ەلىمىزدە مەملەكەت باسشىسى قاسىم-جومارت كەمەلۇلى توقاەۆتىڭ شەشىمىمەن 2020 جىل ەرىكتىلەر جىلى بولىپ بەكىتىلگەن بولاتىن. وسىدان سوڭ، رەسپۋبليكانىڭ تۇكپىر-تۇكپىرىندە ەرىكتى جاستار ەل يگىلىگى ءۇشىن ەڭبەككە ارالاسا باستادى. ال، ولاردىڭ كوشباسىندا نۇروتان پارتياسى مەن ونىڭ جانىنداعى جاس وتان جاستار قاناتىنىڭ ەرىكتىلەرى اتقارعان ەڭبەك ولشەۋسىز.

ماسەلەن، بارشا الەمدى الاڭداتقان پاندەميا كەزىندە جاسوتان جاستار قاناتى رەسپۋبليكا بويىنشا ەڭ العاش بولىپ BizBirgemiz اكتسياسىن باستاعان بولاتىن. اتالعان اكتسيانىڭ ماقساتى – حالىقتىڭ الەۋمەتتىك وسال توپتارىنا اتاۋلى كومەك كورسەتۋ.

وسى باعىتتا جۇمىسىن باستاعان اكتسياعا قاتىسۋشىلار ءۇش ايدا ەلىمىزدەگى ەڭ ءىرى ءۇش مەگاپوليستە (نۇر-سۇلتان، شىمكەنت، الماتى) 100 مىڭ جانۇياعا 5 ميلليون ماسكا تاراتقان. ال، جالپى رەسپۋبليكا بويىنشا 300 مىڭنان استام وتباسىنا گيگيەنالىق جابدىقتار مەن ازىق-تۇلىك سەبەتتەرى تاراتىلىپتى. ودان بولەك، جاس وتان جاستارى ءۇش مىڭعا جۋىق قاريالاردى توتەنشە جاعداي رەجيمىندە ىستىق تاماقپەن قامتاماسىز ەتكەن. مۇنداي يگىلىكتى ىسكە بەس مىڭنان استام ەرىكتىلەر مەن بەلسەندىلەر جۇمىلدىرىلعان.

ال، وسى ايدا دا پارتيا بەلسەندىلەرى يگىلىكتى ىستەردىڭ باسى-قاسىندا بولدى. ماسەلەن، جاسوتان جاستار قاناتىنىڭ الماتى وبلىستىق فيليالىنىڭ وكىلدەرى كوروناۆيرۋس ىندەتىمەن بەتپە-بەت كۇرەسىپ جۇرگەن اق حالاتتى ابزال جانداردىڭ قۇرمەتىنە “دارىگەرلەرگە مىڭ العىس” اكتسياسىن ۇيىمداستىرىپ، “العىس جاشىگىن” قويدى.

بۇل سالتاناتتى شارانىڭ اشىلۋ ءراسىمى تالدىقورعان قالاسىنداعى اربات ورتالىق دەمالىس الاڭىندا وتكەن. كارانتين كەزىندە بارلىق الەۋمەتتىك قاشىقتىق پەن سانيتارلىق-ەپيدەميولوگيالىق نورمالاردى ساقتاي وتىرىپ وتكىزىلگەن بۇل شارانى قولداۋشىتسلار كوپ بولدى.

ال، اتالعان شارانىڭ ماقساتى قاراپايىم حالىقتىڭ دارىگەرلەرگە دەگەن ىستىق ىقىلاسىن جەتكىزۋ. ول ءۇشىن جاسوتاندىق بەلسەندىلەردىڭ قولىنداعى ۇسىنىس جاشىككە كەز-كەلگەن تۇرعىن العىسى مەن ۇسىنىستارىن جازىپ بەرەدى. ال، پارتيا بەلسەندىلەرى ءار جازىلعان ىستىق ىقىلاستى حاتتاردى اق حالاتتى ابزال جاندارعا تابىستاماق.

ودان بولەك پارتيا ەرىكتىلەرى مەن بەلسەندىلەرى الدا كەلە جاتقان جاڭا وقۋ جىلىنا دا دايىندىقتى باستاپ كەتكەن. جىل سايىن وتكىزىلەتىن “مەكتەپكە جول” اتتى اكتسيا بيىل دا پارتيا ەرىكتىلەرى مەن بەلسەندىلەرىنىڭ نازارىنان تىس قالماعان. ماسەلەن، جاس وتان جاستار قاناتىنىڭ شىعىس قازاقستان وبلىستىق فيليالى مەكتەپكە جول اكتسياسى اياسىندا ايماقتاعى وقۋشىلارعا مەنكتەپكە قاجەتتى وقۋ قۇرالدارىمەن قامتاماسىز ەتۋدى باستاعان. وبلىس ورتالىعىندا ءبىرىنشى سىنىپقا باراتىن ون ءبۇلدىرشىن وقۋ جىلىنا قاجەتتى قۇرالدار سالىنعان سومكەلەر جيىنتىعىن الدى.

