نەسيەگە راقىمشىلىق، ساياسي تۇتقىنداردى بوساتۋ جانە شەتەلگە جەر ساتىلماسىن دەگەن تالاپپەن الماتىدا وتكەن ميتينگكە 200-گە جۋىق ادام جينالدى. رۇقسات ەتىلگەن ميتينگكە شىققان ادامدار انتيقىتايلىق ۇراندار جازىپ، قازاقستانداعى قىتاي ەلشىسىن ەلدەن شىعارۋ كەرەك دەگەن تالاپ قويدى.

ميتينگ 13 قىركۇيەكتە ەلدىڭ بارلىق ايماعىندا ءوتتى.

الماتىداعى ميتينگتى ۇيىمداستىرۋشى، تىركەلمەگەن دەموكراتيالىق پارتيانىڭ جەتەكشىسى جانبولات ماماي جەرگىلىكتى بيلىككە مىڭ ادامدىق ميتينگ وتكىزۋگە ءوتىنىش جازعان. بىراق ازاتتىق ءتىلشىسىنىڭ ەسەبى بويىنشا، 200 ادام كەلگەن.

ميتينگكە قاتىسۋشىلار مەن جۋرناليستەر ماسكا تاعىپ كەلدى. شوقان ۋاليحانوۆ ەسكەرتكىشى جانىندا وتكەن شارا ماڭىندا مەديتسينا قىزمەتكەرلەرى COVID-19 ۆيرۋسىنا قارسى جينالعانداردىڭ دەنە قىزۋىن تەكسەرىپ تۇردى.

جيىنعا قاتىسۋشىلاردىڭ كوبىنىڭ قولىندا شەتەلدىكتەرگە جەردى جالعا بەرمەۋ، تۇرمەدە وتىرعان ازاماتتىق بەلسەندى ماكس بوقاەۆ، ديسسيدەنت اقىن ارون اتابەككە بوستاندىق بەرۋ جانە بانكتەن العان قارىزىن قايتارۋعا جاعدايى جەتپەيتىن ازاماتتارعا نەسيە امنيستياسىن جاريالاۋ تالابى جازىلعان پلاكات بار.

ميتينگىگە كەلگەندەردىڭ ءبىرى ازاماتتىق بەلسەندى يۋري مالەنكيح پاندەميانىڭ كەسىرىنەن ەلدە ەكونوميكالىق جانە الەۋمەتتىك ماسەلەلەر ۋشىققانىن اتاپ ءوتتى.

- پرەزيدەنت قاسىم-جومارت توقاەۆ جولداۋىندا بيلىك تارماقتارىنىڭ ءبىرى - سوت جۇيەسىنىڭ "جابىق كورپوراتسياعا" اينالعانىن ايتتى. مەنىڭ ويىمشا، قازاقستانداعى بيلىك وزىنە عانا جۇمىس ىستەيتىن "كورپوراتسياعا" اينالعان. حالىقتان الىستاپ كەتتى. كونستيتۋتسيامىزدا حالىق - بيلىكتىڭ قاينار كوزى دەپ جازىلعان. سول سەبەپتى بيلىك كەتۋى ءتيىس، قازاقستاننىڭ بيلىك تارماقتارىندا حالىققا جۇمىس ىستەيتىن ادامدار وتىرۋ ءۇشىن زاڭدى سايلاۋ وتكىزۋ كەرەك، - دەدى يۋري مالەنكيح.

ميتينگىدە قىتايدىڭ قازاقستانداعى ەلشىسى چجان سياونىڭ ديپلوماتيالىق قىزمەتىنە قاتىستى پلاكاتتار دا كەزدەستى: كوزىلدىرىك پەن قارا ءتۇستى قورعانىش ماسكاسىن تاققان جاس جىگىت "چجان سياو، ەلشىسىڭ بە، الدە جاۋشىسىڭ با؟" دەگەن جازۋى بار پلاكاتتى باسىنان اسىرا كوتەردى. ۇزىن بويلى ەر ادام پلاكات ۇستاعان جىگىتتىڭ الدىندا بىرنەشە سەكۋند بوگەلىپ، ونى ۆيدەوعا ءتۇسىرىپ الىپ، ارى قاراي كەتتى.

جەكسەنبى كۇنى ميتينگ قاراعاندى، سەمەي جانە اقتوبە قالالارىندا دا ءوتتى. نۇر-سۇلتاندا ونداعان ادام تسيرك الدىنداعى الاڭعا شىقپاق بولدى. بىراق بيلىك وكىلدەرى رۇقسات ەتىلمەگەن ميتينگكە شىققانى ءۇشىن جاۋاپكەرشىلىككە تارتىلاتىنىن ەسكەرتتى.

شىمكەنتتە وننان استام ادام ناۋرىز الاڭىنا جينالىپ، ساياسي تۇتقىنداردى بوساتۋدى، بەلسەندىلەردى قۋدالاماۋدى جانە جەردى شەتەلدىكتەرگە ساتپاۋدى تالاپ ەتتى.

ساياساتكەر، بەلسەندى جانبولات ماماي باستاعان "دەموكراتيالىق پارتيا" قۇرعىسى كەلەتىن توپ بۇعان دەيىن پارتيانى تىركەۋگە كۇش سالعانمەن رەسمي تۇردە تىركەتە الماعانىن ايتقان ەدى. اقپان ايىندا باستاما توبى پارتيانىڭ قۇرىلتاي سەزىن وتكىزۋگە تىرىسقانمەن بيلىكتىڭ قىسىمىنا بايلانىستى وتكىزۋدەن باس تارتاتىنىن حابارلاعان.

قازاقستان زاڭى بويىنشا پارتيانى تىركەۋ ءۇشىن ۇيىم كەمىندە مىڭ ادام قاتىسقان قۇرىلتاي سەزىن وتكىزىپ، كەمىندە 20 مىڭ قول جيناۋ كەرەك. قازاقستاندىق قۇقىق قورعاۋشىلار پارتيالار، ميتينگ جانە سايلاۋ تۋرالى زاڭنامادا شەكتەۋلەر كوپ دەپ سانايدى.

Abai.kz