مەملەكەت باسشىسى قاسىم-جومارت توقاەۆ زەينەتاقى جيناعىنىڭ ءبىر بولىگىن تۇرعىن ءۇي جاعدايىن جاقسارتۋعا نەمەسە ەمدەلۋگە پايدالانۋ شاراسىن قاراستىرۋدى تاپسىرعاندا، قۋانباعان جان از شىعار.

بىراق، بۇگىن ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆتىڭ تۇسىنىكتەمەسىنەن كەيىن، كوپشىلىكتىڭ سول قۋانىشى سۋ سەپكەندەي باسىلدى!

ويتكەنى، ازاماتتاردىڭ زەينەتاقى قورىندا قاراجاتتىڭ «جەتكىلىكتىلىك شەگى» دەپ اتالاتىن تومەندەگىدەي سوما بولۋ كەرەك ەكەن.

30 جاس ءۇشىن – 2 ملن. 518 مىڭ تەڭگە;

35 جاس ءۇشىن – 2 ملن. 961 مىڭ تەڭگە;

40 جاس ءۇشىن – 3 ملن. 437 مىڭ تەڭگە;

45 جاس ءۇشىن – 3 ملن. 947 مىڭ تەڭگە;

50 جاس ءۇشىن – 4 ملن. 495 مىڭ تەڭگە;

55 جاس ءۇشىن – 5 ملن. 084 مىڭ تەڭگە;

59 جانە ودان ۇلكەن جاس ءۇشىن – 5 ملن. 586 مىڭ تەڭگە.

ال، سولاي-اق بولسىن دەيىك!

سوندا، 30 جاستاعى جاس مامان 2,5 ملن. تەڭگەنى قاي ۋاقىتتا جيناپ ۇلگەرەدى؟

ءوزى 25 جاسقا دەيىن جوو-دا وقۋدا بولسا، قالعان بەس جىلدا اتالعان سومانى جيناقتاۋ ءۇشىن ونىڭ جالپى تابىسى 25 ملن. تەڭگەدەن كەم بولماۋى كەرەك. بۇل ايىنا ورتا ەسەپپەن 420 مىڭ تەڭگە دەگەن ءسوز.

ەندى قاراڭىز، ۋنيۆەرسيتەت قابىرعاسىنان كەشە عانا شىققان جاس مامانعا ونداي جالاقىنى كىم تولەيدى؟

مۇمكىن «سامۇرىق»، «قازمۇنايگاز» سالاسىندا جۇرگەندەرگە تولەنەتىن شىعار. بىراق، ەلدىڭ ءبارى وندا ىستەمەيدى عوي.

بيۋدجەتتىك مەكەمەدەگى جاس ماماننىڭ ايلىق تابىسى 110-130 مىڭنىڭ توڭىرەگىندە. بۇل اشىق دەرەككوزدەرىندە تۇر.

سوندا، مينيستر نۇرىمبەتوۆتىڭ ايتقانىنان قالت-قۇلت كۇن كەشىپ جۇرگەن قاراپايىم حالىققا نە پايدا بار؟ ەشقانداي دا! بۇل ارادا، تاعى دا تۇرمىسى جوعارى (مينيسترلەر، اكىمدەر، دەپۋتاتتار، مەكەمە باسشىلارى، كۆازيمەملەكەتتىك سەكتورداعىلار) عانا ۇتىسقا شىعايىن دەپ وتىر.

سوندىقتان، پرەزيدەنت جولداۋىندا ايتىلعانداي، جالپى حالىقتىڭ الەۋمەتتىك تۇرمىسىن جاقسارتۋعا ارنالعان تاپسىرمالاردىڭ بۇرمالانۋىنا جول بەرۋگە بولمايدى.

ەندەشە، ەڭبەك جانە حالىقتى الەۋمەتتىك قورعاۋ مينيسترلىگى ءوزىنىڭ انتيحالىقتىق بۇل شەشىمىن شۇعىل ارادا قايتا قاراۋى ءتيىس دەپ ويلايمىز. جوعارىداعى شەكتىك كورسەتكىش ەكى-ءۇش ەسە تومەندەتىلۋى كەرەك! مينيسترلىكتىڭ شەشىمى اتا زاڭنىڭ تارماقتارى ەمەس، بار بولعانى نورماتيۆتىك قۇجات، ونى وزگەرتۋگە بولادى!

قايىم-مۇنار تابەەۆ،

Abai.kz