اقش پرەزيدەنتى دونالد ترامپ رەسەي ليدەرى ۆلاديمير پۋتينگە «امەريكالىق ساربازداردىڭ باستارىنا بەرىلەتىن سىي-سياپات» تۋرالى ايتۋدان باس تارتتى. بۇل تۋرالى اقش-تىڭ بۇرىنعى ۆيتسە-پرەزيدەنتى دجو بايدەن مالىمدەدى.

The New York Times گازەتىنىڭ حابارلاۋىنشا، رەسەي اۋعانستانداعى تاليبانعا حالىقارالىق كواليتسيانىڭ اسكەري قىزمەتشىلەرىن، ونىڭ ىشىندە اقش اسكريلەرىن ولتىرگەنى ءۇشىن اقشا تولەگەن.

وسىعان وراي، دجو بايدەن دونالد ترامپتى ۆلاديمير ءپۋتيننىڭ «كۇشىگى» دەپ اتادى. «ول ءپۋتيننىڭ كۇشىگى. پۋتينگە امەريكالىق ساربازداردىڭ باسشىلارى ءۇشىن سىياقى تۋرالى ايتۋدان باس تارتادى»، - دەدى. بايدەن بۇل ءسوزدى امەريكالىقتار نە ءۇشىن ترامپقا ەمەس، وعان داۋىس بەرۋى كەرەك دەگەن سۇراققا جاۋاپ رەتىندە ايتتى. 

بايدەننىڭ ايتۋىنشا، اقش-تىڭ ۆيتسە-پرەزيدەنتى رەتىندە پۋتينمەن اڭگىمەلەسۋ كەزىندە رەسەي باسشىسى وعان اقش-تىڭ «قولىنان ەشنارسە كەلمەيتىگىن» ايقىن بىلدىرگەن كورىنەدى.

«ترامپ ەلدى «اۋرۋ، كەدەي، بولىنگەن جانە زورلىق-زومبىلىقتىڭ ورداسىنا اينالدىردى. مەن ۆيتسە-پرەزيدەنت بولعان كەزدە بىزگە رەتسەسسيا مۇرا بولدى. ماعان وسىنى تۇزەتۋدى تاپسىردى. مەن ونى ىستەدىم. ءبىز ترامپقا قارقىندى دامىپ كەلە جاتقان ەكونوميكانى قالدىردىق، ال ول رەتسەسسيانى تۋدىردى»، - دەپ قوستى بايدەن.

ترامپ پەن بايدەن اقش پرەزيدەنتتىگىنە ۇمىتكەر. 30 قىركۇيەككە قاراعان ءتۇنى ولار جۇزبە-ءجۇز كەزدەسۋدىڭ العاشقى كەزەڭىن وتكىزدى. كەستەگە ساي، ەكىنشى دەبات 15 قازاندا ماياميدە (فلوريدا), ال ءۇشىنشى كەزدەسۋ نەشۆيللدە (تەننەسي) 22 قازاندا وتەدى.

اقش-تاعى پرەزيدەنت سايلاۋى 2020 جىلدىڭ قاراشا ايىندا وتەدى. 18 قىركۇيەكتە جاريالانعان امەريكالىق NPR راديوستانتسياسىنىڭ ساۋالناماسىنىڭ ناتيجەلەرى سايلاۋشىلاردىڭ 52%-ى دەموكرات بايدەنگە، 43%-ى ترامپقا داۋىس بەرۋگە دايىن ەكەنىن كورسەتتى.

وسىعان ۇقساس ساۋالناما ناتيجەلەرىن 16 قىركۇيەكتە Reuters جاريالادى. رەسپوندەنتتەردىڭ 50%-ى بايدەندى، 41%-ى ترامپتى قولدادى. Bloomberg-ءتىڭ بولجامىنشا، كرەمل بايدەنگە 2011 جىلدان بەرى - ونىڭ ماسكەۋگە كەلگەن كەزىنەن باستاپ دۇشپاندىق كوزقاراس ۇستانىپ وتىر. 

سەبەبى بايدەن رەسەيلىك وپپوزيتسياعا سول كەزدە پرەمەر-مينيستر بولىپ تۇرعان پۋتين پرەزيدەنتتىككە قايتالاي ۇمىتكەر بولماۋى كەرەك ەكەنىن ايتقان. مۇنداي «قورلاۋ» كرەملدىڭ ەسىندە مىقتاپ ساقتالعاندىقتان، بايدەننىڭ سايلاۋدا جەڭىسكە جەتۋىنەن قورقادى.

كەرىمسال جۇباتقانوۆ،

قازاق-ورىس حالىقارالىق ۋنيۆەرسيتەتىنىڭ دوتسەنتى، تاريح عىلىمدارىنىڭ كانديداتى

Abai.kz