2020 جىلعى 24 قازاننان باستاپ سەنبى كۇندەرى ساعات 17:00-گە دەيىن سوسو، ساۋدا ۇيلەرى، جابىق بازارلار جۇمىس ىستەي باستايدى. ال، 26 قازاننان باستاپ كينوتەاترلار اشىلادى.

قر پرەمەر-ءمينيسترى اسقار مامين قازاقستانداعى سانيتارلىق-ەپيدەميولوگيالىق احۋالعا قاتىستى بىرقاتار تاپسىرما بەرگەن. ناتيجەسىندە ۆەدومستۆوارالىق كوميسسيا بىرقاتار شەشىم قابىلداعان.

"بىرىنشىدەن، شەكارادان وتكىزۋ پۋنكتتەرىندە سانيتارلىق-ەپيدەميولوگيالىق باقىلاۋدى كۇشەيتىلەدى:

2020 جىلدىڭ 26 قازانىنان باستاپ شەت ەلدەردەگى ەپيدەميولوگيالىق احۋالدى ەسكەرۋمەن شەتەلگە ۇشاتىن اۋە رەيستەرىنىڭ سانىن قىسقارتۋ;

قازاقستان اۋماعىنا كەلگەندەردىڭ بارلىعىن (سونىڭ ىشىندە قر ازاماتتارىن), سونداي-اق ەكىجاقتى حالىقارالىق تاسىمالداردى جۇزەگە اسىراتىن جۇرگىزۋشىلەردى مىندەتتى پتر-تەستىلەۋدەن وتكىزۋ;

شەتەلدەن كەلۋشىلەرگە، ونىڭ ىشىندە قر ازاماتتارى ءۇشىن دە پتر تەستىدەن وتكەنى تۋرالى انىقتامانىڭ جارامدى مەرزىمىن 3 كۇنگە دەيىن بەلگىلەۋ", - دەلىنگەن حابارلامادا.

ەكىنشىدەن، 2020 جىلعى 19 قازاننان باستاپ قازاقستانداعى كوپتەگەن وڭىرلىك زەرتحانادا پتر-تەستىلەۋ قۇنى 9 مىڭ تەڭگەگە دەيىن تومەندەتىلدى.

ۇشىنشىدەن، اۋرۋ ءوسىمى بولماعان جاعدايدا، "جاسىل" تۇراقتى ەپيدەميولوگيالىق احۋالى بار وڭىرلەردە بيزنەس سۋبەكتىلەرىنىڭ قىزمەتىن كەزەڭ-كەزەڭمەن قايتا جانداندىرىلادى.

"2020 جىلعى 24 قازاننان باستاپ سەنبى كۇندەرى ساعات 17:00-گە دەيىن سوسو، ساۋدا ۇيلەرى، جابىق بازارلار جۇمىس ىستەي باستايدى. ال 26 قازاننان باستاپ كينوتەاترلار قاشىقتىقتى جانە ماسكا تاعۋ رەجيمىن ساقتاي وتىرىپ، 30%-دان اسپايتىن تولىعۋمەن جۇمىسىن قايتا باستايدى", - دەلىنگەن حابارلامادا.
تورتىنشىدەن، ەلىمىزدەگى شەكتەۋ شارالارى ساقتالادى.

"مەكتەپكە دەيىنگى بالالار مەكەمەلەرىنىڭ، بيليارد جانە كومپيۋتەر كلۋبتارىنىڭ، ويىن-ساۋىق مەكەمەلەرىنىڭ، بانكەت زالدارىنىڭ، تۇنگى كلۋبتاردىڭ قىزمەتىنە سالىنعان تىيىم ساقتالادى. وبلىسارالىق جولاۋشىلار تاسىمالدارىنا جانە ورتاق ۆاگونداردى قۇرۋعا تىيىم سالۋ جالعاسادى", - دەلىنگەن حابارلامادا.

Abai.kz