بەيسەنبى, 19 قاراشا 2026
جاڭالىقتار 110 0 پىكىر 19 قاراشا, 2026 ساعات 16:49

«كولەڭكەلى» ساۋدا: «وتباسى بانك» تازالاۋدى باستادى...

سۋرەت: forbes.kz سايتىنان الىندى.

ەلىمىزدە باسپانا كەزەگىن تۇگەندەۋ ناۋقانى قىزا ءتۇستى. سوڭعى مالىمەتتەرگە سۇيەنسەك، مەملەكەتتەن ءۇي الۋعا ۇمىتتىلەر تىزىمىنەن 52 535 قازاقستاندىق شىعارىلدى. بۇل — باستاماسى عانا.

«وتباسى بانكتىڭ» رەسمي اقپاراتىنا ۇڭىلسەك، قازىرگى تاڭدا كەزەكتە 1,1 ميلليونعا جۋىق ادام تۇر. الايدا بانك ماماندارى بۇل تىزىمدەگى 200 مىڭعا دەيىنگى ازاماتتىڭ كەزەكتەن ءتۇسىپ قالۋى مۇمكىن ەكەنىن اشىق ايتىپ وتىر. مۇنداي اۋقىمدى «تازالاۋعا» نە تۇرتكى بولدى جانە ونىڭ استارىندا قانداي الەۋمەتتىك ادىلەتسىزدىكتەر جاتىر؟ سارالاپ كورەيىك.

زاڭداعى «ساڭىلاۋ» قالاي جابىلدى؟

وسى جىلدىڭ 14 قىركۇيەگىنە دەيىن تۇرعىن ءۇي كەزەگىندە تۇرعان ازاماتتاردىڭ جەكە دەرەكتەرىن تەكسەرۋ وڭاي بولمادى. سەبەبى ەسكى ەرەجە بويىنشا ازامات كەلىسىم بەرمەسە، بانك ونىڭ باسىندا باسپانا بار-جوعىن تەكسەرە المايتىن. بۇل نورما تالاي جىل بويى الىپساتارلار مەن باسپاناسى بار اۋقاتتى ادامداردىڭ كەزەكتە «تىعىلىپ» وتىرۋىنا مۇمكىندىك بەردى.

قىركۇيەكتە كۇشىنە ەنگەن زاڭنامالىق تۇزەتۋلەر بۇل كەدەرگىنى جويدى. ەندى بانك ازاماتتىڭ رۇقساتىنسىز-اق دەرەكتەر بازاسىنا ۇڭىلە الادى. ناتيجەسى كوپ كۇتتىرمەدى: العاشقى تەكسەرىستىڭ وزىندە-اق باسىندا جەكە باسپاناسى بولا تۇرا، مەملەكەتتىڭ تەگىن نەمەسە جەڭىلدەتىلگەن ۇيىنە دامەلى بولعان 52,5 مىڭنان استام ادام انىقتالدى.

400 پاتەردە ۇلەسى بار «مۇقتاج» ازامات

ينۆەنتاريزاتسيا بارىسىندا جاعا ۇستاتارلىق دەرەكتەر دە اشكەرەلەندى. «وتباسى بانكتىڭ» العاشقى باسپانامەن قامتاماسىز ەتۋ ورتالىعى دەپارتامەنتىنىڭ ديرەكتورى ازات ءاشىموۆتىڭ ايتۋىنشا، كەزەكتە تۇرعان ءبىر ازاماتتىڭ... 400 پاتەردە ۇلەسى بار بولىپ شىققان!

بۇعان دەيىن ءوزىن تەكسەرۋگە رۇقسات بەرمەي كەلگەن بۇل «مۇقتاج» جاننىڭ ارەكەتى زاڭداعى ولقىلىقتىڭ قانشالىقتى سوراقى بولعانىن كورسەتەدى.

«ۇلەستىك مەنشىك» ماسەلەسى: 90-جىلداردىڭ جاڭعىرىعى مەن جاڭا شەكتەۋ

مەملەكەتتىك تۇرعىن ءۇي باعدارلاماسىنىڭ باستى شارتى — سوڭعى 5 جىلدا ازاماتتىڭ اتىندا جەكە باسپانانىڭ بولماۋى. دەگەنمەن، ەلىمىزدە ءوزىنىڭ جەكە ءۇيى بولماسا دا، اتا-اناسىنىڭ پاتەرىندە ۇلەسى (1/3, 1/5 نەمەسە 1/7 بولىگى) بار ازاماتتار كوپ. بۇل — 1990-2000 جىلدارداعى جەكەشەلەندىرۋ ناۋقانى مەن مۇراگەرلىكتەن قالعان تاجىريبە.

وسى ماسەلەنى ەسكەرگەن بيلىك باستاپقىدا تۇرعىن ۇيدەگى ۇلەس مولشەرى 50 پايىزدان اسپاۋى ءتيىس دەگەن شەشىم قابىلداعان ەدى. الايدا، پىسىقايلار بۇل تالاپتى دا اينالىپ ءوتۋدىڭ جولىن تاپتى: ءبىر ادام بىرنەشە پاتەردىڭ تەڭ جارتىسىنا (50%) يەلىك ەتىپ، ءبارىبىر كەزەكتە تۇرا بەرگەن. سوندىقتان تالاپ تاعى دا قاتاڭداتىلىپ، ەندى تەك ءبىر عانا تۇرعىن ۇيدەگى ۇلەس 50 پايىزدان اسپاۋى كەرەك دەگەن ناقتى شەكتەۋ قويىلدى.

ءتۇيىن: «وتباسى بانك» ەندى مۇنداي تەكسەرىستەردى توقسان سايىن تۇراقتى تۇردە جۇرگىزىپ تۇرماق. بۇل — جىلدار بويى پاتەر جالداپ، شىن مانىندە باسپاناعا ءزارۋ بولىپ جۇرگەن قاراپايىم حالىقتىڭ كەزەگىن جىلجىتۋعا جاسالعان ماڭىزدى قادام. مەملەكەتتىك قولداۋ شىن مۇقتاجدارعا عانا بۇيىرۋى ءتيىس.

Abai.kz

0 پىكىر