مەملەكەت باسشىسى قاسىم-جومارت توقاەۆ سولتۇستىك ەكونوميكالىق ىنتىماقتاستىق - 2020 حالىقارالىق فورۋمىنا قاتىسىپ، بەينە ۇندەۋ جاسادى.

وڭتۇستىك كورەيانىڭ استاناسى سەۋل قالاسىندا باستالعان اتالمىش شارا  «COVID-19-دان كەيىنگى الەمدىك وزگەرىستەر جانە سولتۇستىك ەكونوميكالىق ىنتىماقتاستىقتىڭ كەلەشەگى» تاقىرىبىندا ءوربىدى.

قازاقستان پرەزيدەنتى قاسىم-جومارت توقاەۆ وڭتۇستىك كورەيا پرەزيدەنتى مۋن چجە ين ۇيىتقى بولعان سونىمەن قاتار سوڭعى ءۇش جىل ىشىندە ءوزىنىڭ ومىرشەڭدىگى مەن وزەكتىلىن دالەلدەگەن «جاڭا سولتۇستىك ساياسات» دەپ اتالاتىن ستراتەگياسىن جوعارى دەڭگەيدە باعالاپ، وڭتۇستىك كورەيا باسشىسىنىڭ تۇراقتى ءھام ءوزارا بايلانىسى مىعىم ءارى وركەندەگەن ەۋرازيا قۇرۋ يدەياسىن كورەگەندىككە بالاپ، قىزۋ قولدادى.

مەملەكەت باسشىسى قاسىم-جومارت كەمەلۇلىنىڭ ايتۋىنشا، جاھان جۇرتى قازىرگىدەي COVID-19 پاندەمياسىنىڭ قۇرساۋىنا ءتۇسىپ، قيىندىققا تاپ بولعان كەزدە ەكونوميكالىق سانا مەن ساياسي جىگەر سينەرگياسى ايرىقشا مانگە يە بولدى.

سونىمەن قاتار، قازاقستان پرەزيدەنتى قاسىم-جومارت توقاەۆ وڭتۇستىك كورەيا مەن قازاقستان اراسىنداعى ستراتەگيالىق ىنتىماقتاستىقتىڭ ءوزارا قولداۋ مەن تىعىز بايلانىستارعا، ورتاق قۇندىلىقتارعا جۇمىلدىرىلعانىن ايتىپ ءوتتى. سونداي-اق، بۇگىندە قازاقستاندا تاتۋ-ءتاتتى ءومىر ءسۇرىپ جاتقان، دوستىقتىڭ التىن ۇلگىسىندەي بولعان ءجۇز مىڭ كورەي قاۋىمداستىعىنىڭ قازاقستان مەن وڭتۇستىك كورەيا اراسىنداعى قارىم-قاتىناسقا قوسقان ۇلەسى ەرەكشە ەكەنىنە دە توقتالدى.

- بۇگىندە وڭتۇستىك كورەيانىڭ قازاقستان ەكونوميكاسىنا قۇيعان ينۆەستيتسياسى 7 ميلليارد دوللاردان اسادى. ەكى جاقتى تاۋار اينالىمى جاھاندىق تۇراقسىزدىققا قاراماستان ەداۋىر ارتتى. قازىرگى تاڭدا ورتالىق ازيا ەلدەرىندەگى بارلىق بەس مەملەكەتتىڭ ورتاق جالپى ىشكى ءونىمىنىڭ 70 پايىزى قازاقستانعا تيەسىلى.

ال، وڭتۇستىك كورەيا مەملەكەتى جەتەكشى ينۆەستور مەملەكەتتەر اراسىندا 10-ورىندا. بۇل تۇرعىدا ءوزارا ءتيىمدى ىنتىماقتاستىقتى ودان ءارى جالعاستىرۋدىڭ ءالى دە پايدالانىلماعان ۇلكەن الەۋەتى بار ەكەنىن ەسكەرۋىمىز كەرەك،- دەدى قازاقستان پرەزيدەنتى قاسىم-جومارت توقاەۆ.

