تاۋلى قاراباقتاعى قارۋلى قاقتىعىسقا قاتىستى بۇۇ، ەو، ەىقۇ سەكىلدى حالىقارالىق ۇيىمدار مەن شەت ەلدىك ليدەرلەر ءوز پوزيتسيالارىن ءبىلدىرىپ ازەربايجان مەن ارمەنياعا اراعايىندىق ايتىپ جاتىر. بۇل تۋرالى «Abai.kz» پورتالىندا جاريالانعان «قاراباقتاعى قاقتىعىس. قازاقستاننىڭ پوزيتسياسى قانداي؟» اتتى ماقالادا ەگجەي-تەگجەيلى جازدىق.

ازەربايجان مەن ارمەنيا قارۋلى كۇشتەرىنىڭ اراسىنداعى تاۋلى قاراباقتاعى اسكەري شابۋىلدار ءالى توقتاعان جوق. ەكى ەلدە دە اسكەري رەجيم جاريالاندى. ارمەنيا بيلىگى قاقتىعىستى ازەربايجان باستادى دەپ ايىپتاپ وتىر. ال ازەربايجان بيلىگى مۇنى «كونتر شابۋىل» دەپ مالىمدەگەن. ولاردىڭ وزىنشە، سوعىستى الدىمەن ارمەنيا باستاعان. ازىرگە بەلگىلىسى ەكى تاراپتان دا قازا تاپقاندار بار. ولاردىڭ ناقتى سانىنا قاتىستى اقپاراتتار ءارتۇرلى.

حالىقارالىق ۇيىمدار مەن مەملەكەتتەر قاراباقتاعى قاقتىعىسقا قاتىستى بەيتاراپ پوزيتسيانى ۇستانىپ، ماسەلەسى كەلىسسوزدەر ارقىلى شەشۋدى ۇسىنۋدا. ال تۇركيا پرەزيدەنتى رەجەپ تايىپ ەردوعان ازەربايجاندى قولدايتىنىن اشىق مالىمدەدى.

قازاقستاننىڭ سىرتقى ىستەر مينيسترلىگى 27 قىركۇيەك كۇنى رەسمي مالىمدەمە جاساپ، تاۋلى قاراباقتاعى جاعدايعا قاتىستى الاڭداۋشىلىق ءبىلدىردى. تاراپتاردى تاتۋلاستىرۋ ءۇشىن الاڭ ۇسىندى.

بۇدان بولەك تۇركى كەڭەسى بار. وعان قازاقستان دا، ازەربايجان دا مۇشە. تۇركى كەڭەسىنىڭ 2018 جىلدان بەرگى باس حاتشىسى باعدات قۇلتايۇلى امرەەۆ دەگەن ازامات. كەشە تاۋلى قاراباققا قاتىستى رەسمي مالىمدەمە جاساپتى. امرەەۆتىڭ مالىمدەمەسى تۇركى كەڭەسىنىڭ «Facebook-تەگى» رەسمي پاراقشاسىندا جاريالاندى.

تۇركى كەڭەسى ءھام ونىڭ باس حاتشىسى باعدات امرەەۆ تاۋلى قاراباقتى «ازەربايجاننىڭ وككۋپاتسيالانعان تەرريتورياسى»، دەپ مالىمدەگەن.  ازەربايجاننىڭ تەرريتوريالىق تۇتاستىعىن قولدايتىنىن ايتىپتى.

تۇركى كەڭەسى باس حاتشىسىنىڭ مالىمدەمەسى

تۇركى كەڭەسىنىڭ باس حاتشىسى باعداد امىرەەۆ ازەربايجان رەسپۋبليكاسىنىڭ وككۋپاتسيالانعان تەرريتوريالارىنداعى اسكەري قاقتىعىسقا بايلانىستى تەرەڭ الاڭداۋشىلىعىن بىلدىرەدى.

تۇركى كەڭەسى حالىقارالىق قۇقىق نورمالارى مەن قاعيدالارىن ۇستاناتىندىعىن تاعى ءبىر رەت بىلدىرە وتىرىپ، ارمەنيا-ازەربايجان جانجالىن ازەربايجان رەسپۋبليكاسىنىڭ ەگەمەندىگى، اۋماقتىق تۇتاستىعى جانە حالىقارالىق دەڭگەيدە مويىندالعان شەكارالارىنىڭ مىزعىماستىعى نەگىزىندە تەز ارادا شەشۋدىڭ ماڭىزدىلىعىن مالىمدەيدى.

وسىعان بايلانىستى تۇركى كەڭەسى بۇۇ قاۋىپسىزدىك كەڭەسىنىڭ 1993 جىلى قابىلدانعان ءتيىستى شەشىمدەرى نەگىزىندە ارمەنيا قارۋلى كۇشتەرىنىڭ ازەربايجان رەسپۋبليكاسىنىڭ وككۋپاتسيالانعان بارلىق اۋماقتارىن جەدەل، ءسوزسىز جانە تولىقتاي بوساتۋىن تالاپ ەتەدى.

باس حاتشى ادام قازاسىنا بايلانىستى ازەربايجان حالقىنا كوڭىل ايتادى جانە جارالىلاردىڭ تەزىرەك ساۋىعىپ كەتۋىن تىلەيدى.

ايتا كەتەيىك، تۇركى كەڭەسى – بۇل تۇركى تىلدەس مەملەكەتتەردى بىرىكتىرەتىن حالىقارالىق ۇيىم. 2009 جىلى ناحچىۆان قالاسىندا قۇرىلعان. مۇشەلەرى: قازاقستان، ازەربايجان، تۇركيا، قىرعىزستان مەن وزبەكستان. باقىلاۋشى مەملەكەت – ماجارستان. مۇشەلىككە ءوتۋى مۇمكىن مەملەكەت – تۇركىمەنستان.

Abai.kz