جاقىندا كوروناۆيرۋس پاندەمياسى بىرنەشە ەلدە قايتادان كۇشەيە باستاعانى انىقتالدى. ءبىزدىڭ ەلدە قاتتى كۇشىنە ەنبەسە دە، ۆيرۋس جۇقتىرۋشىلار سانى ءسال كوبەيگەنى بايقالادى.

ەلىمىزدىڭ كەيبىر وڭىرىندە شەكتەۋ شارالارى كۇشەيتىلە باستادى. كەشە عانا سولتۇستىك قازاقستان وبلىسى مامليۋتكا قالاسى جانە ەسىل اۋدانىنىڭ ورتالىعى ياۆلەنكا اۋىلى 12 قازاندا كارانتينگە جابىلىپ، بلوكبەكەتتەر قويىلاتىنى حابارلاندى. سونداي-اق، نۇر-سۇلتان قالاسىندا دا كارانتيندىك شارالار كۇشەيتىلىپ جاتىر.

وسىعان بايلانىستى كوپشىلىكتى ەلدە تاعى دا توتەنشە جاعداي جاريالانا ما دەگەن سۇراق مازالاعانى انىق. دەنساۋلىق ساقتاۋ ءمينيسترى الەكسەي تسوي وسى سۇراققا ءوزى جاۋاپ بەردى.

- مۇنىڭ بارلىعى ەپيدەميولوگيالىق جاعدايعا بايلانىستى. ەگەر جاعداي مۇنى قاجەت ەتسە، ول ەنگىزىلەدى. بىراق ءبىز قازىر قازاقستانداعى تۇراقتىلىقتى ساقتايمىز دەپ ۇمىتتەنەمىز، ويتكەنى ءاربىر ازامات جاپپاي ءىس-شارالار ۇيىمداستىرماي، قاشىقتى ساقتاي وتىرىپ، ماسكا تاعىپ، حالىقتى قورعاۋعا بىرلەسىپ اتسالىسادى. ەگەر مۇنىڭ ءبارى جاسالسا، وندا ءبىز كارانتينسىز شىعۋىمىز مۇمكىن, - دەدى تسوي.

ەڭ جاڭا مالىمەتتەرگە سۇيەنسەك، الەمدە كوروناۆيرۋس جۇقتىرعانداردىڭ جالپى سانى 38 ميلليوننان استى. ونىڭ ىشىندە 26 ميلليوننان استام ادام اۋرۋدى جەڭدى. دجونس حوپكينس ۋنيۆەرسيتەتىنىڭ مالىمەتتەرى بويىنشا قۇرباندار سانى 1 ميلليون 85 مىڭ ادامعا جەتكەن. ۆيرۋس جۇقتىرعاندار ەڭ كوپ تىركەلگەن 4 ەل - اقش، ءۇندىستان، برازيليا جانە رەسەي.

ايتا كەتەيىك، ەل حالقىنىڭ قاۋىپسىزدىگىن قامتاماسىز ەتۋ ماقساتىندا قازاقستاندا 2020 جىلى 16 ناۋرىزدان باستاپ توتەنشە جاعداي جاريالانعان بولاتىن. ەل اۋماعىنداعى توتەنشە جاعداي رەجيمى 11 مامىردا اياقتالادى.

Abai.kz