سيندزو ابە ۇكىمەتى وليمپيادا ويىندارىن كەلەسى جىلى وتكىزۋدى كوزدەپ وتىر. وليمپيادانىڭ بيىل وتۋىنە كوروناۆيرۋس پاندەمياسى كەدەرگى جاسادى.
پرەمەر-مينيستر سيندزو ابە ويىنداردىڭ كومەگىمەن 2021 جىلى توكيوعا مىڭداعان سپورتشى مەن جانكۇيەر جيناعىسى كەلەدى. بيلىك پاندەميا كەزىندە تۋريزم ارقىلى ەلدىڭ ىشكى جالپى ءونىمىن ارتتىرۋدى كوزدەپ وتىر. پاندەميا كەزىندە ءىجو 30 پايىز قىسقارعان.
- ءتۇرلى كومپانيالار جىل سوڭىنان كەلەسى جىلدىڭ ناۋرىزىنا دەيىن ءتۇرلى ۆاكتسينا دايىنداپ شىعارۋى مۇمكىن. بىراق ءبىز وليمپيادا ويىندارىن وتكىزگىمىز كەلەدى، - دەدى ۇكىمەتتىڭ باس حاتشىسى يوسيحيدە سۋگا.
وليمپيادا ويىندارىن وتكىزۋگە پاندەميا جاعدايىندا لوگيستيكا ماسەلەسى كەدەرگى كەلتىرۋى مۇمكىن، ويتكەنى مىڭداعان ادام ويىندارعا قاتىسۋعا جانە جاتتىعۋعا كەلەدى.
دەگەنمەن جاپونيا ۇكىمەتى تۇرعىنداردىڭ 140-تان استام ەلگە ساياحاتتاۋىنا تىيىم سالىپ وتىر.
Abai.kz
