«اۋىل» حالىقتىق-دەموكراتيالىق پاتريوتتىق پارتياسى الداعى ءماجىلىس سايلاۋىنا قاتىسادى. بۇل تۋرالى پارتيانىڭ ساياسي كەڭەسىنىڭ وتىرىسىندا ايتىلدى. 

«قر پرەزيدەنتى قاسىم-جومارت توقاەۆ قازاقستاندا 10 قاڭتار كۇنى قر پارلامەنتى ءماجىلىسى مەن ءماسليحات دەپۋتاتتارىنىڭ سايلاۋى وتەتىنى تۋرالى جارلىق شىعاردى. بۇل - ءبىز ءۇشىن ۇلكەن ساياسي وقيعا. ءبىز قازاقستاندا جۇمىس ىستەپ كەلە جاتقان ساياسي پارتيانىڭ ءبىرى رەتىندە وسى ساياسي ناۋقانعا قاتىسۋعا تولىق قۇقىلىمىز. پارتيامىز قۇرىلعالى جيىرما جىلدا ماقساتىمىز، جۇمىسىمىزدىڭ مازمۇنى، ساياسي پلاتفورمامىز وزگەرگەن جوق. سوڭعى بەس جىلدا 52 مىڭنان استام قازاقستان ازاماتى پارتيا قاتارىنان كورىندى. پارتيامىزدىڭ يدەياسىن قولداۋشىلار جىلدان جىلعا ءوسىپ كەلە جاتىر. الداعى سايلاۋعا «اۋىل» حالىقتىق-دەموكراتيالىق پاتريوتتىق پارتياسىنىڭ قاتىسۋى تۋرالى ۇسىنىس ەنگىزەمىن»، - دەدى «اۋىل» حالىقتىق-دەموكراتيالىق پاتريوتتىق پارتياسىنىڭ توراعاسى ءالي بەكتاەۆ.

ساياسي كەڭەسكە قاتىسۋشىلار قازىر ەلىمىزدە بولىپ جاتقان ساياسي، الەۋمەتتىك-تۇرمىستىق جاعدايعا توقتالىپ، ءوز ويلارىن ءبىلدىردى.

«تۋعاننان اۋىلدا تۇرامىن. بار ءۇمىتىم اۋىلمەن بايلانىستى. اۋىل حالقى «اۋىل» پارتياسىنا ۇلكەن ءۇمىت ارتىپ وتىر. اۋىلداعى اعايىننىڭ ءۇمىتىن ۇزبەي، اماناتىن ارقالاپ ساياسي دوداعا قاتىسقانىمىز دۇرىس دەگەن ويدامىن»، دەدى «اۋىل» پارتياسىنىڭ مۇشەسى، «شوپان اتا» قوي وسىرۋشىلەر قوعامىنىڭ باسشىسى المازبەك سادىرباەۆ.

ساياسي كەڭەس وتىرىسىندا پارتيا توراعاسى ءالي بەكتاەۆ «اۋىل» حالىقتىق-دەموكراتيالىق پاتريوتتىق پارتياسى قر پارلامەنتى ءماجىلىسى مەن ءماسليحات دەپۋتاتتارىنىڭ كەزەكتى سايلاۋىنا قاتىسۋىن داۋىسقا سالىپ، كەڭەس مۇشەلەرى ءبىراۋىزدان قولدادى. ساياسي كەنەس مۇشەلەرى 18.11.2020 جىلى پارتيانىڭ كەزەكتەن تىس XVII سەزىن وتكىزۋىن بەكىتتى. سونىمەن قاتار سەزدە پارتيالىق ءتىزىم مەن سايلاۋالدى باعادارلاما قابىلدانادى.

Abai.kz