مەملەكەت باسشىسىنىڭ مالىمدەمەسى 9 قازانعا قاراعان ءتۇنى پرەزيدەنتتىڭ رەسمي سايتىندا جاريالاندى. وندا سوورونباي جەەنبەكوۆ "ەلىندەگى ساياسي جاعداي ۋشىعىپ كەتكەنىن" اتاپ وتكەن.

"جاعدايدى رەتتەۋ ءۇشىن ءبىز كەلەسى قادامدارعا بارۋىمىز كەرەك. جوگوركۋ كەڭەشكە وتكەن سايلاۋ ناتيجەسىن جويۋ كەرەك. جاڭادان پارلامەنت سايلاۋىنىڭ ۋاقىتىن بەلگىلەۋىمىز كەرەك. بۇعان قاتىستى شەشىمدى وسك قابىلدايدى", – دەدى پرەزيدەنت.

ول سونىمەن بىرگە قازىرگى ۇكىمەت باسشىسى مەن مۇشەلەرىن وتستاۆكاعا جىبەرۋ كەرەك دەدى.

"جاڭا پرەمەر-ءمينيستردى تاعايىنداپ، ۇكىمەت قۇرامىن جاساقتاۋدى زاڭدى ەتۋ ءۇشىن جوگوركۋ كەڭەشتىڭ قاۋلىسى مەن پرەزيدەنت جارلىعى كەرەك. مەن ءتيىستى جارلىققا قول قويۋعا دايىنمىن. جوگوركۋ كەڭەشتىڭ قاۋلىسىن كۇتەمىن", - دەدى مەملەكەت باسشىسى.

ول جوگوركۋ كەڭەش دەپۋتاتتارى مىندەتىن اتقارۋ ءۇشىن قۇقىق قورعاۋ ورگاندارىنىڭ وكىلدەرى ولاردىڭ قاۋىپسىزدىگىن قامتاماسىز ەتۋى ءتيىس دەپ اتاپ ءوتتى.

"مەن ءۇشىن مەملەكەت تۇتاستىعىنان، حالىق بىرلىگىنەن جانە قوعام تىنىشتىعىنان ارتىق لاۋازىم جوق. بىزگە بارىنشا تەزدەتىپ زاڭ جولىنا ءتۇسۋىمىز كەرەك. اتقارۋشى بيلىكتىڭ زاڭدى جەتەكشىلەرى بەكىتىلگەننەن كەيىن، مەن قىرعىزستان پرەزيدەنتى قىزمەتىمنەن كەتۋگە دايىنمىن", - دەدى سوورونباي جەەنبەكوۆ.

5 قازاندا پارلامەنت سايلاۋىنىڭ ناتيجەسى جاريالانعاننان كەيىن قىرعىزستاندا جاپپاي نارازىلىق شاراسى باستالدى. پارلامەنتكە وتپەي قالعان وپپوزيتسيالىق پارتيالاردىڭ ليدەرلەرى مەن جاقتاستارى ميتينگكە شىقتى. ولار اكىمشىلىك عيماراتتاردى باسىپ الىپ، تۇرمەدە وتىرعان بىرقاتار ساياساتكەرلەردى بوساتتى. 6 قازاندا ورتالىق سايلاك كوميسسياسى سايلاۋ ناتيجەسىنىڭ كۇشىن جويدى.

ەلدە تولقۋ باستالعاننان بەرى قىرعىز پرەزيدەنتى حالىق الدىنا شىقپادى. قازىر ونىڭ قايدا ەكەنىن ەشكىم بىلمەيدى. پرەزيدەنتتىڭ ءباسپاسوز حاتشىسى تولعاناي ستاماليەۆا ونىڭ بىشكەكتە ەكەنىن، ەشقايدا كەتپەگەنىن مالىمدەدى.

قىرعىزستانداعى بىرقاتار ساياسي كۇشتەر پرەزيدەنتكە يمپيچمەنت جاريالاۋ ماسەلەسىن كوتەرىپ جاتىر.

Abai.kz