ءماجىلىس توراعاسى نۇرلان نىعماتۋلين ۇستازداردى كاسىبي مەرەكەسىمەن قۇتتىقتادى.

«ۇستازداردى كاسىبي مەرەكەمەن قۇتتىقتايمىن! وسىنداي قيىن كەزەڭدە دە سىزدەر ۇرپاققا ءبىلىم بەرىپ، ەل بولاشاعى ءۇشىن ايانباي ەڭبەك ەتىپ كەلەسىزدەر. سىزدەرگە العىسىمىز شەكسىز. بارشاڭىزعا زور دەنساۋلىق، ىرىس-قۇت، بەرەكە تىلەيمىن!» - دەدى نۇرلان نىعماتۋلين ءوزىنىڭ Twitter -دەگى پاراقشاسىندا.

سونىمەن قاتار، پالاتا سپيكەرى پارلامەنتتە «پەداگوگ مارتەبەسى تۋرالى» ارنايى زاڭنىڭ قابىلدانعانىن، ول زاڭ مۇعالىمدەردىڭ مارتەبەسىن كوتەرىپ، الەۋمەتتىك جاعدايىن ارتتىرۋعا ىقپال ەتكەنىن اتاپ ءوتتى.

ايتا كەتسەك، قازان ايىنىڭ العاشقى جەكسەنبىسىندە قازاقستاندا مۇعالىمدەردىڭ كاسىبي مەرەكەسى اتاپ وتىلەدى.

بۇل اتاۋلى كۇن 1965 جىلى 29 قىركۇيەكتە كسرو جوعارعى كەڭەسى پرەزيديۋمىنىڭ بۇيرىعىمەن بەلگىلەنگەن. بۇگىنگى تاڭدا قازاقستان، بەلارۋس، لاتۆيا جانە ۋكراينا مۇعالىمدەر كۇنىن قازاننىڭ العاشقى جەكسەنبىسىندە اتاپ وتەدى. ال كورشىلەس وزبەكستان – 1 قازاندا، قىرعىزستان، ازەربايجان، رەسەي، تاجىكستان، ارمەنيا، مولداۆيا، ەستونيا جانە ليتۆا – ۇستازدار مەرەكەسىن 5 قازان كۇنىنە بەكىتكەن.

Abai.kz