جالپى وتىرىسقا 62 دەپۋتات قاتىسقانى حابارلانعان. تاعى 12 دەپۋتات ءوزىنىڭ اتىنان داۋىس بەرۋگە سەنىم بىلدىرگەن ەكەن. داۋىس بەرۋ ناتيجەسىندە 80 بيۋللەتەن قولدانىلعان. يساەۆتىڭ سپيكەر بولۋىن قولداپ 78 دەپۋتات، قارسى ەكى دەپۋتات داۋىس بەرگەن.

قانات يساەۆ الدا وتەتىن پارلامەنت سايلاۋىنا قاتىسۋعا نيەتتى ەكەنىن جەتكىزدى. ونىڭ پىكىرىنشە، پرەزيدەنت سوورونباي جەەنبەكوۆ وتستاۆكاعا كەتۋى ءتيىس ەمەس.

«پرەزيدەنت ورنىندا قالۋى ءتيىس، قازىر جاعداي قيىن. كوبى سپيكەر پرەزيدەنت مىندەتىن اتقارا الادى دەيدى. بىراق تولىق ورنىن باسا المايدى. پرەزيدەنتتەن كەتپەۋىن سۇراۋىمىز كەرەك. بىزگە تۇراقتىلىق ورناتۋىمىز كەرەك»، – دەدى ول.

وسىنىڭ الدىندا ءبىر توپ دەپۋتاتتار سپيكەر ەتىپ تاعايىنداعان مىكتىبەك ابدىلداەۆ 10 قازاندا بۇل قىزمەتتەن باس تارتاتىنىن مالىمدەگەن.

ايتا كەتەيىك، 4 قازاندا قىرعىزستاندا پارلامەنت سايلاۋى وتكەن. وعان ۇزىن-ىرعاسى 16 ساياسي پارتيا قاتىسقان. سايلاۋدىڭ قورىتىندى ەسەپتەرى جاريالانعاننان باستاپ، ساياسي كۇشتەر بىشكەكتىڭ «الا-توو» الاڭىندا نارازىلىق اكتسيالارىن باستاعان. ونىڭ ارتى توڭكەرىسكە ۇلاسقان.

بىرنەشە كۇنگە سوزىلعان ساياسي توڭكەرىستەن سوڭ، قىرعىزستاننىڭ پرەمەر-ءمينيسترى، پارلامەنت سپيكەرلەرى مەن بىرنەشە قالانىڭ مەرلەرى ءوز ەرىكتەرىمەن دوعارىسقا كەتتى. سايلاۋدىڭ ناتيجەلەرى جويىلىپ، قايتا سايلاۋ وتكىزۋ تۋرالى شەشىم قابىلداندى. پارلامەنتكە وتپەي قالعان وپپوزيتسيا جەڭگەن پارتيالاردى «اكىمشىلىك رەسۋرستاردى پايدالاندى، داۋىستى ساتىپ الدى»، دەپ ايىپتاعان.

6 قازاندا، تۇندە نارازى حالىق «اق ءۇي» مەن پارلامەنتتى باسىپ العان. سول كۇنى نارازىلار تۇرمەدە وتىرعان بىرنەشە ساياساتكەردى قاماۋدان بوساتقان. ولاردىڭ اراسىندا ەكس-پرەزيدەنت المازبەك اتامباەۆ پەن ەكس-دەپۋتات سادىر جاپاروۆ تا بولدى.

10 قازاندا سادىر جاپاروۆ پرەمەر-مينيستر قىزمەتىنە بەكىتىلگەن. كەيبىر دەپۋتاتتار ونىڭ قىزمەتكە تاعايىندالۋىنىڭ زاڭدىلىعىنا كۇمان كەلتىرەدى.

بۇعان دەيىن سوورونباي جەەنبەكوۆ «مەملەكەت قۇقىقتىق جولعا ورالعان سوڭ پرەزيدەنت قىزمەتىنەن كەتۋگە دايارمىن»، دەگەن.

ەستەرىڭىزگە سالا كەتەيىك، وسىعان دەيىن بىرىككەن ۇلتتار ۇيىمى سوورونباي جەەنبەكوۆتى قىرعىزستاننىڭ لەگيتيمدى پرەزيدەنتى دەپ ساينايتىنىن مالىمدەگەن.

Abai.kz