رەسەيدەگى كۇشتىك قۇرىلىمدار رەزەرۆى قازاقستانعا دا كەلە مە؟
كۇنى كەشە پۋتين مىرزا مىناداي ءبىر وي ايتىپ قالدى: «ءبىز رەسەيدە قۇقىق قورعاۋ كۇشتەرىنىڭ ءتيىستى رەزەرۆىن جاساقتاپ قويدىق. ونى ءبىز بەلارۋستەگى جاعداي باقىلاۋدان شىعىپ جاتسا، ەكسترەميستىك كۇشتەرگە قارسى قولداناتىن بولامىز».
باسقا ەلدىڭ ىشكى ىستەرىنە قول سۇعۋشىلىق ەمەي بۇل نە ەندى؟!
ماسەلەنىڭ ەكى جاعى بار.
بىرىنشىدەن، پۋتين «كومەك تۋرالى لۋكاشەنكونىڭ ءوزى ءوتىندى» دەگەن سىڭايدا ءسوز ايتىپ قالدى.
ول دەگەنىڭىز – كەشە عانا رەسەيگە قارسى ءارتۇرلى دەمارش جاساپ جۇرگەن باتكانىڭ ءوزىنىڭ تاق مۇددەسى ءۇشىن ءوز ەلىنىڭ تاۋەلسىزدىگىن تارك ەتۋگە دايىن دەگەن ءسوز (ول تۋرالى وتكەندە وسى جەردە جازعانمىن)!
بۇدان ارتىق وپاسىزدىق بار ما؟!
ەكىنشىدەن، كرەمل قوجايىنى قازاقتىڭ «قىزىم، ساعان ايتام، كەلىنىم، سەن تىڭدا» دەگەن ءسوزىن قايتالاپ وتىرعان سياقتى. سەبەبى بۇل دەگەنىڭىز - رەسەيمەن ستراتەگيالىق دوستىعى بار، ەاەو مەن ودكب سەكىلدى ءبىر-بىرىنە اسكەري كومەك بەرۋگە مىندەتتى وداقتارعا مۇشە ەلدەردىڭ قۇلاعىنا التىن سىرعا مەن تىرپ ەتكىزبەي تاستايتىن شىنجىر!
الدا پارلامەنت سايلاۋى كەلە جاتىر.
«نۇروتانننىڭ» ەلەكتوراتتىق جاعدايى بەسەنەدەن بەلگىلى.
دەموكراتيالىق كۇشتەر بۇل سايلاۋعا قاتىسا الا ما؟
قاتىسسا، «نۇروتانعا» جويقىن سوققى بەرىپ جاتسا، ءبىزدىڭ بيلىك لۋكاشەنكو سەكىلدى «مۇنىڭ ءبارىن باتىس ۇيىمداستىرىپ وتىر» دەپ، ءوز بيلىگىن ساقتاپ قالۋ ءۇشىن رەسەيگە جۇگىنە مە؟ بەلارۋسكە ارنالعان رەزەرۆ قازاقستانعا قاراي بەت الا ما؟ ءوز ىشىمىزدەگى سەپاراتيستىك پيعىلدى كۇشتەر كورشى ەلدىڭ ايتاعىنا ەرىپ كەتپەي مە؟
ءوز باسىم بۇل ساۋالعا ناقتى جاۋاپ بەرۋگە ازىرشە دايىن ەمەسپىن.
ءامىرجان قوساننىڭ جازباسى
Abai.kz
