مەملەكەت باسشىسى قاسىم-جومارت كەمەلۇلىنىڭ جارلىعىنا سايكەس  رەسپۋبليكامىزدا قازاقتىڭ باس اقىنى اباي قۇنانبايۇلىنىڭ 175 جىلدىق جانە ۇلى ويشىل، شىعىستىڭ اريستوتەلى اتانعان ابۋ ناسىر ال-ءفارابيدىڭ 1150 جىلدىق مەرەيتويى اتاپ وتىلۋدە. قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترى ءوزىنىڭ 87 ماۋسىمىن وسى ۇلى تۇلعالاردىڭ شىعارماشىلىعىمەن ساباقتاستىرىپ كونتسەرتتەر وتكىزۋدى جوسپارلاۋدا. 

ەلباسى ن.ءا. نازارباەۆتىڭ «قازاقتىڭ ءىنجۋ – مارجانى» - دەپ اتاعان وركەستر بۇگىندە بۇكىل الەمگە حالقىمىزدىڭ مۋزىكالىق ونەرىن، بىرەگەي مۋزىكالىق اسپاپتارىن جانە ۇلى دالا اۋەنىنىڭ پاك سۇلۋلىعىن تانىتىپ جۇرگەن ونەر ورداسى.

وركەستردىڭ جوعارى ورىنداۋشىلىق شەبەرلىگى تىڭدارمان قاۋىمنىڭ سۇيىسپەنشىلىگىن تۋدىرىپ، ولاردى حالقىمىزدىڭ باي مۋزىكالىق مۇرالارىمەن، وتاندىق جانە الەمدىك كلاسسيكالىق وزىق مۋزىكا ۇلگىلەرىمەن سۋسىنداتىپ كەلەدى.

87-ءشى كونتسەرتتىك ماۋسىمنىڭ اشىلۋ ءراسىمى ەلىمىزدە ورىن العان كارانتيندىك جاعدايعا بايلانىستى وركەستردىڭ الەۋمەتتىك جەلىدەگى پاراقشالارى ارقىلى ونلاين تۇردە وتەدى.

ءىس-شاراعا قۇرمانعازى وركەسترىمەن بىرگە رەسپۋبليكالىق كونكۋرستاردىڭ لاۋرەاتتى: سالتانات امان، ايدوس جاباعين، راحات سارسەنوۆ ت.ب. قاتىسادى.  كونتسەرتتىك باعدارلامادا ءتول شىعارمالارىمىز كەڭىنەن ورىندالاتىن بولادى. 

وركەستردىڭ باس ديريجەرى – «دارىن» مەملەكەتتىك جاستار سىيلىعىنىڭ لاۋرەاتى – ابىلاي تىلەپبەرگەن.

ءىس-شارا قۇرمانعازى وركەسترىنىڭ الەۋمەتتىك جەلىدەگى پاراقشالارىندا (kurmangazy orkestr) پاراقشالارىندا وتەدى 

ۋاقىتى: 9 قازان، ساعات 20:00-دە.

Abai.kz