قاسىم-جومارت توقاەۆقا ءماجىلىس دەپۋتاتتارىنىڭ بەسىنشى سەسسياداعى جۇمىس ناتيجەلەرى مەن ايماقتارعا ساپارلارى، سونداي-اق، الداعى پارلامەنتتىك سەسسيا جۇمىسىنىڭ نەگىزگى باعىتتارى تۋرالى اقپارات بەرىلدى.

ءماجىلىس توراعاسىنىڭ ايتۋىنشا، دەپۋتاتتار دارىحانالارعا، اۋرۋحانالارعا ارنايى بارىپ، ءدارى-دارمەكتەردىڭ قورىن تەكسەرىپ، ونىڭ باعاسىن باقىلادى. سونداي-اق دەپۋتاتتار ەرىكتىلەر ورتالىقتارىنىڭ جۇمىسىنا دا بەلسەندى اتسالىسۋدا.

قازىرگى ۋاقىتتا پالاتانىڭ زاڭنامالىق قورجىنىندا 75 زاڭ جوباسى بار، ونىڭ 22-نە دەپۋتاتتار باستاماشى بولعان. نۇرلان نىعماتۋليننىڭ ايتۋىنشا، ولاردىڭ قاتارىندا 2021-2023 جىلدارعا ارنالعان رەسپۋبليكالىق بيۋدجەت جوباسى، پاندەميادان كەيىنگى كەزەڭدەگى ەكونوميكالىق ءوسىمدى ودان ءارى قالپىنا كەلتىرۋگە، ازاماتتاردىڭ جەكەلەگەن ساناتتارىن الەۋمەتتىك قورعاۋعا جانە ت.ب. سالالارعا باعىتتالعان زاڭ جوبالارى بار.

مەملەكەت باسشىسى دەپۋتاتتىق كورپۋس ءوز جۇمىسىندا پرەزيدەنت جولداۋى مەن باسقا دا باستامالاردى ىسكە اسىرۋدى زاڭنامالىق تۇرعىدان قامتاماسىز ەتۋگە، ونىڭ ىشىندە، سىبايلاس جەمقورلىققا قارسى ءىس-قيمىلعا باسىمدىق بەرۋى كەرەك ەكەنىن ايتتى.

Abai.kz