مەملەكەت باسشىسى قاسىم-جومارت توقاەۆتىڭ قر كونستيتۋتسياسى كۇنىمەن قۇتتىقتاۋى.

قۇرمەتتى وتانداستار!

بارشاڭىزدى قازاقستان رەسپۋبليكاسىنىڭ كونستيتۋتسياسى كۇنىمەن قۇتتىقتايمىن!

وسىدان 25 جىل بۇرىن تۇڭعىش پرەزيدەنتىمىز – ەلباسى نۇرسۇلتان ءابىشۇلى نازارباەۆتىڭ باستاماسىمەن قازىرگى اتا زاڭىمىز قابىلداندى. بۇل قادام تەرەڭنەن تامىر تارتاتىن مەملەكەتتىگىمىزدى تىڭ ورىسكە باستاپ، قازاقستان رەسپۋبليكاسىنىڭ كۇردەلى گەوساياسي جاعدايداعى دامۋىنىڭ داڭعىل جولىن ايقىندادى.

كونستيتۋتسيامىزدا بەلگىلەنگەن ادام قۇقىعى مەن بوستاندىعى، ساياسي جانە الەۋمەتتىك-ەكونوميكالىق قۇرىلىم قاعيداتتارى ادىلەتتى قوعام مەن قۋاتتى مەملەكەتتىڭ اينىماس تۇعىرىنا اينالدى.

حالىق بيلىگى، تەڭدىك، بىرلىك، زاڭ ۇستەمدىگى سياقتى قاستەرلى ۇستانىمدار مىزعىماس ۇستىن رەتىندە قالىپتاسىپ، قازاقستاننىڭ كەلەشەكتەگى جان-جاقتى دامۋ باعدارىنىڭ مازمۇنىن ايشىقتاي ءتۇستى.

اتا زاڭىمىز ۋاقىت رۋحىنا جانە ازاماتتارىمىزدىڭ تالاپ-تىلەگىنە ساي كەلەدى. سونداي-اق، ونىڭ جاسامپازدىق الەۋەتى ساياسي جۇيە مەن الەۋمەتتىك-ەكونوميكالىق قاتىناستاردى ودان ءارى جەتىلدىرۋگە باعىتتالعان.

ءبىز مەملەكەتتىڭ بەرىك كونستيتۋتسيالىق نەگىزىنە سۇيەنە وتىرىپ، ەلدەگى كەلىسىم مەن ساياسي تۇراقتىلىقتى ساقتايمىز جانە ازاماتتىق قوعاممەن سىندارلى بايلانىستى جالعاستىرا بەرەمىز. قازىرگى قيىندىقتاردى بىرگە ەڭسەرىپ، كوزدەگەن ماقساتىمىزعا جەتەتىنىمىزگە سەنىمىم مول.

ەلىمىزگە اماندىق، جۇرتىمىزعا ىنتىماق پەن باق-بەرەكە تىلەيمىن!

Abai.kz