بۇگىندە الەمدە ەرىكتىلەرگە دەگەن سۇرانىس كۇن سايىن ارتىپ كەلەدى. قازاقستان دا ەرىكتىلەر جۇمىسىنىڭ ءمان-ماڭىزىن ۇعىنا وتىرىپ، 2020 جىلدى مەملەكەت باسشىسىنىڭ شەشىمىمەن ەرىكتىلەر جىلى دەپ جاريالادى. ال، بۇگىندە سول ەرىكتى ازاماتتار قوعام دامۋىنا ايتارلىقتاي ۇلەس قوسىپ كەلەدى.

ماسەلەن، كۇنى كەشە نۇر-سۇلتان قالاسىنداعى قازاقستان حالقى اسسامبلەياسىمەن ۇلتتىق ەرىكتىلەر جەلىسى بىرلەسە وتىرىپ، جاڭا وقۋ جىلىنىڭ قارساڭىندا “مەكتەپكە جول” جانە ء“بىز بىرگەمىز” قايىرىمدىلىق اكتسيالارىن وتكىزدى.

اتالعان اكتسيانىڭ ماقساتى – كوپ بالالى وتباسىلار مەن از قامتىلعان جانۇيالارعا، اتا-انانىڭ قامقورلىعىنسىز قالعان بالالارعا سونىمەن قاتار جاڭا وقۋ جىلىنا دايىندىق بويىنشا كومەككە مۇقتاج بالالارعا الەۋمەتتىك قولداۋ كورسەتۋ.

بۇل يگىلىكتى ىسكە نۇر-سۇلتان قالاسىنىڭ ەرىكتىلەرى مەن كاسىپكەرلەر، اتىمتاي جومارت ازاماتتار مەن قازاقستان حالقى اسسامبلەياسىنىڭ بەلسەندىلەرى قاتىسقان. ولار 30-عا جۋىق وتباسىنا ازىق-تۇلىك جيىنتىقتارى مەن مەكتەپ قۇرالدارىن الىپ بەرگەن.

ايتا كەتەيىك، ەلىمىزدە مۇنداي قايىرىمدىلىق شارالارى جىل سايىنعى جاڭا وقۋى جىلىندا ۇيىمداستىرىلد. سونداي قايىرىمدىلىق شارالاردىڭ ءبىرى جۋىردا قازاقستان مۇسىلماندارى ءدىني باسقارماسى ۇيىمداستىرعان “مەكتەپكە جول” اكتسياسى. ول ەلورداداعى “ازىرەت سۇلتان” مەشىتىندە وتكەن.
نۇر-سۇلتان قالالىق مەشىتتەرىنىڭ بىرلەسە ۇيىمداستىرۋىمەن سونىمەن قاتار دەمەۋشى جانداردىڭ قولداۋى ارقاسىندا اتالعان مەشىتتە مەكتەپكە جول اكتسياسى اياسىندا 238 مۇقتاج جانۇياعا كومەك كورسەتىلگەن. اتالعان كومەك اياسىندا وقۋشىلاردىڭ ونلاين ءبىلىم الۋىنا قاجەتتى سمارتفوندار مەن پلانشەتتەر، وقۋ قۇرالدارى مەن مەكتەپ سومكەلەرى تابىلستالعان.
بۇل قايىرىمدىلىق شاراسىنا باس ءمۇفتيدىڭ كەڭەسشىسى بالتاباي مەكەجان، ەلورداداعى قالالىق اكىمدىكتىڭ ءدىن ىستەرى باسقارماسىنىڭ باسشىسى نۇرداۋلەت ءالمۇحانوۆ سونىمەن نۇر-سۇلتان قالالىق اكىمدىگىنىڭ جاستار ءىسى باسقارماسىنىڭ باسشىسى داۋلەت كارىبەكتەر قاتىستى.

