گەرمانيا پوليتسياسى اۋىر حالدەگى كرەمل سىنشىسى الەكسەي ناۆالنىيدى ەمدەپ جاتقان بەرليندەگى اۋرۋحانانىڭ كۇزەتىن كۇشەيتتى. ۋلاندى دەگەن كۇدىكپەن اۋرۋحاناعا ءتۇسىپ، ەس-ءتۇسسىز جاتقان الەكسەي ناۆالنىي 22 تامىز كۇنى ساناۆياتسيا ۇشاعىمەن سىبىردەگى ومبىدان گەرمانياعا ەۆاكۋاتسيالاندى.

ساياساتكەردى ەمدەۋگە كىرىسكەن «شاريتە» اۋرۋحاناسى ونىڭ دەنساۋلىعى جونىندەگى ەشقانداي مالىمدەمە جاسامادى. الايدا ناۆالنىيدىڭ ەۆاكۋاتسياسىن ۇيىمداستىرعان بەلسەندىلەر توبى ساياساتكەردىڭ دەنساۋلىعى «وتە ناشار» دەيدى.

الەۋمەتتىك جەلىلەردەگى سۋرەتتەر مەن جازبالار اۋرۋحانا سىرتىندا پوليتسەي سانى ارتقانىن كورسەتەدى.

رەسەي پرەزيدەنتى ۆلاديمير ءپۋتيننىڭ قارسىلاسى، جەمقورلىققا قارسى ناۋقان جۇرگىزگەن الەكسەي ناۆالنىي تومسكىدەن ماسكەۋگە بارا جاتقان ۇشاقتىڭ ىشىندە ەسىنەن تالىپ، ارتىنان كوماعا تۇسكەن. ناۆالنىي ۇشاققا وتىرماس بۇرىن تومسك اۋەجايىندا ءبىر كەسە قاراي شاي ىشكەن. ونىڭ جاقتاستارى سول شايعا ۋ قوسىلعان دەپ سانايدى.

Cinema for Peace Foundation ۇيىمى قامتاماسىز ەتكەن ساناۆياتسيا قىزمەتى 44 جاستاعى ساياساتكەردى بەرلينگە اپارىپ، «شاريتە» اۋرۋحاناسىنا جەتكىزدى.

اۋرۋحانا ناۆالنىيدىڭ دەنساۋلىعى جونىندەگى مالىمدەمەنى دياگنوستيكا اياقتالعاننان كەيىن جانە تۋىستارىمەن اقىلداسقان سوڭ جاريالايتىنىن ايتتى.

ومبى اۋرۋحاناسى باستاپقىدا ناۆالنىيدى بەرۋگە باس تارتتى. ولار مۇنى ناۋقاس جولدى كوتەرمەيدى دەپ ءتۇسىندىردى. بىراق ساياساتكەردىڭ تۋىستارى مەن جاقتاستارى بيلىككە جۇگىنىپ، اقىر سوڭىندا اۋرۋحانانىڭ رۇقساتىن الدى.

ناۆالنىيدىڭ ءباسپاسوز حاتشىسى كيرا يارمىش ومبى اۋرۋحاناسىنىڭ مالىمدەمەسىن جوققا شىعارىپ، ەۆاكۋاتسيا كەزىندە ساياساتكەردىڭ ءحالى تۇراقتى بولعانىن، بىراق رەسەيلىك دارىگەرلەردىڭ شەشىمىنەن ۋاقىت جوعالتقانىن ايتتى.

Abai.kz