ايماقتاعى نۇروتان پارتياسى فيليالىنىڭ عيماراتى ماڭىندا بارلىق الەۋمەتتىك قاشىقتىق پەن سانيتارلىق-ەپيدەميولوگيالىق نورمالاردى ساقتاي وتىرىپ وتكەن بۇل شارا مەكتەپ تابالدىرىعىن ەندى اتتاعان بۇلدىرشىندەر مەن ولاردىڭ اتا-انالارىنا پارتيانىڭ بەلسەندىلەرى مەن ەرىكتىلەرى تاراپىنان جاڭا وقۋ جىلىمەن قۇتتىقتاۋ بولىپ تابىلادى.

سونىمەن قاتار جاڭا وقۋ جىلى قارساڭىنداعى مۇنداي اكتسيا باتىس قازاقستان وبلىسىندا دا باستاۋ العان. ماسەلەن، 21 تامىز كۇنى نۇروتان پارتياسىنىڭ جانىنداعى جاسوتان جاستار قاناتىنىڭ باتىس قازاقستان وبلىستىق فيليالى ارنايى دەمەۋشىلەردىڭ قولداۋىمەن كوپ بالالى جانە از قامتىلعان وتباسىلاردىڭ ءبىرىنشى سىنىپقا باراتىن بۇلدىرشىندەرىنە جاڭا وقۋ جىلىنا قاجەتتى وقۋ قۇرالدارى مەن سومكەلەر تابىستادى.

بۇل وڭىردەگى مەكتەپكە جول اكتسياسى ءارى قاراي وبلىستىڭ 12 اۋدانىندا جالعاسىپ، بارلىعى 100 دەن استام بالا وقۋ قۇرالدارىمەن قامتاماسىز ەتىلىپتى.

ودان بولەك پارتيا بەلسەندىلەرى نۇر-سۇلتان قالاسىنداعى بالالاردىڭ دا جاڭا وقۋ جىلىنداعى قادامدارىنا ساتىلىك تىلەپ، ءوز كومەكتەرىن كورسەتتى.

ءبىز بۇعان دەيىن مەملەكەت باسشىسىنىڭ 2020 جىلدى ەرىكتىلەر جىلى دەپ جاريالاعانى تۋرالى ايتتىق. مۇنىڭ ماڭىزى مەن ءمانى كۇن وتكەن سايىن ارتىپ كەلەدى. ەل پرەزيدەنتى قاسىم-جومارت توقاەۆ ەركىتىلەر جىلى دەگەندى ناۋقانشىلدىققا اينالدىرماي، ەل حالىققا شىن مانىندە كومەكتەسۋ كەرەكتىگىن باسا ايتقان بولاتىن. سەبەبى، بۇگىنگى تاڭدا ەلىمىوزدىڭ ءوسىپ وركەندەۋى جولىندا ەرىكتىلەردىڭ دە ءوز ۇلەسى بار ەكەنى اقيقات.

ماسەلەن پرەزيدەنت ءوز سوزىندە: “ەرىكتىلەر جىلى كەزەكتى ناۋقان ەمەس. ءبىز وعان ەرەكشە ءمان بەرەمىز. مەن ەلىمىزدىڭ ءار وڭىرىندە ۆولونتەر بولۋعا نيەتتى وتانداستارىمىزدىڭ كوپ ەكەنىنە سەنەمىن. ال، ولارعا قولداۋ كورسەتۋ ءۇشىن ۇكىمەت ناقتى شارالاردى قابىلدايتىن بولادى”،- دەگەن بولاتىن.

سونىمەن قاتار، پرەزيدەنت ەرىكتىلىك حالقىمىزدىڭ ءومىر سالتىنا اينالۋى كەرەكتىگىن دە باسا ايتقان.

“ەرىكتى بولۋدى وتانىمىزدىڭ بۇگىنگى جانە بولاشاق سيپاتى رەتىندە قاراستىرۋعا بولادى. وسىنى دارىپتەۋ قاجەت. ەرىكتىلەردىڭ ءاربىر ارەكەتى ءار ازاماتقا كۇش قۋات بەرىپ، ىنتالاندىرۋى ءتيىس. مەن ەلىمىزدەگى ءار اۋىل ايماق وسىنداي يگىلىكتى ىستەن شەت قالمايدى دەپ سەنەمىن. بۇل ءبىرىنشى كەزەكتە زور جاۋاپكەرشىلىك پەن وركەنيەتتى ەلدىڭ بەلگىسى” دەگەن بولاتىن.

ايتا كەتەيىك، الەم بويىنشا 1 ميللياردقا جۋىق ادام ەرىكتى بولىپ تابىلادى. سونداي-اق الەمدىك ىشكى جالپى ءونىمنىڭ 2,5 پايىزى ەرىكتىلەر ەڭبەگىنىڭ ناتيجەسى ەكەن. ال، قازاقستانداعى ەرىكتىلەردىڭ جالپى سانى 16 مىڭنىڭ  توڭىرەگىندە. پرەزيدەنت بۇل كورسەتكىشتى 100 مىڭعا دەيىن كوتەرۋ كەرەك دەپ ەسەپتەيدى. سەبەبى ەرىكتىلەردىڭ قوعامعا تيگىزەتىن پايداسى ۇشان تەڭىز.

Abai.kz