الەم جانە باتىس ەۋروپا مادەنيەتى مەن ادەبيەتىندەگى ەڭ اتاقتى شىعارمالاردىڭ ءبىرى «چارلي جانە شوكولاد فابريكاسى» ەرتەگى پوۆەسى قازاقشاعا اۋدارىلدى. شىعارما اۆتورى – ايگىلى جازۋشى، اقىن، ستسەناريست رۋال داھل (Roald Dahl). كىتاپتى قازاقستاندا «Steppe & WORLD Publishing» باسپاسى شىعاردى.

باسپا باسشىسى رايسا قادىردىڭ ايتۋىنشا، 13 قىركۇيەكتە الەم بويىنشا داھل كۇنى اتالىپ وتەدى ەكەن. سوندىقتان قازاق تىلىندەگى «چارلي جانە شوكولاد فابريكاسى» وسى مەرەكەگە ورايلاستىرىپ جارىق كورىپتى.

«چارلي جانە شوكولاد فابريكاسىن» دۇنيەدەگى ەڭ ءتاتتى تۋىندى دەپ ايتار ەدىم. وقىپ وتىرعاندا شوكولاد ءدامىن سەزدىرىپ، ءتىل ۇيىرەتىن شىعارما. بۇل – قازاق تىلىندە العاش رەت داھل اۋلەتىنىڭ جانە اتاقتى يلليۋستراتور كۇەنتين بلەيكتىڭ رەسمي رۇقساتىمەن شىعىپ جاتقان باسىلىم»، - دەيدى رايسا قادىر.

ول رۋال داھل مەن كۇەنتين بلەيكتىڭ ونەرى بىرىككەندە، كەرەمەت سيمبيوز پايدا بولعانىن ايتادى.

«چارلي جانە شوكولاد فابريكاسىن» قازاق تىلىنە لەكسيكوگراف، اعىلشىن ءتىلى ءپانىنىڭ وقىتۋشىسى ءۇريلا كەڭەسباەۆا اۋدارعان. رەداكتورى – نازگۇل قوجابەك.

«كىتاپ وتە قاراپايىم اعىلشىن تىلىندە جازىلعانىن اتاپ وتكەن دۇرىس. زەرتتەۋشىلەر اۆتوردىڭ قولدانعان ءسوزى ەكى مىڭنىڭ ار جاق-بەر جاعىندا دەگەندى ايتادى. قازاقشا نۇسقاسى دا ءتىلى جەڭىل، ۇعىنىقتى بولىپ شىقتى. بۇل اۋدارماشى مەن رەداكتورىمىزدىڭ جوعارى دەڭگەيدەگى مامان ەكەنىن دالەلدەيدى»، - دەيدى رايسا قادىر.

باسپا باسشىسى كىتاپتىڭ بالالارعا ارنالىپ جازىلعانىنا قاراماستان، وقىرمانداردىڭ كوبى ەرەسەك ادام ەكەنىن ايتادى. وعان كىتاپتا وربىگەن وقيعانىڭ قىزىقتىرىپ، ەلىتىپ اكەتۋىمەن قاتار، ۇلكەن وي سالاتىنى دا سەبەپ.

«چارلي جانە شوكولاد فابريكاسى» كىتابىنا «Steppe & WORLD Publishing» باسپاسىنىڭ الەۋمەتتىك جەلىلەردەگى پاراقشالارى (Facebook, Instagram) ارقىلى، سونداي-اق whatsapp مەسسەندجەرىمەن +7 700 246 35 30 ءنومىرى بويىنشا تاپسىرىس بەرۋگە بولادى.

قوسىمشا اقپارات:

«Steppe & WORLD Publishing» باسپاسى بالالارعا ارنالعان جۋليا دونالدسوننىڭ «اقىن قويان» جانە «گرۋففالو»، ەريك كارلدىڭ «قوماعاي جۇلدىزقۇرت»، ەلەن دەلفورجدىڭ «ماما»، جەفف كيننيدىڭ «تەنتەك بالاقايدىڭ كۇندەلىگى»، سونداي-اق «اننا فرانكتىڭ كۇندەلىگى» سەكىلدى كىتاپتاردى قازاق تىلىنە اۋدارىپ، شىعارعان. 2020 جىلى باسپا جوان ءروۋليڭتىڭ «ءحارري پوتتەر مەن ءپالساپا تاس»، «ءحارري پوتتەر مەن جاسىرىن بولمە» كىتاپتارىن ۇسىندى. قازىر «ءحارري پوتتەر» سەرياسىنا كىرەتىن قالعان بەس كىتاپ اۋدارىلىپ جاتىر.

Abai.kz