ەۋروپالىق وداقتىڭ سىرتقى جانە سىرتقى قاۋىپسىزدىك ساياساتىنىڭ جوعارى وكىلى جوزەپ بوررەل الەكساندر لۋكاشەنكونىڭ سايلاۋداعى جەڭىسىن مويىندامايتىنىن مالىمدەدى. 

ول لۋكاشەنكومەن ديپلوماتيالىق بايلانىس جاساۋ ءۇشىن ديالوگ ورناتۋ قاجەت ەكەندىگىن ايتقان.

«ءبىز ونى مويىندامايمىز، بىراق ونىمەن ديالوگ ورناتۋىمىز كەرەك»، - دەدى بوررەل.

سونىمەن قاتار، ەۋروپالىق وداق وكىلى لۋكاشەنكونى زاڭسىز سايلانعان ۆەنەسۋەلا پرەزيدەنتى نيكولاس مادۋرومەن سالىستىرا سويلەگەن.

بۇعان دەيىن Abai.kz اكقپاراتتىق پورتالىندا لۋكاشەنكونىڭ سايلاۋداعى «جەڭىسىن» الەم ليدەرلەرى اراسىندا كىمدەردىڭ مويىنداپ، كىمدەردىڭ مويىنداماعانى تۋرالى ەگجەي-تەگجەيلى جازعان ەدىك. وندا بالتىق ەلدەرى مەن اقش، گەرمانيا، فرانتسيا، ۇلىبريتانيا سىندى مەملەكەتتەر لۋكاشەنكوعا قارسى حالىق نارازىلىعىن قولدايتىنى ايتىلعان.

سونىمەن قاتار، ەۋروپا كەڭەسىنىڭ توراعاسى شارل ميشەل:«بەلارۋستەگى سايلاۋ ءادىل ءارى ەركىن وتكەن جوق. بەيبىت شەرۋشىلەرگە كورسەتىلگەن كۇش ءبارىمىزدى تاڭقالدىردى جانە ول تالقىلاۋدى قاجەت ەتەدى. كىنالىلەر جازالانۋى ءتيىس. ەو سانكتسيا سالۋ ماسەلەسىن اقىلداسىپ جاتىر»، - دەگەن بولاتىن.

لۋكاشەنكونىڭ پرەزيدەنتتىگىن مويىندامايتىن ەۋروكوميسسيا توراعاسى مەن 8 مەملەكەت بىرلەسكەن مالىمدەمە جاساپ، بەلورۋستەگى سايلاۋدىڭ ەركىن ءارى ءادىل وتپەگەنىن مالىمدەگەن. ال، ەۋروپارلامەنت دەپۋتاتتارى لۋكاشەنكونى ەۋرووداقتاعى نون-گراتا تۇلعا دەپ تانيتىندارىن ايتقان.

الايدا، بەلارۋستەگى سايلاۋدىڭ رەسمي قورىتىندىسى شىعا سالىسىمەن بىرنەشە مەملەكەت باسشىلارى لۋكاشەنكونى قۇتتىقتاپ ۇلگەردى. ولاردىڭ قاتارىندا قازاقستان دا بار.

پرەزيدەنت توقاەۆ «قيىن ساياسي كەزەڭدە وتكەن پرەزيدەنتتىك سايلاۋدىڭ قورىتىندىسى – ءسىزدىڭ بەلارۋس ەگەمەندىگى مەن تاۋەلسىزدىگىن نىعايتۋ جولىنداعى ستراتەگيالىق باعىتىڭىزعا دەگەن حالىقتىڭ قولداۋىن كورسەتىپ وتىر»، - دەپ جازعان.

ودان بولەك، قىتاي، رەسەي، وزبەكستان، قىرعىزستان، مولدوۆا، ءازىربايجان، تاجىكستان سىندى مەملەكەت باسشىلارى لۋكاشەنكونى قايتا پرەزيدەنت بولۋىمەن قۇتتىقتادى.

دەگەنمەن، دەموكراتيالىق قوعامنىڭ سىنىنا ۇشىراعان بەلارۋس بيلىگىنە قاتىستى قازاقستان ءالى ناقتى پوزيتسيا بىلدىرگەن جوق. تەك حالىق نارازىلىعىنا قاتىستى وداقتاستار كۇشىن قولدانۋ تۋرالى قر سىرتقى ىستەر مينيسترلىگى پىكىر بىلدىرگەن

«بارلىعى ءبىزدىڭ مىندەتتەمەلەرىمىزدىڭ اياسىندا بولادى. ەگەر ول سايكەس كەلسە، تيىسىنشە قاراستىرىلادى. ەگەر بۇل ءبىزدىڭ مۇددەلەرىمىزگە سايكەس كەلمەسە، قازاقستاننىڭ ۇلتتىق مۇددەلەرىنە سايكەس كەلەتىن شەشىم قابىلدانادى. ءبىز قاراپ، شەشىم قابىلدايمىز. ءبىز تالداۋ جۇرگىزەمىز» دەپتى.

بۇگىندە بەلورۋستەگى حالىق نارازىلىعى كۇن سايىن كۇشەيىپ كەلە جاتىر. ماسەلەن، كەشە مينسكتە بولعان ميتينگكە 200 مىڭنان اسا ادام شىققان. بۇعان دەيىن ەو ليدەرلەرى لۋكاشەنكونى حالىققا قارسى كۇش قولدانۋدى توقتاتۋعا شاقىرعان. ولاي بولماعان جاعدايدا بەلورۋسكە قارسى سانكتسيالار سالىناتىنىن ەسكەرتكەن ەدى. الايدا، لۋكاشەنكو بۇگىن مينسكتەگى حالىق نارازىلىعىنا قارۋ اسىنىپ كەلدى.

ال ونىڭ سايلاۋداعى باستى وپپونەنتى بولعان سۆەتلانا تيحانوۆسكايا انتي-لۋكاشەنكو شەرۋلەرىن توقتاتپاۋعا ۇندەگەن.

Abai.kz