باستاما: تورەبەك تولەگەنوۆكە «حالىق قاھارمانى» بەرىلسىن! (اۋديو)
سۋرەتتە: بەيبىت تۇرعىنداردىڭ قاتارىنا شىعىپ، قىرشىنىنان قيىلعان جاس - تورەبەك تولەگەنوۆ
سۋرەتتە: بەيبىت تۇرعىنداردىڭ قاتارىنا شىعىپ، قىرشىنىنان قيىلعان جاس - تورەبەك تولەگەنوۆ
جاڭاوزەن وقيعاسىنا اي تولعانىنا بايلانىستى، استانالىق قوعام قايراتكەرلەرى، جۋرناليستەر، قوعامدىق ۇيىم وكىلدەرى ساياسي-قۋعىن سۇرگىن قۇرباندارىنا قويىلعان ەسكەرتكىشكە جينالىپ، جاڭاوزەن مەن شەتپەدەگى وقيعا كەزىندە شەيت بولعان ازاماتتاردى ەسكە الدى.
اكتسيانىڭ ۇيىمداستىرۋشىسى بۇرىنعى سەناتور زاۋرەش باتتالوۆا جاڭاوزەندىك قۇربانداردىڭ 40 كۇندىگى قۇرمەتىنە 25 قاڭتاردا «نۇر-استانا» مەشىتىندە اس بەرۋدى ويلاستىرىپ جاتقانىن ءمالىم ەتتى. بىراق بۇل باستامانى مەشىت يمامى قولداي ما، ول جاعى بەلگىسىز. ويتكەنى، سول مەشىتتە اشتىق جاريالاعان ساياساتكەر سەرىكجان مامبەتالين اللانىڭ جەردەگى ۇيىنەن قۋىلعان بولاتىن.
كوممۋنيست توتى ەلۋباەۆا بارلىق كۇشتەردى بىرىكتىرىپ، قوزعالىستىڭ اتىن «جاڭاوزەن» اتاۋدى ۇسىندى. بىرقاتار بەلسەندىلەر ۇكىمەت پەن پرەزيدەنتتىڭ اتىنا حات جازىپ شەتپە اۋىلىندا قازا تاپقان سەرجانت تورەبەك تولەگەنوۆكە «حالىق قاھارمانى» اتاعىن بەرۋ قاجەتتىگىن كوتەردى. ءورت ءسوندىرۋ قىزمەتىنىڭ جۇمىسشىسى تورەبەك شەتپەدەگى دەمونسترانتتارعا قارسى تىنىشتاندىرۋ شاراسىنا قاتىسۋى كەرەك بولاتىن. الايدا، ول بەيبىت تۇرعىندارعا قارسى وق اتپاۋدى تالاپ ەتكەن جەرلەستەرىنىڭ قاتارىنا بارىپ قوسىلعان. سول كەزدە وعان كەكتەنگەن پوليتسيا قىزمەتكەرى ونى اتىپ سالعان. تورەبەك سول جەردە قازا تاپقان. وق قاق ماڭدايدان ءتيىپتى.
ول - قازاقستاننىڭ جاڭا تاريحىندا حالىق جاعىنا شىققان تۇڭعىش مەملەكەتتىك قىزمەتكەر. بىراق اجال قۇشتى. جينالعاندار بۇل باستامانى دا قولدادى.
"اباي-اقپارات"
جەلتوقساننىڭ 17-سىندە شەتپەدە قايتىس بولعان تورەبەك تولەگەنوۆتىڭ اناسى زەرىك تاۋاساروۆانىڭ جوقتاۋى. (اۋديو "ازاتتىق راديوسىنان الىندى")
