جاڭاوزەن وقيعاسى بويىنشا قۇرىلعان ۇكىمەتتىك

كوميسسيا توراعاسى ءو.شۇكەەۆ مىرزاعا!

«اسار» ورالماندار بىرلەستىگىنىڭ توراعاسى

قايرات بوداۋحاننىڭ مالىمدەمەسى

جاڭاوزەن وقيعاسى بويىنشا قۇرىلعان ۇكىمەتتىك

كوميسسيا توراعاسى ءو.شۇكەەۆ مىرزاعا!

«اسار» ورالماندار بىرلەستىگىنىڭ توراعاسى

قايرات بوداۋحاننىڭ مالىمدەمەسى

قازاق سان عاسىر بويى اڭساعان تاۋەلسىزدىگىنە بۇكىل الەمدى قامتىعان جۇيەلى وزگەرىستەر كەزەڭىندە، 20 عاسىردىڭ سوڭىندا قول جەتكىزدى. جاس مەملەكەت 20 جىلدى ءىرى جەتىستىكتەرمەن قارسى الدىق. اتا بابامىز سان عاسىر اڭساعان تاۋەلسىزدىك قاستەرلى ۇعىم. ونى ساقتاۋ، قورعاۋ ءار قازاقتىڭ باستى مىندەتى جانە بورىشى! الايدا، جۋىقتا جاڭاوزەندە بولعان وقيعا بارشامىزدى قاتتى الاڭداتقانى بەلگىلى.
وسى وقيعاعا بايلانىستى قۇرىلعان ۇكىمەتتىك كوميسسيانىڭ توراعاسى ءسىزدىڭ 20-جەلتوقسان كۇنگى قازتاگ جانە اقتاۋلىق «لادا» گازەتى ارقىلى تاراتىلعان پىكىرىڭىز بارشا قازاقستاندىقتارمەن بىرگە اتامەكەنگە كەلگەن ميلليوننان استام قانداستىڭ جانە شەتتەگى 5 ملن. اعايىننىڭ كوڭىلىنە قاياۋ سالعان ورەسكەل قادام بولدى. «..وقيعاعا كىنالى ورالماندار، سوندىقتان ولاردى باسقا ولكەلەرگە كوشىرۋ كەرەك ..» دەپ مالىمدەۋىڭىز، مەملەكەت پەن ۇلتتىڭ ابىرويىنا، بەرەكە-بىرلىگىنە ۇلكەن سىن بولدى دەپ ەسەپتەيمىز! «ەنشىسى بولىنبەگەن الاشتا» ۇلتتى جەرىنە، تەگىنە قاراي ءبولىپ-جارۋ قازاقتىڭ ارعى-بەرگى تاريحىندا بولعان ەمەس!
ەلباسىمىز دۇنيەجۇزىقازاقتارىنىڭ IV قۇرىلتايىندا «ازاتتىقتىڭ ەلەڭ-الاڭىنداعى كۇردەلى كەزەڭگە قاراماستان كوشىمىز كولىكتى بولدى... قازاقستان دۇنيەدەگى ءار قازاقتىڭ قاستەرلى قۇبىلاسى! قازاقستان الەمدەگى بارشا قازاقتىڭ قۇتتى قاراشاڭىراعى!» دەپ باعا بەرگەن ەدى. قازاقستان ەگەمەندىگىن الىسىمەن اتامەكەنگە قاراي اعىلعان قانداستار تاۋەلسىزدىكپەن بىرگە جاساسۋىنا، ەلدىڭ ساياسي، قوعامدىق، رۋحاني ومىرىنە قوسقان وزىندىك ۇلەسىنە تاريحي باعا بەرۋ ءالى الدا دەپ تۇسىنەمىز.
قونىس اۋدارعان قازاقتىڭ ءبىرى مەن دە الداعى سايلاۋعا باعىمدى سىناۋعا بەل بۋىپ وتىرمىن. بۇل قادامىم - تاۋەلسىزدىكتىڭ باياندىلىعى مەن ەلدىك جولىندا وزىندىك پىكىرىمدى تالقىعا سالۋدىڭ ءبىر مۇمكىندىگى، ەڭ باستىسى جالپىقازاقتىق مۇددەنىڭ جەمىسى، ەل ساياساتىنىڭ شىنايىلىعىنىڭ جەمىسى دەپ باعالايمىن! باعدارلامامىزدا رۋحاني ماسەلەلەر، ەكولوگيالىق پروبلەمالار، الەۋمەتتىك جانە كوشى-قون ماسەلەلەرى، جەرگىلىكتى ءوزىن-ءوزى باسقارۋ سياقتى ت.ب. باعىتتار قاراستىرىلعان. وسى ورايدا، جاڭاوزەن وقيعاسى بىزگە ۇلكەن ساباق! حالىق پەن بيلىك الشاقتىعىن پايدالانىپ، ەل تىنىشتىعى مەن بەرەكەسىن بۇزاتىن كۇشتەر از ەمەس!
تۇركىتانۋدىڭ كلاسسيگي ۆ.رادلوۆتى تاڭ قالدىرعان تىلدىك جانە مادەني جاعىنان بىرەگەي قازاق ۇلتىنىڭ جاھاندانۋ زامانىندا ءوز اتامەكەنىندە قاعاجاۋ كورۋگە، سىن تەزىنە نىسان بولاتىن نەگىزى جوق. ەلباسى ن.ءا.نازارباەۆ ۇدايى ەسكەرتەتىن "قازاقتىڭ وتانى-بىرەۋ، ول - قازاقستان" دەگەن ۇلاعاتتى ءسوزدىڭ پارقىن جەتە پايىمداۋعا شاقىرامىن! اتامەكەندەگى قازاق، شەتتەگى قازاق، ورالمان قازاق دەگەن ءتۇرلى كاتەگورياعا ءبولىپ جىكتەۋگە، ياعني ۇلتتىق بىرەگەيلىك پەن بىرلىككە نۇقسان كەلتىرۋدىڭ جولىن قاراستىرىپ وتىرعان ىشتەگى جانە سىرتتاعى ساياسي استىرتىن كۇشتەردىڭ ارانداتۋ ارەكەتىنە جەلەۋ بەرۋگە استە بولمايدى. ياعني، ايتۋدا اتۇستىلىك، اسىعىستىق تانىتتىڭىز، بىرجاقتىلىققا بوي ۇردىڭىز!
كوشى-قون،ورالماندار ماسەلەسى مەملەكەتتىك ستراتەگيا رەتىندە اركەز ەل ساياساتىنان ۇمىت قالعان ەمەس. الايدا، اتقارۋشى بيلىكتىڭ قىرسىزدىعى مەن ورالمانداردىڭ ساياسي، قۇقىقتىق شەكتەۋلىگى كوپ تاۋقىمەتتەردىڭ دەر كەزىندە شەشىلۋىنە مۇمكىندىك بەرمەدى. اتقارۋشى بيلىكتىڭ نەمكەتتى ارەكەتىنىڭ كەسىرىنەن قوعامداعى ءالسىز توپقا ورالمانداردىڭ ءبىر بولىگى قوسىلدى جانە ەلدەگى الەۋمەتتىك احۋالدى ۇشىقتىرۋعا سەبەپكەر بولدى.
ساياساتتاعى پەرسپەكتيۆالى بەدەلدى تۇلعا ءسىزدىڭ كوميسسيا توراعاسى رەتىندە جاڭاوزەن وقيعاسىنا ورالمانداردىڭ قاتىستىلىعىنا بايلانىستى وبەكتيۆتى تۇردە باعا بەرۋىڭىزدى سۇرايمىز!

"اباي-اقپارات"