قازاقستان رەسپۋبليكاسى مادەنيەت جانە سپورت مينيسترلىگى ءتىل ساياساتى كوميتەتىنىڭ توراعاسى ادىلبەك قابا 2020 جىلعى 16 قازان كۇنى ونلاين رەجىمدە ەلىمىزدەگى بەلگىلى انيماتسيالىق فيلم ازىرلەۋشىلەرمەن كەزدەستى.

انيماتسيالىق فيلم ازىرلەۋشى، دۋبلياجبەن اينالىساتىن كومپانيا باسشىلارى مەن تانىمال رەجيسسەرلەر باس قوسقان بۇل جۇزدەسۋ ءمانىسىن ادىلبەك كۇنەسحانۇلى بىلاي دەپ اتاپ كورسەتتى: «باستى ماقساتىمىز  – قازاق تىلىندە بۇگىن تاڭدا كەڭ ءورىس العان شەتەلدىك انيماتسياعا ۇقساس جەڭىل ءارى قىزىقتى، تارتىمدى وتاندىق ۇلتتىق ءونىم دايىنداۋ، ءسويتىپ ەرتەڭگى بولاشاعىمىز بالالار تاربيەسىنە بەلسەنە اتسالىسۋ. ينديادا ءبىر كەزدەرى كينو سالاسىنىڭ ماماندارى باس قوسىپ، الەم كورەتىن دۇنيە جاساۋىمىز كەرەك دەپ اقىلداسقان ەكەن، سوڭى اتىشۋلى بولليۆۋدقا ۇلاسقانى بەلگىلى. سول سەكىلدى انيماتسيا سالاسىنا سەرپىلىس اكەلەتىندەي ءىس-قيمىل قاجەت. جاسىراتىنى جوق، جاسوسپىرىمدەردىڭ قازىرگى ەڭ جاقسى «ويىنشىعى» – ۇيالى تەلەفون، قالا بەردى سىرتقى ورتا، عالامتور، يۋتۋب ارناسى تاربيەلەپ جاتىر.  ال قىزىقتى ءارى قولدانبالى كونتەنتتىڭ باسىم بولىگى ورىس تىلىندە بولعاندىقتان، قازىرگى جاس ۇرپاقتىڭ ويلاۋى دا، سويلەۋ ءتىلى دە ورىسشا بولىپ جاتقانىن بايقاپ ءجۇرمىز. وسى تۇرعىدان كەلگەندە سىزدەر – ۇلت تاربيەشىسىزدەر. تىڭعا تۇرەن سالعانداي، سوقپاقسىز جولدا كەلە جاتىرسىزدار، جىلدار وتە كەلە ارقايسىسىڭىزدىڭ ءىس-تاجىريبەلەرىڭىز كىتاپ بولىپ باسىلىپ، ەسىمدەرىڭىز سالا قارلىعاشتارىنىڭ قاتارىندا قۇرمەتپەن ايتىلاتىن شىعار. ەڭ باستىسى، بۇگىنگى تاڭدا ۇلت بولاشاعى جولىندا بىرىگىپ ءىس اتقارۋىمىز قاجەت».

بۇدان بەلگىلى بولعانداي، شارانىڭ كوزدەگەن ماقساتى – انيماتسيالىق فيلم ازىرلەۋدەگى وزەكتى ماسەلەلەر مەن ونى شەشۋ جولدارىن بىرلەسىپ قاراستىرىپ، وسى ورايداعى ۇسىنىستاردى جيناقتاپ، ساپالى دا ناتيجەلى جۇمىس اتقارۋعا قول جەتكىزۋ.

قازاق حالقى ەجەلدەن بالا تاربيەسىندە يننوۆاتسياعا ۇمتىلىپ وتىرعان. كەزىندە ايگىلى ابۋباكىر ديۆاەۆ: «...ەۋروپانىڭ ەگىز قوزىداي ۇقساس ويىنشىقتارىن الىپ قاراساڭىز، ەش ماعىنا بىلدىرمەيدى.  قازاق دالاسىنداعى بالالار ويناپ جۇرگەن دۇنيە ۇلكەن فانتازيانىڭ جەمىسى»، – دەپ تاڭ قالعان ەكەن. ەندەشە، عىلىم مەن تەحنيكانىڭ دامىعان زامانىندا بالالار يگىلىگى ءۇشىن ونىڭ جەتىستىكتەرىن پايدالانباۋ ۇلكەن سىن ەمەس پە؟!

ادىلبەك كۇنەسحانۇلىنىڭ ايتۋىنشا، الەمدىك تاجىريبەدە جاپوندار انيماتسيانى سالت-ءداستۇرىن ناسيحاتتاۋعا ارناسا، امەريكاندىقتار جەكەلەگەن عىلىمي پاندەردى وسى ءادىستى قولدانۋ ارقىلى وقىتۋعا كوشكەن.

قازاقستاندا ءۇش ميلليون ءۇش ءجۇز وتىز جەتى مىڭنان استام وقۋشى قازاق تىلىندە ءبىلىم الىپ جاتىر ەكەن. وسىنشاما اۋديتوريانى قازاق تىلىندەگى انيماتسيالىق كونتەنتپەن قامتاماسىز ەتۋ كۇن تارتىبىندە تۇرعان وزەكتى ماسەلە.

«قازاقستان» رترك» اق «بالاپان» تەلەارناسىنىڭ ديرەكتورى ماقپال جۇماباي، ش.ايمانوۆ اتىنداعى «قازاقفيلم» اكتسيونەرلىك قوعامى «انيماتسيالىق كينو» شىعارماشىلىق بىرلەستىگىنىڭ جەتەكشىسى اداي ءابىلدا، «بولاشاق» كق «وزىڭنەن باستا» گولليۆۋد فيلمدەرىن دۋبلياجداۋعا باعىتتالعان جوبانىڭ جەتەكشىسى ورىنباەۆا ايىمگۇل مەلسقىزى، «ساق» كينوستۋدياسىنىڭ  رەجيسسەر-ستسەناريسى داۋرەنبەكوۆ باتىرحان ءوز ويلارىن ورتاعا سالدى.

سويلەۋشىلەر مەن پىكىر بىلدىرۋشىلەرگە قۇلاق تۇرسەك، قوعامدا مۋلتفيلم تۋرالى تۇسىنىك، وكىنىشكە وراي، بالالارعا ارنالعان كينوتۋىندى دەگەننەن ءارى اسپايدى. ال انيماتسياعا دەگەن سۇرانىستىڭ كۇنى ەندى تۋدى. تاپسىرىس بەرۋ كوزىن ۇلعايتۋ  سالا ماماندارىنىڭ ەركىن شىعارماشىلىقپەن اينالىسۋىنا جول اشادى، ونەردىڭ ءتۇرى رەتىندە ايشىقتالىپ داميدى.

بۇدان باسقا كادر دايىنداۋ ماسەلەسى وتكىر تۇر ەكەن.

قارجى، دايىن ونىمدەردى تاراتۋ جاعى دا تولعانتپاي قويمايدى.

بۇل ايتىلعانداردىڭ ءبارى كەزدەسۋ بارىسىندا ازىرلەنگەن قارار جوباسىنان كورىنىس تاپتى.

Abai.kz