(نەمەسە So my dreams come true!)

بۇگىن تاڭەرتەڭ جۇمىسقا ادەتتەگىدەن ءسال كەشىگىڭكىرەپ كەلدىم. وفيسىمە كىرگەن بەتىم سول ەدى، الدىمنان ۇستىنەن شانەل ءاتىرى اڭقىعان حاتشىم قۇشاعىن جايا جۇگىرىپ شىعىپ، «اعاي!» - دەپ موينىمنان قىسىپ قۇشاقتاپ الدى. 

- «قۇتتىقتايمىن، اعاي! قۇتتىقتايمىن! سىزگە نوبەل سىيلىعى بەرىلەتىن بولدى. نوبەل العان تۇڭعىش قازاق بولاسىز!» – دەپ قۋىنىشى قوينىنا سىيماي مەنى قۇشاعىنا قاتتىراق قىسىپ جاتىر. شانەلدىڭ ءيىسى مۇرنىمدى جارىپ بارادى. نە بولىپ جاتقانىن تۇسىنە الار ەمەسپىن...

- قايداعى نوبەل؟ نە ايتىپ تۇرسىڭ؟

- اعاي ماعان سەنبەيسىز بە؟ قازىر كورسەتەمىن، - دەدى دە، مەنى قۇشاعىنان بوستا سالىپ ۇستەلىنە قاراي ۇمتىلدى. دەرەۋ ءبىر جاپىراق قاعازدى الدى دا، ماعان ۇسىنىپ «قاراڭىز! قاراڭىز!» دەپ بەزەك قاعىپ تۇر. قاعازدى الىپ قاراسام ءوز كوزىمە ءوزىم سەنە المادىم، نوبەل كوميتەتىنەن كەلگەن رەسمي شاقىرتۋ. 

ءسويتىپ، مەجەلەگەن ۋاقىتتا نورۆەگيا استاناسىنا جول تارتتىق. استانا قالاسىنان وسلوعا ۇشاتىن تىكە رەيس بولماعاندىقتان ۇشاق اۋىستىرۋعا تۋرا كەلدى. بوينگپەن استانادان اۋەلى لوندونعا ۇشىپ كەلدىم. B-757 دەگەن كەرەمەت ۇشاق قوي. ءسۇپ-سۇيكىمدى بورتسەرىك قىز مارس شوكولادىن اكەلىپ بەردى بىزگە. ليپتون شايىن ءىشىپ، قاسىمدا وتىرعان فۋلبرايت تۇلەگىمەن اڭگىمەلەسىپ باردىم. گاليفە شالبار كيگەن ايەل قولىنا سۋاروۆسكي اسىل تاستارىنان جاسالعان اشەكەيلەر تاعىپ الىپتى. 

اۋەجايدا 2 ساعاتتاي ايالدادىق. سول ارالىقتا مۇقاباسىندا ەيفەل مۇناراسى بەينەلەنگەن اعىلشىن تىلىندەگى فوربس جۋرنالىنىڭ بىرنەشە بەتىن وقىپ ۇلگەردىم. ەكى ساعاتتان سوڭ تاعى دا بوينگكە وتىرىپ وسلوعا تارتتىق. 

ول جاقتا ۇيىمداستىرۋشىلار كۇتىپ الىپ، بەس جۇلدىزدى حيلتون قوناق ۇيىنە ورنالاستىردى. ماعان دجاكۋززيى بار نومەر بۇيىرىپتى. قوناق ۇيگە قاراما-قارسى بەتتە مەكدونالدس بار ەكەن. 

دجاكۋززيگە ءتۇسىپ الىپ ايناعا قاراسام، بەت-اۋزىمدى ارام ءشوپ باسىپ كەتكەن. دەرەۋ قولىما جيللەتتى الدىم دا، قىرىپ تاستادىم. سودان سوڭ ءبىرىنشى قاباتقا ءتۇسىپ، قولىما پاركەر قالامىن الدىم دا، دجەك دەنيەلستەن ۇرتتاپ وتىرىپ سالتاناتتى شارادا سويلەيتىن ءسوزىمدى جازدىم. 

سىيلىقتى تابىستاۋ ءراسىمى كەلەسى كۇنى باستالدى. نورۆەگيا كورولىمەن قول الىسقاندا قاتتى قوبالجىعانىم راس. جۇرەگىم دۇرسىلدەپ تۇر. قالاي دەگەنمەن دە نوبەل سىيلىعى بۇيىرعان ءبىرىنشى قازاقپىن عوي... وسىدان سوڭ تريبۋناعا شىعىپ، ميكروفوندى ىڭعايلاپ، سالتاناتتى تۇردە ءسوز سويلەۋگە ىڭعايلاندىم. زالعا ءبىر كوز تاستاسام لىق تولى ادام، شىرتىلداعان فوتواپپاراتتار مەن بەينەكامەرا ۇستاعان وپەراتورلار. بىرىڭعاي يگى جاقسىلار جينالعان ەكەن. ءبارىنىڭ دە نازارى مەندە. 

تەرەڭ ءبىر دەم الدىم دا، «Good afternoon dear ladies and gentlemen!» – دەپ كوتەرىڭكى داۋىسپەن سالتاناتتى ءسوزىمدى باستاي بەرىپ ەدىم، بىرەۋ ارتقى جاعىمنان كەلىپ سول جاق يىعىمنان ارتقا قاراي جۇلقىلادى. شوشىپ كەتتىم. «ءاي، تۇر! تال تۇسكە دەيىن ۇيىقتايسىڭ با؟ قوي كەتىپ قالدى. اكەڭ ەسەگىڭدى ەرتتەپ كەتتى. ءمىنىپ ال دا، قۋىپ جەت! اكەڭ جالعىز ءوزى باعا المايدى» - دەگەن ايعاي ارالاسقان اشۋلى داۋىس ەستىلدى. كوزىمدى اشسام قوي كەزەككە وياتىپ جاتقان شەشەم ەكەن. باعاناعى كورىپ جاتقانىمنىڭ ءبارى ءتۇس ەكەن. قاپ، اتتەگەن-اي! تىپ-تىم جاقسى ءتۇس كورىپ جاتىر ەدىم، وياتىپ جىبەرگەنىن قاراشى.

- تۋ، ماما! كۇشتى ءتۇس كورىپ جاتىر ەدىم، ءبارىن قۇرتتىڭ! 

- سولاي جاتا بەرەسىڭ بە تال تۇسكە دەيىن؟ جۇرتتىڭ سەندەي بالالارى قوي كەزەكتى جالعىز ءوزى باعىپ كەلىپ ءجۇر. سەن بولساڭ جاسىڭ جيىرما بەسكە كەلسە دە قاسىڭا اكەڭ ەرىپ ءجۇرۋى كەرەك. ەڭ بولماسا قوي كەزەك باعۋ دا قولىڭنان كەلمەيدى. تۇر بولدى! – دەپ ۇستىمدەگى كورپەنى جۇلىپ الدى دا، ەسىكتى تارس جاۋىپ شىعىپ كەتتى شەشەم.

- جۇرتتىڭ بالالارى نوبەل تۋرالى ءتۇس كورەدى مە؟ – دەپ ايعايلادىم مەن ۇيقىلى-وياۋ، ىزام كەلىپ... ارينە، شەشەم مەنىڭ بۇل سوزدەرىمدى ەستىگەن دە جوق. ەستىسە دە تۇسىنگەن جوق... 

ورالبەك ج. وتەعۇلوۆ

فيلولوگ، ساياساتتانۋشى

Abai.kz