رەسەيدىڭ ريازان قالاسى ماڭىنداعى اسكەري ءبولىمنىڭ اۋماعىندا وق-ءدارى قويماسى جارىلىپ، ەكى تۇرعىن اۋرۋحاناعا جەتكىزىلدى. جارىلىستان زارداپ شەككەن ايەل ادامنىڭ جاعدايى اسا اۋىر ەكەنى ايتىلعان. بۇل تۋرالى ريا نوۆوستي مالىمدەدى. 

بەلگىلى بولعانداي، كۇندىز ساعات 13.20 شاماسىندا ريازان وبلىسىنىڭ جەلتۋحينو ەلدى مەكەنى ماڭىنداعى باتىس اسكەري وكرۋگىنىڭ سناريادتار قويماسى اۋماعىندا ءشوپ ورتەنگەن. ءورت بىرتىندەپ ارتيللەريالىق قارۋ-جاراق قويماسىنا قاراي جايىلىپ كەتكەن.

وقيعاعا بايلانىستى «كاسپي» فەدەرالدىق تاسجولى جابىلعان.

اسكەري وكرۋگتىڭ ءباسپاسوز قىزمەتى وت تيگەن وق-دارىلەردىڭ ءاربىر 5-10 سەكۋند سايىن جارىلىپ جاتقانىن مالىمدەدى.

«اسكەري ءبولىمنىڭ شتاتتىق ءورت ءسوندىرۋ ءبولىمى وتتى اۋىزدىقتاۋعا تىرىسقانىمەن، ءورتتى توقتاتۋ مۇمكىن بولماي قالدى. وق-دارىلەر جارىلىسىنان زارداپ شەككەن ەكى تۇرعىن سكوپينسكىدەگى ايماقارالىق مەديتسينالىق ورتالىققا جەتكىزىلدى. شامامەن، 45 جاستاعى ايەل ادام اۋىر جاعدايدا جانساقتاۋ بولىمىنە جاتقىزىلدى. ول باسسۇيەك-مي جاراقاتىن العان. ال 53 جاستاعى ەر ادام ورتاشا اۋىر جاعدايدا تراۆماتولوگيالىق بولىمگە جاتقىزىلدى»، – دەلىنگەن اگەنتتىك حابارلاماسىندا.

قازىرگى ۋاقىتتا جارىلىس بولىپ جاتقان اۋماقتان 3 شاقىرىم قاشىقتىقتا ورنالاسقان اۋىل تۇرعىندارى قاۋىپسىز جەرگە كوشىرىلدى.

Abai.kz