بولاشاق جۋرناليستەر اراسىندا «ءۇمىت» شىعارماشىلىق بايقاۋى وتكىزىلەدى. بۇل تۋرالى بۇگىن مەديا سالاسىنىڭ ماماندارىن دايىندايتىن جوعارى وقۋ ورىندارىنىڭ رەكتورلارىمەن كەزدەسكەن قر اقپارات جانە قوعامدىق دامۋ ءمينيسترى ايدا بالاەۆا ايتتى.

«سونىمەن قاتار جوعارى وقۋ ورىندارىنداعى جاس مامانداردى ناقتى سالا، اتاپ ايتقاندا، اۋىل شارۋاشىلىعى، ەكونوميكا، قارجى، مەديتسينا، ەكولوگيا سالالارى جانە باسقا دا باعىتتار بويىنشا دايىنداۋ ىسىنە كوپ سىن ايتىلادى. بۇل ورايدا مينيسترلىك مەديا سالا ماماندارىن دايىنداۋ، قايتا دايارلاۋ جانە بىلىكتىلىگىن ارتتىرۋ بويىنشا ارنايى جوبا ازىرلەپ وتىر. مۇنان بولەك ءبىلىم بەرۋ جۇيەسىنىڭ ءبىلىم بەرۋ دەڭگەيى مەن تيىمدىلىگىن ارتتىرۋ ءۇشىن جىل سايىن ستۋدەنتتەر اراسىندا «ءۇمىت» شىعارماشىلىق بايقاۋىن وتكىزۋ جوسپارلانىپ وتىر»، - دەدى ايدا بالاەۆا.

ونىڭ اتاپ وتۋىنشە، مەديا ساۋاتتىلىق ماسەلەسى دە بۇگىنگى كۇننىڭ كوكەيتەستى ماسەلەسىنە اينالعان.

«سەبەبى بۇگىنگى ينتەرنەت زامانى، ءتۇرلى الەۋمەتتىك جەلىلەر كوپتەگەن جالعان اقپاراتتىڭ، زەرتتەلمەگەن تاقىرىپتىڭ تارالۋىنا سەبەپ بولىپ جاتادى. وسى ورايدا ەلىمىزدەگى جوعارعى وقۋ ورىندارىندا جۋرناليستيكا فاكۋلتەتىندە «مەديا جانە اقپاراتتىق ساۋاتتىلىق» ءپانىن ەنگىزۋدى ۇسىنامىن. ءباسپاسوز قوعامنىڭ ايناسى بولسا، جۋرناليست سول قوعامعا اقپاراتتى جەتىزەتىن تۇلعا. سوندىقتان قوعامنىڭ مادەنيەتىن كوتەرىپ، تالعامىن قالىپتاستىرۋ، ساۋاتىن ارتتىرۋ تىلشىلەر قاۋىمىنا ارتىلاتىن سەنىم مەن مىندەت دەسەك ارتىق ايتقانىم ەمەس. وسى ورايدا ءبىز ءبىر كەلىسىمگە كەلىپ، وڭ ناتيجەلەرگە قول جەتكىزۋگە، بىرگە قىزمەت ەتۋگە الداعى ۋاقىتتا دا دايىندىز»، - دەدى مينيستر.

Abai.kz