعان. ارتىنشا ول بەس اي بويى ۇيقاماقتا بولدى. تامىزدا سوت وعان 280 دوللار كولەمىندە ايىپپۇل سالىپ، جەتى جىل قوعامدىق ۇيىمدى باسقارۋعا تىيىم سالدى. بۇل سوت ەل ىشىندە جانە حالىقارالىق قاۋىمداستىقتىڭ نازارىن اۋدارعان. قۇقىق قورعاۋشىلار “بيلىك ءبىلاشتى جاۋاپقا تارتۋ ارقىلى قىتاي قازاقتارىنىڭ ماسەلەسىن كوتەرىپ جۇرگەن بەلسەندىلەردىڭ جۇمىسىنا كەدەرگى كەلتىرىپ جاتىر” دەپ سىناعان.

2019 جىلى كۇزدە الماتى قالاسى ادىلەت دەپارتامەنتى “اتاجۇرت ەرىكتىلەرىن” تىركەگەن. ۇيىمعا ەربول داۋلەتبەكۇلى باسشى بولعان. وسىدان سوڭ ۇيىمداعى ءبىراز ادام بولىنىپ شىعىپ، “ناعىز اتاجۇرت ەرىكتىلەرى” ۇيىمىن قۇرعان.

شىڭجاڭداعى قازاقتار مەن ۇيعىرلاردىڭ قىسىم كورىپ، لاگەرگە قامالىپ جاتقانى تۋرالى العاشقى اقپارات 2017 جىلى كوكتەمدە تاراي باستاعان. بۇۇ مەن ادام قۇقىعىن قورعاۋ ۇيىمدارى قىتاي بيلىگى شىڭجاڭداعى ميلليونعا جۋىق ەتنيكالىق ۇيعىر مەن وزگە دە تۇركىتىلدەس ۇلت وكىلدەرىن ەلدىڭ سولتۇستىك-باتىسىنداعى "ساياسي تاربيە لاگەرلەرىندە" ۇستاپ وتىرعانى تۋرالى مالىمدەگەن.

باسىندا مۇنداي اقپاراتتى تەرىستەگەن پەكين كەيىن ونى "ەكسترەميزمگە قارسى شارا" دەپ تۇسىندىرگەن جانە ساياسي لاگەرلەردى ء"تىل ۇيرەنىپ، كاسىپكە باۋليتىن ورتالىقتار" دەپ اتاعان.

Abai.kz