كوروناۆيرۋستىڭ ەكىنشى تولقىنى كەزىندە ءدارى-دارمەك جەتىسپەۋشىلىگى بولماس ءۇشىن ۇكىمەت وتاندىق ءدارى وندىرۋشىلەرگە ۇلكەن كولەمدە تاپسىرىس بەرىپ جاتىر. بۇل تۋرالى Baq.kz مالىمدەدى.

«سق-فارماتسيا» ءدارى تاپشىلىعىن بولدىرماس ءۇشىن قاجەتتى دارىلەردى ساتىپ الىپ جاتىر. ونىڭ ۇستىنە ءدارى وندىرۋشىلەرگە كەڭ كولەمدە تاپسىرىس بەرىپ جاتىر.

بۇگىن ۇكىمەت وتىرىسىندا قر يندۋستريا جانە يننوۆاتسيالىق دامۋ مينيسترلىگى ەلىمىزدە 96 كاسىپورىن ءدارى-دارمەك پەن مەديتسينالىق بۇيىم شىعارىپ جاتقانىن باياندادى.

ءدارى وندىرۋمەن اينالىساتىن «حيمفارم» اق-نىڭ اۋرۋحانا ءىسى جونىندەگى ديرەكتورى ايگۇل يسەنوۆا پاندەميا باستالعالى كاسىپورىن دامىلسىز جۇمىس ىستەپ جاتقانىن ايتادى.

- ءبىز كوروناۆيرۋستى ەمدەۋ حاتتاماسىنداعى بارلىق ءدارىنى وندىرەمىز. ءدارى-دارمەكتىڭ بارلىعىن قامتاماسىز ەتىپ وتىرمىز دەپ ايتا المايمىن، دەگەنمەن كوپ بولىگىن شىعارىپ جاتىرمىز. سق-فارماتسيا تاپسىرىس بەرگەن دارىلەردى كەلىسىلگەن كەستە بويىنشا جەتكىزىپ جاتىرمىز. بۇل دارىلەردى پاندەميا باستالعالى شىعارىپ كەلەمىز، سوڭعى كەزدە تاپسىرىس ۇلعايعان جوق. ءوندىرىس ورنى شىمكەنت قالاسىندا ورنالاسقان. قازىر دەمالىسسىز جۇمىس ىستەپ جاتىرمىز، - دەيدى ول.

مەديتسينالىق بۇيىمدار شىعاراتىن «ەكو-فارم» كاسىپورنىنىڭ جەتەكشىسى دىنمۇحاممەد بۋبەش پاندەميا باستالعالى ءوندىرىس ارتقانىن ايتادى.

- سق-فارماتسيامەن كەلىسىم جاسالعان، سولاردىڭ تاپسىرىسى بويىنشا ءونىم شىعارامىز. نەگىزىنەن ەكپە سالاتىن ينەلەر، بينت، گيپس، قورعانىس كيىمدەرىن، مەديتسينالىق ماسكالار شىعارامىز. پاندەميا باستالعالى ءبىز شىعاراتىن ونىمدەرگە سۇرانىس ارتتى. قويمادا ەكى ايعا جەتكىلىكتى بۇيىمدار ساقتالعان، - دەيدى بۋبەش.

قاجەتتى مەديتسينالىق قۇرالدار شىعاراتىن «Dolce» جشس-ءنىڭ باسشىسى بايان دەمەۋوۆا سق-فارماتسيامەن كەلىسسوزدەر ءجۇرىپ جاتقانىن جەتكىزدى.

- قازىر بىزدە سق-فارماتسيامەن كەلىسسوزدەر ءجۇرىپ جاتىر. ءبىز مەديتسينالىق بۇيىمدار شىعارامىز. بۇگىنگى تاڭعا دەيىن ونىمدەر قالىپتى جاعدايدا شىعارىلىپ كەلدى، ەگەر تاپسىرىس تۇسسە، كۇنى-ءتۇنى جۇمىس ىستەيمىز. دەگەنمەن ۇكىمەت تاراپىنان ۇلكەن تاپسىرىس بولعان جوق، - دەيدى ول.

وتاندىق كاسىپورىندار كۇن سايىن 900 مىڭ مەديتسينالىق ماسكا، 330 مىڭ جۇپ مەديتسينالىق قولعاپ شىعارادى. قويمالاردا 18 ملن ماسكا بار. سونداي-اق 6 وتاندىق كومپانيا اي سايىن 504 مىڭ مەديتسينالىق قورعانىس كوستيۋمىن شىعارادى ەكەن.

ادىلەت مۇساحاەۆ

Abai.kz