بيىل ەلىمىزدە ۇلى عالىم، الەمنىڭ ەكىنشى ۇستازى ءابۋ ءناسىر ءال-ءفارابيدىڭ 1150 جىلدىق مەرەيتويىنا وراي ماڭىزدى شارالار ءوتىپ جاتىر. ءبارىمىز بىلەتىندەي مەملەكەت باسشىسى قاسىم-جومارت توقاەۆ ۇلى عۇلامانىڭ مەرەيتويىنا اسا ءمان بەرىپ، ءوزى تىكەلەي قولداۋ ءبىلدىرىپ وتىر. پرەزيدەنتتىڭ باستاماسىمەن بيىل جىل باسىنان بەرى ەلىمىزدىڭ تۇكپىر-تۇكپىرىندە ءىس-شارالار ءوتىپ جاتىر.

اتالعان ءىس-شارالاردىڭ ءبىر پاراسى عالىمنىڭ باعا جەتپەس مادەني مۇراسىن جيناپ، زەرتتەۋ بولسا، تاعى ءبىر پاراسى عۇلامانىڭ وسيەتىن بۇگىنگى وسكەلەڭ ۇرپاققا ۇعىندىرۋ، بولاشاق جاستارعا جەتكىزۋ بولىپ وتىر. بۇگىنگى كۇننىڭ تالابى عىلىم مەن ءبىلىمى دامىعان وركەنيەتتى ەل قۇرۋ بولىپ وتىر. سول ءۇشىن دە بۇرىنعىداي ويىن مەن توي قۋدان گورى عىلىم مەن ءبىلىمنىڭ سوڭىنا ءتۇسۋ كەزەك كۇتتىرمەيتىن ماسەلە. سول ءۇشىن دە ۇلى عالىم اتىنداعى مەملەكەتتىك سىيلىق تاعايىندالىپ وتىر.

سونىمەن قاتار ەلدىڭ عىلىمى مەن ءبىلىمىن دامىتۋ بارىسىندا تىنباي تەر توگىپ جۇرگەن عالىمداردى قولداۋ ماقساتىندا ءال-فارابي تانىداعى مەملەكەتتىك سىيلىق بەرۋ قولعا الىندى. وسى ارقىلى عىلىم-ءبىلىم سالاسىندا ەڭبەك ەتىپ جۇرگەن مامانداردى مەملەكەت تاراپىنان قولداۋ كوزدەلىپ وتىر.

جاقىندا مەملەكەتتىك حاتشى قىرىمبەك كوشەرباەۆ ءال-فارابي اتىنداعى عىلىم مەن تەحنيكا سالاسىنداعى قازاقستان رەسپۋبليكاسىنىڭ مەملەكەتتىك سىيلىعىن بەرۋ جونىندەگى كوميسسيانىڭ وتىرىسىن توراعالىق ەتىپ وتكىزدى.

اتالعان كوميسسيا ءال-فارابي اتىنداعى مەملەكەتتىك سىيلىقتى الۋعا ۇسىنىلعان التى جۇمىستى قاراپ، مەملەكەتتىك عىلىمي-تەحنيكالىق ساراپتامانىڭ ناتيجەلەرىمەن تانىستى. مۇندا كەلەسى ءۇش سەكتسيانىڭ ساراپتامالىق-تالدامالىق ۇسىنىستارىن قارادى. ولار:

- مەديتسينا عىلىمدارى بويىنشا;

- قوعامدىق-گۋمانيتارلىق عىلىمدار بويىنشا;

- جاراتىلىستانۋ عىلىمدارى جانە مەتاللۋرگيا بويىنشا.

مەملەكەتتىك حاتشىنىڭ توراعالىمەن وتكەن كوميسسيا وتىرىسىنىڭ قورىتىندىسى ساي مىناداي شەشىم قابىلداندى. ول بويىنشا، 2020 جىلعى ءال-فارابي اتىنداعى عىلىم مەن تەحنيكا سالاسىنداعى قازاقستان رەسپۋبليكاسى مەملەكەتتىك سىيلىعىن الۋعا ۇسىنىلعان ەڭبەكتەر الدىن-الا ىرىكتەۋدەن ءوتۋى كەرەك. سودان كەيىن وسى جۇمىستاردىڭ ناقتى ءتىزىمى بەكىتىلىپ، بۇقارالىق اقپارات قۇرالدارىندا جاريالاناتىن بولادى.

عىلىم سالاسىنداعى مەملەكەتتىك سىيلىقتى ءال-فارابي اتىمەن اتاۋ كەزدەيسوق تاڭدالعان جوق. وتىرار دالاسىنىڭ ۇلى پەرەزەنتى الەمدىك عىلىم مەن ءبىلىمنىڭ دامۋىنا وشپەس ۇلەس قوسقان تۇلعان. ءابۋ ءناسىر ءال-فارابي الەمدىك دەڭگەيدە عالامنىڭ ەكىنشى ۇستازى دەپ مويىندالعان. ەندەشە ءوزىمىزدىڭ ۇلى عالىم بابامىز اتىنداعى مەملەكەتتىك سىيلىق تاعايىنداپ، ونى عىلىم سالاسىندا جەتىستىككە جەتكەن ماماندارعا بەرۋ - وتە ورىندى شەشىم دەپ ەسەپتەيمىز.

Abai.kz