پرەزيدەنت جانىنداعى رەفورمالار جونىندەگى جوعارعى كەڭەستىڭ كەشە جاريالانعان قۇرامىنا قاراپ، بۇگىننەن باستاپ «ەلدە بولۋى مۇمكىن ساياسي رەفورمادان تۇڭىلە بەرۋگە بولادى» دەپ سانايمىن: كەڭەس قۇرامىندا قوعامدىق-ساياسي ومىرگە قوزعاۋ سالىپ، ونى تۇبەگەيلى وزرەتۋگە قاتىستى تۇشىمدى ۇسىنىس ايتا الاتىن كىم بار؟ شەتىنەن بۇعان دەيىن «دەموكراتيا، ادىلەتتىك، پليۋراليزم» دەگەن سوزدەردى اۋزىنا الىپ كورمەگەن ادامدار!

ءبىز سەكىلدى قاتتى ءسوز ايتىپ، بيلىككە جاقپاي جۇرگەن وپپوزيتسيانى شاقىرماي-اق قويسىن، بىراق ەل ىشىندە بيلىككە قاتىستى «وگىزدى ولتىرمەي، اربانى سىندىرماي»، پىكىرىن اشىق ايتىپ جۇرگەن ءبىلىمدى، بىلىكتى، ءوز ۇستانىمى بار، قوعامدىق ومىردە تاجىريبەسى مول ازاماتتار بار ەمەس پە؟ نەگە سولاردى رەفورما ىسىنە تارتپاسقا؟ كەڭەستىڭ ماقساتى دا سول - سونىڭ ىشىندە، ساياسي رەفورما - ەمەس پە؟ مىنا سىقيىپ قالعان شەندىلەر ساياسي رەفورماعا قاتىستى حالىق كوڭىلىنەن شىعاتىنداي نە ايتا الادى؟

باسقاسىن ايتپاعاندا، ءبارى دە وسى كۇنگە دەيىن لاۋازىمدى قىزمەتتەردە بولىپ، ەكونوميكا، الەۋمەتتىك سالا مەن قوعامدىق-ساياسي ءومىردى تۇرالاتىپ تاستاعان ءدال وسىلار ەمەس پە؟ ەندى ولار وزدەرى قۇرعان جۇيەنى قالاي وزگەرتپەك؟ ءدال سولار رەفورماتور بولادى دەگەنگە سەنە المايمىن، وعان ول ادامداردىڭ ءومىربايانى مەن وسى كۇنگە دەيىنگى قاتىپ-سەمىپ قالعان ۇستانىمدارى سەبەپ!

كەڭەس باسشىسى - پرەزيدەنتتىڭ ورىنباسارى بولعان، ەۋروپا قايتا قۇرۋ جانە دامۋ بانكىنىڭ ەكس-پرەزيدەنتى سۋما چاكرابارتيگە دە قاتىستى ءبىر وي.

ءيا، شەتەل تاجىريبەسىن ەسكەرگەن ءجون-اق. كەڭەسشى بولسا، بولسىن.

بىراق شەتەل ازاماتىن ەلدەگى اسا ماڭىزدى قۇرىلىمنىڭ باسشىسى ەتۋ، ونى فورمالدى تۇردە سونشالىقتى ينستيتۋتتەندىرۋ، وعان ءوز ازاماتتارىمىزدى (جاي ازاماتتار ەمەس، بيلىك ورگاندارىنىڭ باسشىلارىن) باسقارتىپ قويۋ دۇرىس ەمەس دەپ ويلايمىن.

ءوزىن رەفورماتور دەپ جاريالاعان پرەزيدەنت ءبىر نارسەنى ءتۇسىنۋى كەرەك: وعان دەگەن سەنىم ول قۇرىپ جاتقان قۇرىلىمدارعا دەگەن سەنىمنەن باستالادى! قۇرامىندا قوعام وكىلدەرى جوق قۇرىلىم قوعامنىڭ ءسوزىن سويلەپ، شىنايى رەفورما جاساي الادى دەگەنگە بۇگىندە ەشكىم دە سەنبەيدى!

ءامىرجان قوساننىڭ جازباسى

Abai.kz