قازاقستان رەسپۋبليكاسى مادەنيەت جانە سپورت مينيسترلىگى ءتىل ساياساتى كوميتەتى 2020 جىلعى 13 قازان كۇنى ورفوگرافيالىق جۇمىس توبىنىڭ ونلاين وتىرىسىن وتكىزدى.

مەملەكەت باسشىسى ق.توقاەۆتىڭ 2019 جىلدىڭ 21 قازانىنداعى تاپسىرماسىنا وراي، لاتىننەگىزدى قازاق ءالىپبيىن جەتىلدىرۋ بويىنشا ۇلتتىق كوميسسيا جانىنداعى ورفوگرافيالىق، ادىستەمەلىك، ساراپتاما جانە تەحنيكالىق جۇمىس توپتارى مەن تاۋەلسىز ساراپشىلار بەكىتىلگەن الىپبيگە قاتىستى بىرنەشە رەت رەسمي وتىرىستار ۇيىمداستىرىپ، تالقىلاۋ، ساراپتاۋ جۇمىستارىن جۇرگىزىپ كەلەدى. سونىڭ بارىسىندا قازاق ءتىلىنىڭ ءالىپبي ءتۇزۋ قاعيداتتارىنا جانە حالىقارالىق UNICODE جۇيەسىنە سايكەستىگى ساراپتالىپ، دياكريتيكالىق بەلگىلەر تاڭدالدى. ونلاين باس قوسۋدىڭ وزەكتىلىگى: لاتىننەگىزدى الىپبيگە كوشۋ ءۇردىسى قورىتىندى كەزەڭگە تايادى.

وسى سەبەپتى كۇن تارتىبىندەگى ماسەلە وتە وزەكتى.

شارا بارىسىندا ءالىپبي جوباسىنداعى دياكريتيكالىق بەلگىلەردىڭ تيىمدىلىگى مەن بىرىزدىلىگىن تالقىلاۋ جانە ءالىپبي نۇسقاسىن اپروباتسيادان وتكىزۋ ءجايى قارالدى.

اۋەلگى كەزەكتە ءالىپبيدىڭ جاڭا جوباسىنداعى دياكريتيكالىق تاڭبالاردى بىرىزدەندىرۋ ماسەلەسى جونىندە ا.بايتۇرسىنۇلى اتىنداعى ءتىل ءبىلىمى ينستيتۋتىنىڭ ديرەكتورى، فيلولوگيا عىلىمدارىنىڭ كانديداتى انار فازىلجانوۆا جان-جاقتى بايانداپ بەردى.

تۇركىتىلدەس ەلدەر اراسىندا لاتىن قارپىنە بۇرىننان كوشكەندەر بار. ءبىرازىندا اجەپتاۋىر پراكتيكا قالىپتاستى. دياكريتيكالاردى قولدانۋ بارىسىنداعى وسىنداي حالىقارالىق تاجىريبە ءبىراز ماسەلەنىڭ وڭ شەشىم تابۋىنا سەبەپشى بولا الادى.

شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ جەتەكشى عىلىمي قىزمەتكەرى، فيلولوگيا عىلىمدارىنىڭ كانديداتى گۇلفار مامىربەك اتالمىش باعىتتى ءوز تالداۋىندا ناقتى مىسالدار ارقىلى جەتكىلىكتى قامتىدى.

جارىسسوزگە قاتىسقان سالا عالىمدارى ءار دياكريتيكالىق بەلگىلەردىڭ فونەتيكالىق جانە گرافيكالىق نەگىزدەمەسىن تالقىلاۋعا كوڭىل ءبولىپ، ءالىپبي جوباسىنداعى دياكريتيكالىق بەلگىلەردىڭ دىبىستىق ءماندى دۇرىس بەرۋ فۋنكتسياسىن سارالادى، ءالىپبي جوباسىنداعى دياكريتيكالىق بەلگىلەردىڭ جۇيەلىگىنە باسا نازار اۋداردى.

بۇدان باسقا ءالىپبي جوباسىنىڭ جازىلىم مەن وقىلىم جۇيەسىندەگى ارتىقشىلىعى مەن كەمشىلىگىن عىلىمي-ادىستەمەلىك تۇرعىدان انىقتاۋ ماقساتىندا وتكىزىلەتىن اپروباتسيا ناتيجەلەرىن تالقىلاۋ مەن دياكريتيكالاردىڭ حالىقارالىق تاجىريبەدەگى قولدانىلۋىن تالداۋ تۋرالى ۇسىنىسقا قىزۋ قولداۋ كورسەتتى.

Abai.kz