مەملەكەت باسشىسى قاسىم-جومارت توقاەۆ «Birgemiz» اتتى ەرىكتىلەردىڭ فرونت-كەڭسەسىن اشۋ سالتاناتىندا «ەرىكتىلەر» دەگەن ۇعىمنىڭ ەل ساناسىنا ءسىڭۋى قاجەتتىگىن، ەرىكتى بولۋدىڭ ماڭىزدىلىعىن باسا ايتقان بولاتىن.

«ەرىكتى بولۋ، يگى ىستەرمەن اينالىسۋ، جۇرتقا جاقسىلىق جاساۋ – قازاق دەيتىن حالىقتىڭ قانىنا سىڭگەن قاسيەت. حالقىمىزدىڭ كونەدەن كەلە جاتقان ءداستۇرى. بۇگىنگى ءبىز وسى ءداستۇردى ساقتاپ قالۋىمىز كەرەك! قازاقتا ەلدى بىرلىككە، بەرەكەگە شاقىراتىن «اسار» دەيتىن جاقسى ءداستۇر بار. بۇل عاسىردان-عاسىرعا جالعاسىپ كەلە جاتقان، قۇندىلىعىن جويماعان اسىل ءداتۇر، اتا سالتىمىز. قازاق: «جۇمىلا كوتەرگەن جۇك جەڭىل» دەيدى. ۆولونتەرلىك ەڭبەكتىڭ دە باستى دەۆيششزى وسى! كۇش بىرىكتىرە وتىرىپ حاىققا قىزمەت ەتۋ»، دەگەن ەدى پرەزيدەنت.

ال بيىل قر اقپارات جانە قوعامدىق دامۋ مينيسترلىگى جانىنداعى «ازاماتتىق باستامالاردى قولداۋ ورتالىعى» ەرىكتىلەر ۇيىمدارىن قولداۋ بويىنشا بىرقانشا شارۋالار اتقارىپ كەلە جاتقانىن ايتا كەتكەنىمىز ءجون بولار. ءسوزىمىزدىڭ ءبىر مىسالى، «ازاماتتىق باستامالاردى قولداۋ ورتالىعى» «Birgemiz Qamqor» جوباسىنىڭ اياسىندا 68 ەرىكتى ازاماتقا 300 000 تەڭگە كولەمىندە گرانتتار بولگەن ەكەن. اتالعان گرانت يەگەرلەرىنىڭ قاتارىندا تاراز جاستارىنىڭ «اق سۇڭقار» قوعامدىق بىرلەستىگىنىڭ ۆولونتەرلەرى دە بار. وسى رەتتە ءبىز اتالمىش بىرلەستىك توراعاسى ەركىن قايىربەكۇلى ابديەۆتى از-كەم اڭگىمەگە تارتقان ەدىك.

- ەركىن قايىربەكۇلى، «اق سۇڭقار» جاستار قوعامدىق بىرلەستىگىنىڭ ەرىكتىلەرى جۋىردا قر اقپارات جانە قوعامدىق دامۋ مينيسترلىگىنىڭ ىنتالاندىرۋ گرانتىن ۇتىپ الدى.  سىز باسقارىپ وتىرعان «اق سۇڭقار» قوعامدىق بىرلەستىگى ءدال قازىر قانداي باعىتتا جۇمىس اتقارىپ جاتىر؟

- باستاپقىدا قوعامدىق بىرلەستىكتىڭ ماقساتى - قاراپايىم حالىق پەن جەرگىلىكتى اتقارۋشى ورگاندار اراسىندا بايلانىس ورناتۋعا، جاستاردىڭ باستامالارىن قولداۋعا، جاستاردىڭ قوعامدىق، قۇقىقتىق، ساياسي ساۋاتتىلىعىن ارتتىرۋعا، جاستاردىڭ بويىندا كوشباسشىلىق قاسيەتتەردى قالىپتاستىرۋ مەن ولاردىڭ اراسىندا پاتريوتتىق سەزىمدى قالىپتاستىرۋعا باعىتتالعان ەدى. سوڭعى جىلدارى بىرلەستىكتىڭ ماقساتى مەن مىندەتتەرىنە تولىقتىرۋلار ەنگىزىپ، ۆولونتەرلىق باستامالاردى جۇزەگە اسىرۋعا، مەملەكەتتىك گرانتتاردى جاستارعا كەڭىنەن ناسيحاتتاپ، ونى جۇزەگە اسىرۋعا كوڭىل ءبولىپ كەلەمىز. قازىرگى ۋاقىتتا بىرلەستىكتىڭ جانىنان «سۇڭقار» ۆولونتەرلىق قوزعالىسى قۇرىلىپ، ەرىكتىلەر جۇمىسى ۇيىمداستىرىلدى.

