شۆەيتساريا مەن وزبەكستان كەلىسىمگە قول قويىپ، وعان سايكەس گۇلنارا كاريموۆانىڭ شۆەيتساريا بانكتەرىندەگى ەسەپشوتتا قالعان 131 ميلليون دوللارى وزبەك جاعىنا قايتارىلادى. بۇل تۋرالى شۆەيتساريا ۇكىمەتىنىڭ حابارلاماسىندا ايتىلادى.

كەلىسىم تالاپتارىنا سايكەس، تاشكەنت قايتارىلعان اقشانى قالاي جۇمساعانىن اشىق جاريالاپ، ەسەپ بەرىپ وتىرۋى ءتيىس، اكتيۆتەر "حالىقتىڭ جاعدايىن جاقسارتاتىن", ەلدىڭ تۇراقتى دامۋىن قامتاماسىز ەتەتىن جوبالارعا جۇمساۋى ءتيىس.

گۇلنارا كاريموۆانىڭ ۇستىنەن قوزعالعان قىلمىستىق ءىس اياسىندا تاعى 715 ميلليون دوللار بۇعاتتاۋلى كۇيدە قالعان. بۇل قارجى دا الدىڭعى شارتپەن وزبەكستانعا قايتارىلۋى مۇمكىن. قاڭتار ايىندا وزبەكستان باس پروكۋراتۋراسى كاريموۆا ءىسى اياسىندا شۆەيتسارياعا 70 ونەر تۋىندىسىن قايتاراتىنىن مالىمدەگەن.

وزبەكستاندا كاريموۆا "اقشا جىمقىرۋ" جانە "بوپسالاۋ" باپتارى بويىنشا سوتتالعان. 2012 جىلى شۆەيتساريانىڭ فەدەرالدىق پروكۋراتۋراسى قىلمىستىق ىسكە بايلانىستى كاريموۆانىڭ شامامەن 879 ميلليون دوللارىن بۇعاتتاعان ەدى. بىلتىر بۇل سومانىڭ 131 ميلليون دوللارى كامپەسكەلەنگەن بولاتىن.

بيىل مامىر ايىندا فرانتسيا وزبەكستانعا كاريموۆانىڭ 10 ميلليون دوللارىن قايتارعان. بۇل قاراجات وزبەكستاننىڭ مەملەكەتتىك بيۋدجەتىنە اۋدارىلعان جانە جالپى ماقساتتا جۇمسالىپ جاتىر.

وزبەكستان بيلىگى اكتيۆتى قايتارۋ بويىنشا شۆەيتساريا، اقش، فرانتسيا، رەسەي فەدەراتسياسى جانە وزگە ەلدەردىڭ قۇزىرلى ورگاندارىمەن جۇمىس ىستەپ جاتىر. اقپارات بويىنشا، ماسەلە كاريموۆانىڭ 1,3 ميلليارد دوللار اكتيۆى جايلى بولىپ وتىر.

وزبەكستاننىڭ ءبىرىنشى پرەزيدەنتى يسلام كاريموۆ قايتىس بولعاننان كەيىن 2017 جىلى قىزى گۇلنارا كاريموۆا وزبەكستاندا 10 جىلعا باس بوستاندىعىنان ايىرىلعان بولاتىن. وعان "سالىقتان جالتاردى", "قارجى جىمقىردى", "بوپسالادى", "وفشور كومپانياسىنىڭ قۇجاتتارىن جويدى" دەگەپ ايىپ تاعىلدى. اقش پەن ەۋروداقتىڭ بىرنەشە ەلى كاريموۆانى قارجى جىمقىردى دەپ ايىپتاعاننان كەيىن وزبەكستاندا ەكس-پرەزيدەنتتىڭ قىزىنىڭ ۇستىنەن ءىس قوزعالعان.

كاريموۆاعا العاش رەت سوت ۇكىمى شىققاننان كەيىن ول ءبىراز ۋاقىت ۇيقاماقتا وتىردى، بىراق 2019 جىلى ناۋرىزدا "ۇيقاماق ەرەجەسىن بۇزدى" دەپ ايىپتالىپ، تاشكەنت وبلىسىنداعى تۇرمەگە جىبەرىلدى. كاريموۆا مەن ونىڭ قىزى بۇل ايىپتاردى جوققا شىعاردى. وسىدان سوڭ كاريموۆانىڭ ۇستىنەن ەكىنشى قىلمىستىق ءىس قوزعالعان.

ءۇشىنشى قىلمىستىق ءىس بويىنشا ول 13 جىل 4 ايعا بوستاندىعىنان ايرىلعان. كاريموۆاعا جانە ونىمەن بىرگە سوتتالعان تاعى بىرنەشە ادامعا "قىلمىستىق قاۋىمداستىق قۇرىپ، اقشا بوپسالاۋ، بيۋدجەت قارجىسىن جىمقىرۋ، قىلمىستىق جولمەن الىنعان قارجىنى زاڭداستىرۋمەن بايلانىستى قىلمىس جاسادى" دەگەن ايىپتار تاعىلدى.

Abai.kz