(«تاۋلى قاراباقتاعى ەسكالاتسيانىڭ جانە كيريلل بوجكونىڭ دورەكى سوزدەرىنىڭ قازاقستان رەسپۋبليكاسىنداعى ەتنوسارالىق جاعدايعا اسەرى تۋرالى»)

2020 جىلعى 30 قىركۇيەكتە نۇر-سۇلتان قالاسىندا ونلاين فورماتتا قازاقستان حالقى اسسامبلەياسى مۇشەلەرىنىڭ، پارلامەنت ءماجىلىسىنىڭ دەپۋتاتتارى ا.مۋرادوۆ پەن ن.ميكاەليان، قازاقستاننىڭ ازەربايجاندار قاۋىمداستىعىنىڭ توراعاسى ا.حامەدوۆ، اقپارات جانە قوعامدىق دامۋ مينيسترلىگىنىڭ ەتنوسارالىق قاتىناستاردى دامىتۋ كوميتەتى توراعاسىنىڭ ورىنباسارى ع.شويكين، قحا عىلىمي-ساراپشىلىق كەڭەسىنىڭ جانە قولدانبالى ەتنوساياسي زەرتتەۋلەر ينستيتۋتىنىڭ ساراپشىلار توبىنىڭ مۇشەلەرى، قازاقستان رەسپۋبليكاسى پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى، بعم عك مەملەكەت تاريحى ينستيتۋتى، «Nur Otan» قوعامدىق ساياسات ينستيتۋتى وكىلدەرىنىڭ قاتىسۋىمەن «ەتنوساياسي ديسكۋرس: تاۋلى قاراباقتاعى ەسكالاتسيانىڭ قر ەتنوسارالىق جاعدايىنا اسەرى جانە ك.بوجكونىڭ دورەكى سوزدەرى تۋرالى» ساراپتامالىق كەزدەسۋ ءوتتى.

كەزدەسۋدى مينيسترلىكتىڭ ەقدك جانە قحا-مەن بىرلەسە وتىرىپ، قولدانبالى ەتنوساياسي زەرتتەۋلەر ينستيتۋتى ۇيىمداستىردى.

تالقىلاۋ بارىسىندا ءسوز العان پارلامەنت ءماجىلىسىنىڭ دەپۋتاتى نارينە ميكالەيان مەن قازاقستان ازەربايجاندارى قاۋىمداستىعىنىڭ توراعاسى ءابىلفاس حامەدوۆ تاۋلى قاراباقتا بولىپ جاتقان قاقتىعىس قازاقستان ارمياندارى مەن ازەربايجاندارىنىڭ دوستىق قاتىناستارىنا ەشقانداي كەرى اسەر ەتپەگەنىن اتاپ ءوتتى. سپيكەرلەر ەكى ەلدىڭ كوشباسشىلارىنىڭ قاقتىعىستى بەيبىت جولمەن شەشەتىنىنە سەنىم ءبىلدىردى.

پارلامەنت ءماجىلىسىنىڭ دەپۋتاتى احمەد مۋرادوۆ بەيبىت تۇرعىندار مەن وتباسى زارداپ شەككەن اسكەري قاقتىعىستاردىڭ گۋمانيتارلىق سالدارىنا نازار اۋداردى. كەزدەسۋگە قاتىسۋشىلار ءوز تاراپىنان حالىقارالىق قارارلاردى ۇستانۋدىڭ ماڭىزدىلىعىن، سونداي-اق كەلىسسوزدەر پروتسەسىنىڭ قاجەتتىلىگىن اتاپ ءوتتى.

كيريلل بوجكونىڭ قاتىسۋىمەن «YouTube» ارناسىنداعى رەزونانستىق بەينەتۇسىرىلىم ماسەلەسىن تالقىلاي وتىرىپ، ساراپشىلار مۇنداي مالىمدەمەلەرگە جول بەرمەۋ تۋرالى ايتتى.

بۇل فاكتىنى ارانداتۋشىلىق رەتىندە باعالاپ، قۇزىرلى ورگاندار تاراپىنان قۇقىقتىق باعالاۋ قاجەتتىگى جانە بۇل جەردە قىلمىس قۇرامى انىق بار ەكەندىگى اتاپ ءوتىلدى. مۇنداي ارانداتۋشىلىق مالىمدەمەلەر الەۋمەتتىك جەلىلەردە ودان ءارى تارالماۋى ءۇشىن ءوز ۇستانىمىمىزدى ناقتى كورسەتىپ، جۇمىستى كۇشەيتۋىمىز كەرەك دەگەن پىكىرلەر دە ايتىلدى.

سونىمەن قاتار، ساراپشىلار ازاماتتاردى مەدياساۋاتتىلىققا وقىتۋعا دەگەن قاجەتتىلىكتىڭ ارتىپ كەلە جاتقانىن اتاپ ءوتتى. قازىرگى زامانعى جاعدايلار قوعامدىق قاۋىپسىزدىكتى ساقتاۋ ماقساتىندا وسىنداي جايلاردىڭ الدىن الۋدى كوزدەيتىن قۇقىقتىق نورمالاردى ەنگىزۋ قاجەتتىلىگىن بەلگىلەدى.

«Nur Otan» قوعامدىق ساياسات ينستيتۋتى ديرەكتورىنىڭ ورىنباسارى ەدىل وسپان بۇل بەينەروليكتى قاراعانداردىڭ ءبارى، سونداي-اق كيريلل بوجكونىڭ ءوزى دە اقپاراتتىق سوعىستىڭ ناتيجەسىندە زارداپ شەكتى دەپ سانايدى. ونىڭ ايتۋىنشا، زاڭنامالىق بازانى تەكسەرىپ، ونى وزگەرگەن جاعدايعا سايكەستەندىرۋ قاجەت. قوعامدا ينكليۋزيۆتى يدەيالاردى، ءارتۇرلى ادامدار مەن پىكىرلەردى قابىلداۋ مەن قۇرمەتتەۋدى قالىپتاستىرۋ، ديالوگ مادەنيەتىن دامىتۋ ماڭىزدى.

ۇيىمداستىرۋشىلاردىڭ ايتۋىنشا، ساراپتاما الاڭى فورماتىنداعى ەتنوساياسي ديسكۋرس تۇراقتى تۇردە ءوتىپ، ەتنوسارالىق قاتىناستار ماسەلەلەرىن اشىق تالقىلاۋعا باعىتتالاتىن بولادى.

قر اقدم ءباسپاسوز قىزمەتى

Abai.kz