مەملەكەت باسشىسى «سامۇرىق-قازىنا» ۇلتتىق ءال-اۋقات قورى» اق باسقارما توراعاسى احمەتجان ەسىموۆتى قابىلدادى. ەسىموۆ «سامۇرىق-قازىنا» ۇاق» كومپانيالار توبىنىڭ 9 ايداعى جۇمىسىنىڭ قورىتىندىلارى تۋرالى ەسەپ بەردى،- دەپ حابارلايدى اقوردا.

احمەتجان ەسىموۆتىڭ مالىمەتىنشە، ەسەپتىك كەزەڭدەگى تازا تابىس جوسپارلانعان 167 ملرد تەڭگەدەن 2,6 ەسەگە اسىپ، 436 ملرد تەڭگەگە جەتكەن.

بيىل اكتسيونەر – قر ۇكىمەتىنە 120 ملرد تەڭگە ديۆيدەندتەر تولەنىپ، 2017 جىلعى كورسەتكىشپەن سالىستىرعاندا 10 ەسە ارتىق بولعان. سونداي-اق ەنەرگەتيكالىق، مۇناي-گاز، ۋران، تەلەكوممۋنيكاتسيالار، پوشتا جانە باسقا دا سالالارداعى كومپانيالار توبىنىڭ بارلىق كاسىپورىندارىندا ۇزدىكسىز جۇمىس قامتاماسىز ەتىلدى. وندىرىستەگى جۇمىس ورىندارى جاپپاي قىسقارتۋعا ۇشىراماي، پەرسونال تولىق قۇرامدا ساقتالدى، قىزمەتكەرلەرگە ەڭبەكاقى ۋاقىتىلى تولەنىپ وتىر.

«سامۇرىق-قازىنا» باسشىسى قور ساتىپ الۋلار جۇيەسى ارقىلى ەل ەكونوميكاسىن قولداۋعا قاتىستى مەملەكەت باسشىسىنىڭ تاپسىرمالارىن ورىنداۋ جونىندەگى جۇمىستى جالعاستىرىپ جاتقانىن حابارلادى.

بيىلعى 9 ايدىڭ قورىتىندىسى بويىنشا قوردىڭ ساتىپ الۋلار جۇيەسىندەگى جەرگىلىكتى ءونىم ۇلەسى 66% قۇرادى. باسەكەلەستىك ورتاعا 819 ملرد تەڭگەگە ساتىپ الۋلار شىعارىلعان. بيزنەستىڭ 17 000 سۋبەكتىسى قوردىڭ ساتىپ الۋلارىنا قاتىسۋعا مۇمكىندىك الدى.

2020 جىلدىڭ باسىنان بەرى كومپانيالار توبى 2,4 ترلن تەڭگەگە وتاندىق بيزنەسپەن شارتتار جاساسىپ، جەرگىلىكتى كاسىپورىندارعا 12 مىڭ تاپسىرىس بەرىلگەن. اتالعان كاسىپورىنداردا 280 مىڭ ادام جۇمىس ىستەيدى. ەسەپ بويىنشا مەملەكەتتىك بيۋدجەتكە 170 ملرد تەڭگە كولەمىندە سالىق تولەمدەرى ءتۇسۋى ءتيىس.

سونداي-اق قازاقستان پرەزيدەنتىنە قوردى ينۆەستيتسيالىق حولدينگكە اينالدىرۋ تۇجىرىمداماسى ۇسىنىلدى.

باسقارما باسشىسى احمەتجان ەسىموۆ قاسىم-جومارت توقاەۆقا ينۆەستيتسيالىق حولدينگكە اينالدىرۋدىڭ ارتىقشىلىقتارى تۋرالى ايتتى. ونىڭ سوزىنشە، بۇل پورتفەلدى اكتيۆتەردىڭ گەوگرافيا جانە سالار بويىنشا ارتاراپتاندىرۋعا، حالىقارالىق ينۆەستيتسيالاردان تۇسەتىن تابىسىن ارتتىرۋعا، ديۆيدەندتەردىڭ ەسەبىنەن بيۋدجەت تۇسىمدەرىن ارتتىرۋعا مۇمكىندىك بەرەدى.

مەملەكەت باسشىسىنا جولداۋداعى تاپسىرمالارعا سايكەس، قور اكتيۆتەرىن جەكەشەلەندىرۋ باعدارلاماسى جالعاسا بەرەتىنى تۋرالى  حابارلاندى. بۇل رەتتە، قور مەملەكەتتىك جانە جەكە مەنشىك مۇددەلەر اراسىنداعى تەپە تەڭدىكتى قامتاماسىز ەتۋ ماقساتىندا ءىرى جانە ستراتەگيالىق كومپانيالارداعى ۇلەسىن 51 جانە ودان دا كوپ پايىزىن باقىلاۋدى ساقتاپ قالادى.

Abai.kz