پارلامەنت - كونستيتۋتسيا بويىنشا بيلىكتىڭ ۇلكەن تارماعى، ياعني زاڭدار قابىلدايتىن مەملەكەتتىك ورگان.

وكىنىشكە وراي، وسى كەزگە دەيىن ەلىمىزدە تەك ەكى زاڭ عانا مەملەكەتتىك تىلدە، قالعانداردىڭ بارلىعى رەسمي تىلدە جازىلعان. الەمدى بىلاي قويىپ، بۇرىنعى كەڭەستەر وداعى مەملەكەتتەرىنىڭ ىشىندە كولەمى جاپىراقتاي پريبالتيكا، كاۆكاز، كورشى ورتا ازيا ەلدەرى سوڭعى وتىز جىلدان بەرى زاڭدارىن ءوز تىلدەرىندە جازىپ، قاجەت بولسا ورىس تىلىنە اۋدارادى. ءبىز رەسمي تىلدە جازامىز، سوسىن قازاق تىلىنە اۋدارامىز. ايتارعا ءسوز جوق. ۇلتتىق نامىس، ۇيات دەگەن ۇعىمدار تاۋەلسىز ەل بولعانىمىزعا وتىز جىلداي بولسا دا وتارشىلدىق سانانىڭ قاتپارىندا ءالى ۇيىقتاپ جاتىر.

ۇلتىمىزدىڭ زيالى قاۋىمى دا، پارلامەنتتە بىزگە دەيىنگى دەپۋتاتتار دا، ءبىز دە وسى ماسەلەنى شىرىلداپ ايتقانىمىزبەن باياعى جارتاس ءبىر جارتاس بولىپ قالۋدا.

ۇلتتىڭ — ۇلت ەكەنىن ايقىندايتىن ەڭ نەگىزگى بەلگىسى ونىڭ ءتىلى. ويلانىپ كورەيىكشى، مەملەكەتتىڭ ءتىلى - سول قوعامنىڭ بارلىق سالاسىندا تولىققاندى قولدانىلماسا ونى قانداي ۇلتقا جاتقىزامىز؟

ءبىر نارسە اقيقات، ءبىزدىڭ بارلىق بيلىك تارماقتارى مەن زاڭدارىمىز مەملەكەتتىڭ اتىن يەمدەنگەن ۇلت تىلىندە سويلەيتىندەي زاڭ قابىلدامايىنشا، شيرەك عاسىردان بەرى ءتىل تۋرالى ايتىلىپ كەلە جاتقان ۇگىت- ناسيحات جۇمىسىنىڭ ناتيجەسى ماردىمسىز بولىپ قالا بەرەدى.

ساياسي شەشىم قابىلدايتىن ۋاقىت الدەقاشان كەلدى...

مۇرات باقتيارۇلىنىڭ جازباسى

Abai.kz