بەلارۋس پرەزيدەنتتىگىنە ۇمىتكەر بولعان، قازىرگى پرەزيدەنت الەكساندر لۋكاشەنكونىڭ باستى وپپونەنتى سۆەتلانا تيحانوۆسكايا 25 قازان كۇنى لۋكاشەنكو بيلىگىنە قارسى «حالىقتىق ۋلتيماتۋم» جاريالايتىنىن مالىمدەپ، ءۇش تالاپ قويدى.

تيحانوۆسكايانىڭ تالابى بويىنشا:

- لۋكاشەنكو 13 كۇن ىشىندە وتستاۆكاعا كەتۋى ءتيىس،

- كوشەدەگى زورلىق-زومبىلىق تولىعىمەن توقتاۋى كەرەك،

- بارلىق ساياسي تۇتقىندار بوساتىلۋى ءتيىس.

ەگەر اتالعان تالاپتار 25 قازانعا دەيىن ورىندالماسا، وندا «حالىقتىق ۋلتيماتۋم» نەگىزىندە بۇكىل حالىق بەيبىت ميتينگىگە شىعادى.

«26 قازاندا بارلىق كاسىپورىنداردىڭ ۇلتتىق ەرەۋىلى باستالادى. بۇكىل  جولدار جابىلىپ، مەملەكەتتىك ساۋدا ورىندارىندا جۇمىس توقتايدى.  

سىزدە ءۇش شارتتى ورىنداۋ ءۇشىن 13 كۇن ۋاقىت بار. بىزگە دە دايىندالۋ ءۇشىن 13 كۇن بار. ال وسى ۋاقىت ىشىندە بەلارۋستار وزدەرىنىڭ بەيبىت ءارى تاباندى نارازىلىقتارىن جالعاستىرا بەرەتىن بولادى.

ءسىز بەلارۋسسيانىڭ رەجيمنەن دە كۇشتى ەكەنىن تۇسىنبەي، ءبىزدىڭ ەلدىڭ ءومىرىن كۇيرەتۋگە تىرىسىپ جاتىرسىز. ءسىز تاپسىرىس كۇتتىڭىز، مىنە، ەندى تاپسىرىس بار. ونىڭ ورىندالۋ مەرزىمى - 25 قازانعا دەيىن»،- دەپ جازدى تيحانوۆسكايا.

سونىمەن قاتار ول ءاربىر بەلارۋس ازاماتىن جۇيەگە قارسى شىعۋعا شاقىرادى.

ال، 10 قازان، سەنبى كۇنى بەلارۋس پرەزيدەنتى الەكساندر لۋكاشەنكو «بارلىعىنىڭ پىكىرىن تىڭداۋ» ءۇشىن وپپوزيتسيا جەتەكشىلەرىمەن تۇرمەدە كەزدەسكەن. لۋكاشەنكومەن كەزدەسۋگە بارلىعى 11 ادام قاتىسىپتى. ونىڭ ىشىندە بەلگازپرومبانكتىڭ ەكس-باسشىسى ۆيكتور باباريكو جانە ونىڭ ۇلى ەدۋارد باباريكو، ۇيلەستىرۋ كەڭەسىنىڭ تورالقا مۇشەسى، زاڭگەر ليليا ۆلاسوۆا جانە وپپوزيتسيا شتابىنىڭ ۇيلەستىرۋشىسى يۋري ۆوسكرەسەنسكيلار دا بولعان.

وپپوزيتسيالىق ۇيلەستىرۋ كەڭەسىنىڭ مۇشەسى پاۆەل لاتۋشكو بۇل كەزدەسۋدە پرەزيدەنت لۋكاشەنكو ۇستالعان وپپوزيتسيا ليدەرلەرىن «ساياسي تۇتقىندار» دەپ تانىعانىن ايتتى.

ال، سۆەتلانا تيحانوۆسكايا قاماۋعا الىنعان كۇيەۋىمەن سوڭعى ءتورت ايدا العاش رەت تەلەفون ارقىلى سويلەسۋگە رۇقسات العانىن جازعان. سونىمەن قاتار ول، لۋكاشەنكونىڭ مقك (كگب) تۇرمەسىندە وپپوزيتسيامەن كەزدەسۋىن «قىسىمنىڭ ناتيجەسى» دەپ جازدى.

«بۇگىنگى وقيعالار ءبىزدىڭ سىزدەرگە جاساعان قىسىمىمىزدىڭ ناتيجەسى. وسى كەزدەسۋدە لۋكاشەنكو بۇرىن قىلمىسكەر دەپ اتاعان ساياسي تۇتقىنداردىڭ بار ەكەنىن مويىندادى. بىراق، بۇل ءبىزدىڭ نارازىلىعىمىزدى السىرەتۋ ءۇشىن عانا جاسالادى. ءبىز جاڭا سايلاۋعا بەرىك ءارى بەيبىت جولمەن جۇرە بەرەمىز», - دەدى تيحانوۆسكايا.

بەلارۋستا 9 تامىز كۇنى وتكەن پرەزيدەنت سايلاۋىنان كەيىنگى نارازىلىقتار ءالى باسىلعان جوق. سايلاۋدىڭ رەسمي قورىتىندىسى لۋكاشەنكونىڭ پايداسىنا شەشىلگەنىمەن، حالىقارالىق ۇيىمدار مەن بەلارۋس وپپوزيتسياسى لۋكاشەنكونىڭ جەڭىسىن مويىندامايتىنىن مالىمدەدى.

Abai.kz