ايتا كەتەيىك، بۇعان دەيىن مەملەكەت باسشىسى قاسىم-جومارت توقاەۆ وتكەن جىلدىڭ ءساۋىر ايىندا وڭتۇستىك كورەيا باسشىسى مۋن چجە ءيننىڭ قازاقستانعا جاساعان ساپارىن تاريحي ءسات دەپ باعالاپ، ەكىجاقتى ءوزارا ارەكەتتىڭ جاڭا پاراعىن اشتى دەپ سانايتىنىن جەتكىزدى. سول ساپار بارىسىندا قول قويىلعان   «سامال جەل» باعدارلاماسى قازاق-كورەي ساۋدا-ەكونوميكالىق جانە مادەني تۇرعىدان جان-جاقتى بايلانىستاردى جانداندىرۋعا نەگىزدەلگەن.

سونداي-اق مەملەكەت باسشىسى وڭتۇستىك كورەيا باسشىسىنىڭ «جاڭا سولتۇستىك ساياسات» پەن «سامال جەل» باعدارلاماسى قازاقستاننىڭ «نۇرلى جول»، «تسيفرلى قازاقستان»  سىندى ستراتەگيالىق جوبالارىندا ناقتىلانعان مىندەتتەرگە سايكەس كەلەتىنىن العا تارتتى.

قازاقستان پرەزيدەنتى جاھانداعى ۇزاق مەرزىمگە سوزىلعان مۇناي ءداۋىرىنىڭ اياتالىپ كەلە جاتقانىنا توقتالىپ، قازاقستان ءۇشىن تۇراقتى ءارى ارتاراپتاندىرىلعان ەكونوميكا قۇرۋ اسا ماڭىزدى ەكەنىن ايتىپ ءوتتى.

- مەن بۇل ماسەلەگە بايلانىستى جاڭا ەكونوميكالىق باعىتتىڭ باستاماششىسى بولدىم. اتالعان باعىت تەك قانا قۇرىلىمدىق رەفورمالارمەن ەمەس، سونىمەن قاتار مۇمكىندىگىنشە مىقتى ءارى قارقىندى مەملەكەت قۇرۋمەن بايلانىستىرىلادى. قازاقستان كورەي ينۆەستورلارى ءۇشىن ارنايى ازىرلەنگەن قۇرالداردى ۇسىنۋعا دايىن. بۇل تۇرعىدا كەدەن جانە سالىق ارتىقشىلىقتارى، ەكسپورتتى قولاۋدىڭ ءىشىنارا كەپىلدىكتەرى مەن تەتىكتەرىن جانە جوبالاردى قوسا قارجىلاندىرۋدى اتاپ وتۋگە بولادى،- دەدى مەملەكەت باسشىسى قاسىم-جومارت توقاەۆ.

قازاقستان پرەزيدەنتى اعىلشىن قۇقىعى بويىنشا قىزمەت كورسەتەتىن «استانا» حالىقارالىق قارجى ورتالىعىنىڭ الەۋەتىن دە ءسوز قىلدى. قاسىم-جومارت توقاەۆ اتالعان ورتالىقتىڭ شەتەلدىك بيزنەسكە ارنالعان ەكوجۇيەسىنىڭ بىرەگەيلىگىنە ەرەكشە توقتالىپ ءوتتى.

شارا سوڭىندا مەملەكەت باسشىسى قاسىم-جومارت توقاەۆ فورۋم قاتىسۋشىلارىنا جۇمىستىڭ تابىستى بولۋىن ال، وڭتۇستىك كورەيا پرەزيدەنتى مەن ۇكىمەتىنىڭ يگى باستامالارى ءساتتى بولۋىنا نيەتتەس ەكەنىن جەتكىزدى.

Abai.kz