ەرىكتى بولۋ - ەركىككەننىڭ ءىسى ەمەس. بۇل جازىلماعان زاڭعا اينالعان اينىماس قاعيدا دەسەك تە بولادى. ويتكەنى ۆولونتەرلىكپەن ادامگەرشىلىكتىڭ بيلىك بەلەسىنە شىققان ازاماتتار عانا اينالىسادى دەۋگە نەگىز بار. جالپى ۆولونتەرلىك وركەنيەتتى قوعامعا ءتان ايقىن بەلگى.

ءبارىمىز بىلەتىندەي، ەلىمىزدە 2020 جىلدى ۆولونتەرلەر جىلى رەتىندە اتاپ ءوتىپ جاتىرمىز. وتكەن جىلى تامىز ايىندا قازاقستان رەسپۋبليكاسىنىڭ مەملەكەت باسشىسى قاسىم-جومارت كەمەلۇلى توقاەۆ 2020 جىلدى ەرىكتىلەر جىلى (ۆولونتەرلەر جىلى) دەپ جاريالعان بولاتىن.

ەرىكتىلەر وركەنيەتتى قوعامنىڭ ءبىر كورىنىسى دەپ وتىرمىز. ساندى مالىمەتتەرگە سەنسەك، تۇراس الەمدە بۇگىنگى تاڭدا ءبىر ميلليارد كولەمىندە ۆولونتەرلەر بار كورىنەدى. ءتىپتى تۇتاس عالامشار تۇرعىندارىنىڭ سەگىزدەن ءبىرى وسى ۆولونتەرلىكپەن اينالىسادى دەگەن اقپارات بار. تاعى ءبىر مالىمەت بويىنشا، الەم ەكونوميكاسىندا جالپى ىشكى ءونىمنىڭ ەكى جارىم پايىزى ەرىكتىلەر ەڭبەگىنىڭ جەمىسى ەكەن. وسىدان اق ەرىكتەرلەر جالپى عالامدا جاپپاي تارالعان قوعامدىق كۇش ەكەنىن اڭارۋعا بولاتىن سەكىلدى.

جالپى الەمدەگى ۆولونتەرلەر جايلى ساندى مالىمەتتەردى سويلەتتىك. ەندى ءوز ەلىمىزدەگى ەرىكتەرلەر جايلى ايتار بولساق، جالپى ءبىزدىڭ ەلدە ناقتى قانشا ەرىكتى بار ەكەنى جايلى ناقتى اقپارات ءسال تاپشى. بىراق كەيبىر دەركەتەرگە سۇيەنسەك، ءبىزدىڭ ەلدە دە وتىز مىڭنان اسا ۆولونتەر بار كورىنەدى. دەمەك مۇنىڭ ءوزى از سان ەمەس. وسىنشا ۇلكەن جۇرەكتى جاندار ەلدىڭ ەرتەڭى ءۇشىن ەرىكتى تۇردە ەڭبەك ەتىپ جاتىر دەگەن ءسوز.

مامانداردىڭ ايتۋىنشا، ەل اۋماعىنداعى ەرىكتىلەردىڭ سانى جىل سايىن ارتىپ كەلە جاتقان كورىنەدى. ەندەشە وقىرمان نازارىنا ەرىكتىلەردىڭ قاتارىنا قالاي قوسىلۋعا بولاتىنىن تۇسىندىرە كەتەيىك. ءبىز مۇنى ەل استاناسى نۇر-سۇلتان قالاسىنداعى ەرىكتىلەر توبىنا قوسىلۋ جولىن ايتا وتىرىپ تۇسىندىرەمىز.

نۇر-سۇلتان قالاسى اكىمدىگى تاراتقان اقپاراتقا سۇيەنسەك، ەلوردالىق ەرىكتىلەر شتابىندا ەكى مىڭعا جۋىق ۆولونتەر بار كورىنەدى. ەلوردانىڭ رەسمي سايتىندا وسىنداي دەپ حابارلانعان.

