بۇگىن تاڭعى ساعات 08-دە دەنساۋلىق ساقتاۋ ءمينيسترى الەكسەي تسوي نۇر-سۇلتانداعى №6 قالالىق ەمحاناعا بارىپ، العاشقىلاردىڭ ءبىرى بولىپ ماۋسىمدىق تۇماۋعا قارسى ۆاكتسينا سالدىردى.

ايتا كەتۋ كەرەك، 2020 جىلى قازاقستاندا ەگۋ ناۋقانى 15 قىركۇيەك پەن 15 قاراشا ارالىعىندا وتەدى، ياعني جىلداعىدان ەكى اپتاعا ەرتە باستالدى. بىرىڭعاي ديستريبيۋتور «گريپپول+» ۆاكتسيناسىنىڭ 2 ملن. استام دوزاسىن ساتىپ الدى.

ددسۇ مالىمەتىنشە، قازىرگى ەپيدەميولوگيالىق ماۋسىمدا ۆيرۋستىڭ ءۇش شتاممى وزەكتى بولادى - A (H1N1) - Guangdong-Maonan, A (H3N2) – Hong Kong جانە B –ۆيكتوريا جەلىسىنە كىرەتىن Washington, ۆاكتسينا اتالعان ءۇش شتاممعا قارسى تۇرا الادى.

جۋرناليستەرگە سۇقبات بەرگەن ا.تسوي، جىلدا كۇز كەلگەندە جرۆي مەن تۇماۋ ءورشيتىنىن ايتتى. 2019-2020 جىلعى ەپيدەميولوگيالىق ماۋسىمدا جرۆي اۋىرعان 431 120 ادام تىركەلدى، ونىڭ ىشىندە 2 جارىم مىڭنان استام ناۋقاس زەرتحانادا انىقتالعاەن تۇماۋعا شالدىققان. بيىل حالىققا ۆاكتسيناتسيا وتە قاجەت، ويتكەنى كوروناۆيرۋس پاندەمياسى كەزىندە تۇماۋ دا ارالاسىپ، جاعدايدى ۋشىقتىرۋى مۇمكىن، مۇندايدا قازىر قول جەتكىزگەن تۇراقتىلىقتى ساقتاپ قالۋ قيىن بولادى، - دەدى ۆەدومستۆو باسشىسى.

رەسپۋبليكا حالقىنىڭ 11,7 پايىزىن، ال ددسۇ ۇسىنىسى بويىنشا كەمىندە 10 پايىزىن تۇماۋعا قارسى تەگنى ۆاكتسينامەن قامتۋ جوسپارلانعان.

تۇماۋعا قارسى ۆاكتسيناتسيا تاۋەكەل توبىنا كىرەتىن مىنا ساناتتاعى ادامدار ءۇشىن تەگىن: مەكتەپ جاسىنا تولماعان جانە مەكتەپ جاسىنداعى بالالار; مەديتسينا قىزمەتكەرلەرى; جۇكتى ايەلدەر (جۇكتىلىكتىڭ 2-3 تريمەسترى); جابىق مەكەمەلەردەگى ادامدار (بالالار ءۇيى، مەكتەپ-ينتەرناتتار ; سوزىلمالى اۋرۋى بار ەرەسەكتەر مەن بالالار; 60 جاستان اسقان قارتتار.

الدىن الۋ ماقساتىندا ءاربىر ادام تۇماۋعا قارسى اقىلى ەگۋ سالدىرا الادى، ول جەكە ۆاكتسيناتسيا ورتالىقتارىندا، حالىقتىڭ سانيتاريالىق-ەپيدەميولوگيالىق سالاۋاتتىلىعى سالاسىنداعى ۋاكىلەتتى ورگاننان رۇقساتى بار تۇرعىلىقتى جەرى بويىنشا ەمحانالارداعى ەگۋ كابينەتىندە جۇرگىزىلەدى.

تۇماۋعا قارسى ۆاكتسينا سالاتىن مەديتسينالىق مەكەمەلەردىڭ مەكەن-جايىن دەنساۋلىق ساقتاۋ باسقارماسىنان، قوعامدىق دەنساۋلىق ساقتاۋ اۋماقتىق دەپارتامەنتتەرىنەن بىلۋگە بولادى.

Abai.kz