ەلوردانىڭ كوشى-قون پوليتسياسى كسرو تولقۇجاتىن دەر ۋاقىتىندا اۋىستىرماعان 18 ازاماتتى انىقتادى. 

سونىمەن قاتار جاسى 18-دەن اسقان ەلوردانىڭ 30 تۇرعىنى جەكە كۋالىك الۋ ءۇشىن كوشى-قون قىزمەتىنە جۇگىنبەگەن.

«مۇنداي تۇلعالاردى انىقتاۋ بەلگىلى ءبىر دەڭگەيدە قيىندىق تۋدىرادى. ويتكەنى، قازاقستان ازاماتى ەكەندىگىن ايقىنداۋ جانە ودان ارى جەكە كۋالىك راسىمدەۋ ءۇشىن ادام ءوزى كەلۋى ءتيىس. كەڭەستىك تولقۇجاتپەن جۇرگەندىگى جانە جەكە كۋالىگى جوق ەكەندىگى انىقتالعان تۇلعالاردىڭ بارلىعىنا ولاردىڭ مارتەبەسىن انىقتاۋ ءارى قازاقستان ازاماتىنىڭ قۇجاتىن راسىمدەۋ كومەگى كورسەتىلدى»، - دەدى كوشى-قون پوليتسياسىنىڭ باسشىسى ارمان بايمۇحامبەت.

ماسەلەن، نۇر-سۇلتان قالالىق پوليتسيا دەپارتامەنتى مالىمەتىنشە، پوليتسياعا 1956 جىلى بەلارۋستا العان تولقۇجاتىن اۋىستىرماعان 81 جاستاعى ايەل جۇگىندى. 1957 جىلى تىڭعا كەلگەن ول سول ۋاقىتتان بەرى قازاقستاندا تۇرىپ جۇمىس ىستەگەن. تولقۇجاتى مەن تۋ تۋرالى كۋالىگىن جوعالتىپ الۋىنا بايلانىستى قۇجاتتارىن راسىمدەي الماعان. ەلوردانىڭ كوشى-قون قىزمەتىنىڭ قىزمەتكەرلەرى «قازاقستان رەسپۋبليكاسىنىڭ ازاماتتىعى تۋرالى» زاڭعا سايكەس ازاماتشانىڭ قۇقىقتىق مارتەبەسىن انىقتاپ، وعان جەكە كۋالىك جاساپ بەرگەن.

Abai.kz