- نە ءۇشىن وسى ۆولونتەرلىك جولدى تاڭدادىڭىز؟ العاشقا كەزدەر قانداي بولدى؟ 

- جالپى ۆولونتەرلىق قانىمىزعا سىنگەن قاسيەتتىڭ ءبىرى دەپ سانايمىن. اتا بابامىزدىڭ  «قايىرىمى بار  قازاقپىز»، «جەتىم كورسەڭ جەبەي ءجۇر» دەگەن سوزدەرى جادىمىزدا ساقتالعان. ەرىكتىلىككە كوللەدجدە 1 كۋرستا وقىپ جۇرگەن كەزىمدە كەلدىم. «جاس وتان» جاستار قاناتىنان ارداگەرلەر جايلى اقپارات الىپ، ولارعا قولقابىس ەتۋگە باردىق. قار ەرىپ جاتقاندىقتان اياقتارىمىز مالمانداي سۋ بولدى. ءتۇس اۋا كۇن كەنەتتەن سۋىتىپ كەتكەندىكتەن قارتتاردىڭ ۇيىنە ابدەن توڭىپ باردىق. ارداگەرلەرىمىز ءبىزدى جىلى شىرايمەن، ىستىق ءشاي، كامپيتتەرىمەن قارسى الدى. ءبىزدىڭ جاساعان قامقورلىعىمىزعا العىستارىن ايتىپ، باتالارىن بەردى. شارشاعانىمىزدى ۇمىتىپ، ويناپ كۇلىپ بىزگە بەرىلگەن تاپسىرمانى ورىنداپ قايتتىق. سول كۇنى كەۋدەمدى مەنىڭ قوعامعا پايدام ءتيدى دەگەن ماقتانىش كەرنەدى. وسىلايشا ۆولونتەرلىق جولعا كەلىپ قازىر نەشە ءتۇرلى الەۋمەتتىك وسال توپتاعى ادامدارمەن جۇمىس جاساپ، حالىقتىڭ باتاسىن الا وتىرىپ، وزىمىزگە ۇلكەن جىگەر الۋدامىز.

- «سۇڭقار» ۆولونتەرلىق قوزعالىسىنىڭ قۇرامىندا قازىر قانشا ادام بار؟ ۆولونتەرلىك قىزمەتكە بولىنەتىن گرانتتار جونىندە نە ايتاسىز?

- قازىرگى كەزدە بىرلەستىكتە 50 ادام ۆولونتەرلىق قىزمەت اتقارۋدا. بولاشاقتا ولاردىڭ سانىن 300-گە جەتكىزۋدى جوسپارلاپ وتىرمىز. بۇل ۇيىمنىڭ جۇمىسىن وڭتايلاندىرىپ، الەۋمەتتىك وسال توپتارعا ارنالعان كومەكتەردى جۇيەلى، ءارى كەڭىنەن جاساۋعا مۇمكىندىك بەرەدى. وسى ۋاقىتقا دەيىن ۆولونتەرلاردىڭ كوبى مەملەكەتتىك گرانتتاردى جەڭۋگە كۇدىكپەن قارايتىن. الايدا، تاباندى جۇمىستاردىڭ ارقاسىندا جەتىستىككە جەتۋگە بولاتىندىعىنا ولاردىڭ كوزدەرى جەتتى. «Birgemiz Qamqor» جوباسىنىڭ اياسىندا ءبىز بىرقاتار جۇمىستاردى اتقارۋدى جوسپارلاپ وتىرمىز. قازىرگى ۋاقىتتا شالا تۋعان بالالارعا توقىلعان كيىم تابىلمايدى. سول كيىمدەردى تىككىزىپ تاراتامىز. قارتتاردى ساياباقتارعا اپارىپ سەرۋەندەتۋ، مەديتسينالىق ورتالىقتارعا قان تاپسىرۋ سياقتى جوبالار جۇزەگە اسىرىلادى.

- اڭگىمەڭىزگە راحمەت!

Abai.kz