جۋىردا الەۋمەتتىك جەلىگە ۇزاقتىعى سەگىز مينۋتتان اساتىن بەينە جازبا تارادى. اتالعان اقپاراتتى تاراتۋشى ءتۇرلى «you tube» ارنالارداعى بەينە جازبالاردىڭ دا، جەلىدەگى گۋ-گۋ اڭگىمەنىڭ دە تاقىرىبى  – ءماجىلىس دەپۋتاتى بەكبولات تىلەۋحان تۋرالى. «بەكبولات تىلەۋحان سيرياعا قارۋ ساتىپ ءجۇر مە؟»، «بەكبولات تىلەۋحان «كونترابانديست» بولىپ شىقتى» ت.ب.

بەينە جازبا «ناعىز قازاق» «you tube» ارناسىندا 10 قىركۇيەك كۇنى، ياعني، كەشە جاريالانعان. وندا قولعا تۇسكەن ەر ازامات كولىك ىشىندە وتىرىپ تەحنيكا شىعارۋعا جانە ونى ساتۋعا قاتىسى بار ادامداردىڭ اتىن اتايدى. ونىڭ ىشىندە ءماجىلىس دەپۋتاتى بەكبولات تىلەۋحاننىڭ دا قاتىسى بار ەكەنى ايتىلعان.

جەلىدە تاراعان اقپارات

«قازاندا ۇلتتىق قاۋىپسىزدىك قىزمەتىمەن بىرگە ءبىر ءىس باستادىم. ەرقانات قۇسايىنوۆ استانادا دەپارتامەنتتە جۇمىس ىستەيدى. ءبىز تەحنيكانى شىعاردىق، تاعى ءبىر اسكەري ادام بار. مەن اقشا سالىپ، اسكەري ادامنان تەحنيكا ساتىپ الامىن. ەرقانات تا اقشا سالدى»، - دەيدى ول.  سونداي-اق، وسى ىسكە دەپۋتات بەكبولات تىلەۋحاننىڭ دا قاتىسى بار ەكەنىن ايتادى.

بەكبولات تىلەۋحاننىڭ جاۋابى

اتالعان بەينە جازبا قازىر الەۋمەتتىك جەلىدە قىز تالقىلانىپ جاتىر. ال ءماجىلىس دەپۋتاتى بەكبولات تىلەۋحان الەۋمەتتىك جەلىدە وزىنە تاعىلعان «شەتەلگە قارۋ ساتتى» دەگەن ايىپقا جاۋاپ بەرىپتى. دەپۋتات بەكبولات تىلەۋحان قازاقستاننىڭ ۇلتتىق قاۋىپسىزدىك قىزمەتى مەن ىشكى ىستەر مينيسترىلىگىنە ۆيدەو اۆتولارىنىڭ ۇستىنەن شاعىم تۇسىرگەن.

«الەۋمەتتىك جەلىلەردە مەنىڭ اتىما جالا جابىلعان ۆيدەو تاراپ جاتىر. بەينەجازبادا مەنىڭ جانە باسقا دا بىرنەشە ازاماتتىڭ اتى ايتىلىپ، ۇيىمداسقان قىلمىسقا قاتىستى ەتىپ كورسەتەدى.

وسىعان وراي، ابىروي-بەدەلىمە نۇقسان كەلتىرەتىن جالعان اقپارات بەرۋشى - ۆيدەوداعى تۇلعالاردى انىقتاپ، تەكسەرىپ، ولاردىڭ جاساعان ارەكەتتەرى ءۇشىن زاڭ الدىندا قاتاڭ تۇردە جازالانۋىن سۇراپ، قر ۇلتتىق قاۋىپسىزدىك كوميتەتىنە، قر ىشكى ىستەر مينيسترلىگىنە شاعىم ءتۇسىردىم.

سونداي-اق، وسى جالعان اقپاراتتى تاراتۋشىلاردى انىقتاپ، قاتاڭ شارا قولدانۋدى سۇرادىم»، - دەپ جازدى دەپۋتات Facebook جەلىسىندەگى جەكە پاراقشاسىندا.

ال دەپۋتاتتىڭ جاۋابى جاريالانعان ءبىر مينۋتقا تولار-تولماس بەينە جازبادا: «ۆيدەونى كوردىم، وتە جاقسى سپەكتاكل جاساعان. ءبىر ادام ۇستالىپ، سول جاۋاپ بەرىپ وتىرعان سەكىلدى. ادامداردىڭ اتى-ءجونىن ايتادى. جالا بولعاندا دا، قيسىنعا كەلمەيتىن نارسەنى ايتقان. وسى ماسەلەگە بايلانىستى مەنىڭ ابىروي-بەدەلىمە نۇقسان كەلتىرگەن ادامداردى تابۋدى، ۆيدەودا اتى اتالعان بارلىق تۇلعانى انىقتاۋدى ۇلتتىق قاۋىپسىزدىك كوميتەتىنەن، باسقا دا قۇقىق قورعاۋ ورگاندارىنان, قاۋىپسىزدىك كەڭەسىنەن وتىنەمىن»، - دەدى بەكبولات تىلەۋحان.

Abai.kz