اتالعان شارا بارىسىندا بارلىق سانيتارلىق-ەپيدەميولوگيالىق تالاپتار قاتاڭ ساقتالا وتىرىپ، سانى شەكتەۋلى وتباسىلار قاتىسقان. ال، اكتسيانىڭ قالعان قاتىسۋشىلارى نۇر-سۇلتنا قالاسىنداعى مەشىتتەردىڭ جاماعاتىنان قۇرالعان ەرىكتىلەر توبى. ولار اتالعان زاتتاردى مۇقتاج جانۇيالاردىڭ وتباسىنا جەتكىزىپ بەردى.

ايتا كەتەيىك، مۇنداي قايىرىمدىلىق اكتسياسى قاراعاندى وبلىسىنىڭ جەزقازعان قالالىق مەشىتىندە دە ۇيىمداستىرىلعان. يگىلىكتى شارا بارىسىندا ەرىكتىلەر كومەگىمەن كومەككە مۇقتاج 30 وتباسىنا الەۋمەتتىك جاردەم بەرىلىپ، سول وتباسىلاردىڭ وقۋشىلارىنا مەكتەپكە قاجەتتى وقۋ قۇرالدارى سىيعا بەرىلگەن.

بۇل قايىرىمدىلىق شاراسىنان “جۋسان” وپەراتسياسىمەن ەلگە ورالعان وتباسىلار دا تىس قالماعان. اتالعان وتباسىلاردا مەكتەپ جاسىنداعى 3 بالاعا مەكتەپكە قاجەتتى وقۋ قۇرالدارى تاراتىلىپ، وقۋ قۇرالدارى بەرىلگەن. ال، اكتسياعا كەلە الماعان وتباسىلارعا ەرىكتىلەردىڭ كومەگىمەن مەكتەپ زاتتارى ۇيلەرىنە جەتكىزىلىپ بەرىلگەن.

ال، اقتاۋ قالاسىندا وتكەن قايىرىمدىلىق شاراسىندا تۇرمىسى تومەن 1-7 سىنىپتاردا وقيتىن 140 بالاعا مەكتەپكە قاجەتتى وقۋ-قۇرالدارى تابىس ەتىلىپتى. مەشىت تىزىمىندە تۇراتىن وتباسىلاردىڭ بالالارىنا جاسالعان بۇل شارانى اقتاۋ قالالىق بەكەت اتا مەشىتى ۇيىمداستىرعان.

شارا بارىسىندا 140 بالاعا ءتۇرلى ءتۇستى بوياۋلار، دىپتەر-قالام، سومكە الىنىپ، سانيتارلىق-ەپيدەميولوگيالىق تالاپتارعا ساي تاراتىلىپ بەرىلگەن. بۇل اكتسياعا كوبىنە كوپبالالى وتباسىلاردىڭ بالالارى مەن از قامتىلعان وتباسىلارعا جاناشىرلىق جاسالعان. اتالعان اكتسيانىڭ ماقساتى – الەۋمەيتتىك از قامتىلعان وتباسىلاردىڭ بالالارىنا قامقور بولىپ، بىلىمگە قۇشتار ورەندەرگە قۋانىش سىيلاۋ.

ال، اقتاۋ قالالىق مەشىتىندە بەس جۇزدەن استام تۇرمىس جاعدايى تومەن وتباسىلار تىركەۋدە تۇر.

ايتا كەتەيىك، اتالعان قايىرىمدىلىق شارالارىنىڭ بارلىعى دا ەرىكتىلەردىڭ قاتىسۋىمەن جۇزەگە اسىرىلۋدا. بۇگىندە ەلىمىز بويىنشا، 16 مىڭنان استام ەرىكتى ازاماتتار بار. الايدا قوعام يگىلىگى ءۇشىن ەڭبەك اتقارىپ جاتقان مۇنداي ازاماتيتاردىڭ سانى الداعى ۋاقىتتا ءالى دە ارتا ءتۇسۋى ءتيىس. ال، وعان مەملەكەت باسشىسى قولداۋ كورسەتەتىنىن جانە ۇكىمەت بۇل باعىتتا ناقتى شارالار قابىلدايتىنىن دا ايتقان بولاتىن.

Abai.kz