مەملەكەت باسشىسىنىڭ 2020 جىلدى ەرىكتىلەر جىلى دەپ جاريالاعان جارلىعىنا ءۇن قوسۋ مىندەتىن ەلوردادا "استانا جاستارى" رەسۋرستىق ورتالىعى جانىنداعى ەرىكتىلەردىڭ قالالىق شتابى قولعا الىپ، جۇزەگە اسىرىپ جاتىر. اتالعان ورتالىقتىڭ باسشىسىنىڭ ايتۋىنشا، ەلوردالىق ەرىكتىلەردىڭ قاتارىنا قوسىلۋ ءۇشىن ۆولونتەر مەكتەبىندە ءۇش كەزەڭنەن تۇراتىن وقۋ بارىسىنان ءوتۋ كەرەك ەكەن.

شىڭعىس تءىلەۋلين،

نۇر-سۇلتان قالاسى اكىمدىگىنىڭ "استانا جاستارى" رەسۋرستىق ورتالىعى جانىنداعى ەرىكتىلەر شتابىنىڭ باسشىسى:

«الدىمەن العاشقى مەديتسينالىق كومەك كورسەتۋدى ۇيرەتەتىن كىرىسپە كۋرستان ءوتۋ كەرەك، ءتۇرلى پسيحولوگيالىق ترەنينگتەر وتكىزىلەدى ياعني جالپى دايىندىق جۇرگىزىلەدى. تج كەزىندە كومەك بەرۋگە نيەت بىلدىرۋشىلەر ماماندارمەن دايىندالىپ، وقۋ جيىندارىنان وتەدى. سونداي-اق حالىقارالىق ۆولونتەرلەر مەن الەۋمەتتىك ۆولونتەرلەر ءۇشىن وقىتۋ جۇرگىزىلەدى. سودان كەيىن تىكەلەي اكتسيا وتكىزۋ كەزىندە پراكتيكالىق ساباقتار وتەدى».

ونىڭ ايتۋىنشا، مۇندا ءسوز بولعان العاشقى دايىندىق مولشەرمەن ون ساباق الادى ەكەن. وسى ون ساباقتان تۇراتىن العاشقى دايىندىق كەزەڭىنەن وتكەن ۆولونتەرلەر ءارى قاراي ءتۇرلى باعىتتار بويىنشا ارنايى بولىمدەرگە ءبولىنىپ، مامانداندىرلاتىن كورىنەدى. بيىلعى جىلى اتالعان ۆولونتەرلەر مەكتەبىندە ءۇش جۇزگە تارتا ەرىكتىنى وقىتۋ جوسپارلانىپ وتىر ەكەن.

جوعارىدا ايتاقنىمىزداي، ۆولونتەرلىك ءبىزدىڭ ەلدە ەندى عانا قانات جايىپ دامىپ كەلەدى. ولاردىڭ سانى تۇتاس ەل اۋماعى بويىنشا الىپ قاراعاندا كوپ دەۋگە كەلمەيدى. اسىرەسە بيىلعىداي تۇتاس الەمدى تابانىنان تىك تۇرعىزعان قيىن ساتتەردە ەرىكتىلەردىڭ ەڭبەگىنە جۇگىنۋ اۋاداي قاجەت سەكىلدى. بيىل ەلىمىزدە ەرىكتىلەردىڭ ەرىنبەي ەڭبەك ەتۋىنىڭ ارقاسىندا كوپتەگەن ماسەلە ءتيىمدى شەشىلدى. «جۇمىلا كوتەرگەن جۇك جەڭىل» دەيدى، ەل ءۇشىن ەرىنبەي ەتەر ەرىكتىلەرىمىز كوپ بولسىن. سول ءۇشىن دە بۇگىن ۆولونتەرلەر قاتارىنا قوسىلىپ، حالىق ءۇشىن قىزمەت ەتۋدىڭ ءتيىمدى جولىن تانىستىرىپ وتىرمىز.

Abai.kz