قازاقستاندا ماسكا تاقپاعانى ءۇشىن ايىپپۇل سوماسى تومەندەتىلە مە؟
قر ادىلەت مينيسترلىگى ماسكا تاعۋ رەجيمىن بۇزعانى ءۇشىن ايىپپۇل سانكتسيالارىن تومەندەتۋ مۇمكىندىگى تۋرالى الەۋمەتتىك جەلىدەگى مالىمەتكە جاۋاپ بەردى.
«اكىمشىلىك قۇقىق بۇزۋشىلىق تۋرالى كودەكستىڭ 425-بابىندا كوزدەلگەن ماسكا كيۋ رەجيمىن بۇزعانى ءۇشىن قولدانىستاعى ايىپپۇل سانكتسيالارى ءوز كۇشىندە، مەملەكەتتىك ورگاندار ونىڭ مولشەرىن ازايتۋدى تالقىلاپ جاتقان جوق»، - دەلىنگەن ادىلەت مينيسترلىگىنىڭ حابارلاماسىندا.
ەسكە سالا كەتسەك، 30 شىلدەدەن باستاپ قازاقستاندىقتار كوشەدە ماسكا تاعىپ جۇرۋگە مىندەتتەلدى. بۇل تۋرالى ەلدىڭ باس سانيتارلىق مەملەكەتتىك دارىگەرى ايجان ەسماعامبەتوۆانىڭ قاۋلىسىندا ايتىلعان.
سونىمەن قاتار قر دەنساۋلىق ساقتاۋ ءمينيسترى الەكسەي تسوي ماسكانى قاي كەزدە تاقپاۋعا بولاتىندىعىن تۇسىندىرگەن ەدى.
دەرەككوز: قازاقپارات
Abai.kz
